কামৰূপ মহানগৰ জিলাৰ ক্ষেত্রী আৰক্ষী থানাৰ অন্তৰ্গত খালৈবাৰী তথা ৩৭নং ৰাষ্ট্ৰীয় ঘাইপথত বুধবাৰে পুৱা এক গুলীচালনাৰ ঘটনা সংঘটিত হয় । পুৱা প্ৰায় ৯.৩০বজাত সংঘটিত ঘটনাৰ বিৱৰণী মতে, মৰিগাঁৱৰ প্ৰতিষ্ঠিত ব্যৱসায়ী তথা বালাজী হাৰ্ডৱেৰৰ স্বত্বাধিকাৰী ৰাকেশ কুমাৰ ৰাথীয়ে এ এছ ২১ চি/৬৭৭২ নম্বৰৰ সামগ্ৰী কঢ়িওৱা মহেন্দ্ৰ জিট বাহনখনেৰে চালকৰ স’তে গুৱাহাটীলৈ বুলি গৈ আছিল ।
এনেতে ক্ষেত্ৰীৰ খালৈবাৰীৰ ৩৭নং ৰাষ্ট্ৰীয় ঘাইপথত বাওঁফালৰ পৰা হঠাতে এখন ৰঙা ৰঙৰ এল্ট’ বাহনে তেওঁলোকে অতিক্রম কৰে আৰু বাহনখনৰ পৰা অচিনাক্ত দুৰ্বিত্তই ব্যৱসায়ীজনলৈ বুলি গুলি চালনা কৰে । ঘটনা সংঘটিত কৰিয়ে এল্ট’খন তীব্রবেগত আতৰি যায় । গুলিচালনাৰ ফলত বাহন খনৰ বাওঁফালৰ দুৱাৰৰ আইনা ভাগি চূৰ্ণ-বিচূৰ্ণ হয় । ঘটনাত কিংকৰ্তব্যবিমূঢ় হৈ পৰা ব্যৱসায়ী ৰাকেশে প্ৰথম অৱস্থাত খলা-বমা পথৰ বাবে গাড়ীৰ আইনা ভঙা বুলি ভাবিছিল যদিও পাছত বাহনৰ ভিতৰত এটা গুলি প্ৰত্যক্ষ কৰি ভীতিগ্ৰস্ত হৈ পৰে আৰু ই এক গুলিচালনাৰ ঘটনা বুলি নিশ্চিত হয় ।
লগে লগে ব্যৱসায়ী জনে ক্ষেত্ৰী থানাত উপস্হিত হৈ ঘটনাৰ সৱিশেষ আৰক্ষীক অৱগত কৰে । আৰক্ষীয়ে লগে লগে ঘটনাৰ তদন্ত আৰম্ভ কৰে আৰু বাহনখনৰ পৰা এটা গুলিৰ কাৰ্টুজ উদ্ধাৰ কৰে । ঘটনাৰ সন্দৰ্ভত ব্যৱসায়ীজনে জানিব দিয়া মতে যোৱা ৩০মে’ত কোনো অচিনাক্ত লোকে ফোনযোগে তেওঁক ধন দাবী কৰাৰ লগতে ধন নিদিলে বিষম পৰিণাম ভুগিব লাগিব বুলি ভাবুকি প্ৰদান কৰিছিল । এই সন্দৰ্ভত মৰিগাঁও আৰক্ষীক অৱগত কৰি এজাহাৰ দাখিল কৰা বুলিও তেওঁ প্ৰকাশ কৰে ।