সোমবাৰে হঠাতে অহা এজাক প্ৰবল বৰষুণৰ ফলত সমীপৱৰ্তী নগালেণ্ড পাহাৰৰ পৰা নামি অহা বাঢ়নি পানীয়ে বুৰাই পেলালে তিতাবৰ মহকুমাৰ অসম-নগালেণ্ড সীমান্তৱৰ্তী বৃহত্তৰ চেনিজান, মুক্তিনগৰ গাঁৱৰ বহু কৃষকৰ শস্যভূমি । বানপানীৰ ফলত ফেনে-ফুটুকাৰে বাঢ়ি অহা নাগিনীজান নৈয়ে মথাউৰি ভাগি কাষৰীয়া লোকৰ কৃষিশস্য বালিৰে পুতি নষ্ট কৰে । ইয়াৰোপৰি, মুক্তিনগৰ গাঁৱৰ বহু অংশ নাগিনীজান নৈৰ খহনীয়াৰ কবলত পৰিছে, ক্ৰমাৎ ভেটি খহিছে নৈখনৰ দুয়ো কাষৰীয়া লোকৰ । নৈখনৰ খহনীয়াৰ ফলত অধিক ক্ষতিগ্ৰস্ত হৈছে নৈখনৰ সীমামূৰীয়া প্ৰমোদ বৰুৱা, বিপুল চুতীয়া, মিণ্টু ৰাউতৰ মাটি-ভেটি ।
বানত গাঁৱখনৰ দেৱ গগৈ, বিপুল চুতীয়া, প্ৰমোদ বৰুৱাৰ ধানখেতি নৈৰ মথাউৰি ছিগাৰ ফলত বালিয়ে পুতি নষ্ট কৰে । খৰস্ৰোতা নাগিনীজান নৈৰ খহনীয়াই মুক্তিনগৰ গাঁওখনৰ অস্তিত্বলৈ ভাবুকি অনাৰ লগতে নৈ কাষৰীয়া লোকৰ জীৱনলৈয়ো চৰম সংকট কঢ়িয়াই আনিছে । সেয়েহে খহনীয়াগ্ৰস্ত গাঁওবাসীয়ে পানীৰ সোঁতক বাধা দিব পৰাকৈ স্থায়ী শৈলবান্ধ নিৰ্মাণ কৰি আৰু ওখকৈ মথাউৰি বন্ধাই নৈৰ খহনীয়াৰ পৰা গাঁও আৰু কৃষকৰ মাটি-ভেটি ৰক্ষা কৰিবলৈ আৰু বানত ক্ষতিগ্ৰস্ত কৃষকক উচিত ক্ষতিপূৰণ প্ৰদান কৰিবলৈ চৰকাৰক দাবী জনাইছে ।