Heroin Seized:
ড্ৰাগছৰ বিৰুদ্ধে পাণবাৰী আৰক্ষীৰ বৃহৎ সফলতা ৷ নিশা বিজনীৰ পাণবাৰী আৰক্ষীৰ জালত কুখ্যাত ড্ৰাগছ সৰবৰাহকাৰী। জব্দ হয় ১১০.৮৮ গ্ৰাম হেৰোইন।
উল্লেখ্য যে ড্ৰাগছৰ বিৰুদ্ধে বিজনী আৰক্ষীয়ে কঠোৰস্থিতি লৈ থকাৰ মাজতে চিৰাং জিলাৰ পানবাৰীত আৰক্ষীয়ে চলোৱা এক সফল অভিযানত বুজন পৰিমাণৰ হেৰ’ইনসহ এখন চাৰিচকীয়া বাহন জব্দ কৰে।
নিশা এএছ০১-জিএইছ ৭৫৩৭ নম্বৰৰ এখন ‘ডিজায়াৰ’ বাহন পাতিলাদহাৰ পৰা পানবাৰী অভিমুখে আহি থকা অৱস্থাতে বেদলাংখাইটী পথত পানবাৰী থানাৰ আৰক্ষীয়ে অৰ্তকিতে তালাচী চলাই ১০ টা চাবোনৰ বাকচত হে’ৰইন ভৰ্তি ড্ৰাগছসহ বাহনখন জব্দ কৰে । এই সংক্ৰান্তত বঙাইগাঁৱৰ আলিমুদ্দিন নামৰ সৰবৰাহকাৰীজনক গ্ৰেপ্তাৰ কৰে ৷
আনহাতে বিজনীতো স্থানীয় আৰক্ষী থানাৰ অভিযানত পুৰণি বিজনী পথত ড্ৰাগছসহ গ্ৰেপ্তাৰ কৰা হয় এটা সৰবৰাহকাৰীক। সোমবাৰে নিশা বিজনী থানাৰ ভাৰপ্ৰাপ্ত বিষয়া ৰিতুজ্যোতি নাথৰ নেতৃত্বত আৰক্ষীৰ এটা দলে নিয়মীয়া তালাচীত এএছ১৯-আৰ ২১৭৫ নম্বৰৰ স্কুটিত তালাচী চলাই দুটা চাবোনৰ বাকচ ভৰ্তি হেৰ’ইন সহ জান্নাদুল ইছলাম(২২) নামৰ সৰবৰাহকাৰীটোক আটক কৰে। ধৃত জান্নাদুলৰ ঘৰ বঙাইগাঁও জিলাৰ মাণিকপুৰ থানাৰ অন্তৰ্গত ৭ নং বাছবাৰীত।
