দেশজুৰি কৰ’না ভাইৰাছে এক মাৰাত্মক ৰূপ ধাৰণ কৰিছে । দৈনিক বৃদ্ধি হৈছে কৰ’নাৰ সামাজিক সংক্ৰমণ । এনে পৰিপ্ৰেক্ষিতত চিকিৎসক-স্বাস্থ্যকৰ্মী, জৰুৰী সেৱা, আৰক্ষীৰ লগতে সাংবাদিক-সংবাদ কর্মীসকলে নিজ জীৱনক তুচ্ছ কৰি দিনে-নিশাই ৰাইজৰ হৈ সেৱা আগবঢ়ায় আহিছে । কৰ’নাৰ বিৰুদ্ধে এই যুঁজত আক্ৰান্ত হোৱা সত্বেও সুস্থ হৈ পুনৰ সংবাদ সেৱাত মনোনিবেশ কৰিছে সাংবাদিক-সংবাদকর্মীসকলে ।
ৰাইজক নিৰন্তৰ সেৱা আগবঢ়াই অহাৰ বাবে সংবাদিক-সংবাদকৰ্মীসকল ধন্যবাদৰ পাত্ৰ বুলি মন্তব্য কৰে পশ্চিম গুৱাহাটীৰ বিধায়ক ৰমেন্দ্ৰ নাৰায়ণ কলিতাই । আজি আজাৰাস্থিত ৰাজহুৱা সভাঘৰ প্ৰাঙ্গণত অগপৰ পশ্চিম গুৱাহাটী সমষ্টিৰ সমিতিৰ উদ্যোগত সাংবাদিক-সংবাদকৰ্মী সকলৰ মাজত মাস্ক, ছেনিটাইজাৰৰ লগতে অত্যাৱশ্যকীয় সামগ্ৰী বিতৰণ কাৰ্যসূচীত অংশগ্ৰহণ কৰে বিধায়ক কলিতাই ।
বিধায়গৰাকীৰ সমষ্টিৰ ৰাইজৰ অভাৱ-অভিযোগকে ধৰি জলন্ত সমস্যা সমূহ দাঙি ধৰি তাৰ সমাধানত সহযোগিতা আগবঢ়োৱা বাবে সাংবাদিকসকলৰ শলাগ লয় বিধায়ক কলিতাই । অগপৰ কেন্দ্ৰীয় সাংগঠনিক সুভাষ শৰ্মাই আঁত ধৰা অনুষ্ঠানটোত অগপৰ পশ্চিম গুৱাহাটী সমষ্টিৰ সাধাৰণ সম্পাদক ৰাজেন মেধী, সহকাৰী সাধাৰণ সম্পাদক ৰুবুল বৈশ্যসহ বহু কেইগৰাকী বিষয়ববীয়া আৰু কর্মকৰ্তা উপস্থিত থাকে।