কৰ’না সৃষ্ট পৰিৱেশত ৰাজ্যৰ অধিকাংশ আদৰ্শ কৃষকে নিজ নিজ কৃষি ক্ষেত্ৰত আত্ম নিয়োগ কৰি বিশেষ সাফল্য অৰ্জন কৰিবলৈ সক্ষম হৈছে । তেনে এগৰাকী আদৰ্শ কৃষক হ’ল ৰংজুলি কৃষি উন্নয়ন খণ্ডৰ অন্তৰ্গত ধনুভাঙা-মাদাং গাঁৱৰ দেৱব্ৰত ৰাভা । গ্ৰাম্য অৰ্থনীতি সবল কৰাৰ পৰিকল্পনাৰে দেৱব্ৰত ৰাভাই নতুন নতুন কৃষি পদ্ধতিৰে অধিক উৎপাদন কৰাৰ প্ৰচেষ্টা হাতত লৈ আহিছে ।
তেওঁৰ কৃষি পদ্ধতি দেখি অঞ্চলটোৰ যুৱ চাম কৃষিৰ প্ৰতি আগ্ৰহী হৈছে ।লগতে কৃষি কৰ্মৰ ক্ষেত্ৰতো আগবাঢ়ি আহিছে উদীয়মান যুৱক সকল । এইবেলি দেৱব্ৰত ৰাভাই এক ব্যতিক্ৰমী কৃষি পদ্ধতিৰে শালি ধানৰ খেতি কৰিবলৈ লৈছে । তেওঁ কল গছৰ শাৰীৰ মাজে মাজে শালি ধানৰ খেতি কৰিছে । একেডৰা মাটিত একে সময়তে দুগুণ উৎপাদনৰ উদ্দেশ্যে তেওঁ প্ৰথম বাৰৰ এই পদ্ধতিৰে খেতি আৰম্ভ কৰিছে ।
ছয় বিঘা মাটিত তেওঁ শাৰী শাৰী কৈ ৰূপন কৰিছে চেনি চম্পা, জাহাজী আৰু জি-নাইন কল । কল গছৰ শাৰীৰ মাজত বাইশ ফুটকৈ ব্যৱধান ৰাখি বংগ বন্ধু, আইজং আৰু ৰঞ্জিত ধান লগাইছে । তেওঁৰ এই কৃষি পদ্ধতিয়ে অঞ্চলটোৰ কৃষক সকলৰ দৃষ্টি আকৰ্ষণ কৰিবলৈ সক্ষম হৈছে । অকল কৃষক সকলকে নহয়; কৃষি বিভাগৰো দৃষ্টি আকৰ্ষণ কৰিছে এই কৃষি পদ্ধতিয়ে । ইতিমধ্যে তেওঁৰ খেতি ডৰাত কল আৰু ধানৰ গছ লহ-পহ কৈ বাঢ়ি আহিছে । তেওঁ আশাবাদী একে সময়তে কল আৰু ধান উৎপাদন কৰি দুগুণ উপাৰ্জন কৰিব পাৰিব ।
ইপিনে কল আৰু ধান লগোৱাৰ পূৰ্বে এই ডৰা মাটিতে মাকৈ খেতি কৰি তেওঁ চল্লিশ হাজাৰ টকা উপাৰ্জন কৰিছে । ধান চপোৱাৰ পাছত এই ডৰা মাটিতে আলু, কবি, বেঙেনাৰ খেতি কৰিব । দেৱব্ৰত ৰাভাৰ এই নতুন কৃষি পদ্ধতি দেখি তেওঁ শলাগ লৈছে দুধনৈ বিধায়ক দীপক ৰাভাই | খেতিডৰা দেখি অভিভূত হৈ পৰা বিধায়ক দীপক ৰাভাই কয়- দেৱব্ৰত ৰাভাৰ দৰে কৃষক নতুন প্ৰজন্মৰ বাবে প্ৰেৰণাৰ উৎস । তেওঁ দেৱব্ৰত ৰাভাক চৰকাৰৰ পৰা সহায়-সহযোগিতা আগবঢ়োৱাৰ আশ্বাস প্ৰদান কৰিছে ।