Nigeria:✒️উত্তৰ-পূৱ নাইজেৰিয়া(Nigeria)ৰ এডামাৱা ৰাজ্য (Adamawa State)ত সংঘটিত এক ভয়ংকৰ সশস্ত্ৰ আক্ৰমণত অন্ততঃ ২৯ জন লোক নিহত হৈছে। ৰাজ্যখনৰ গৱৰ্ণৰে জনোৱা মতে, এখন ফুটবল খেলপথাৰত একত্ৰিত হৈ থকা লোকসকলক লক্ষ্য কৰি দুৰ্বৃত্তই অতৰ্কিতভাৱে গুলীচালনা কৰিছিল।
প্ৰাপ্ত তথ্য অনুসৰি, কেমেৰুণ সীমান্তৱৰ্তী অঞ্চলত সংঘটিত এই ঘটনাৰ পাছতে প্ৰশাসনে সতৰ্কতা জাৰি কৰিছে। তথ্য অনুসৰি সন্ত্ৰাসবাদী আৰু স্থানীয় অপৰাধী গেঙৰ মাজত গুলীয়াগুলী সংঘটিত হয়।
ইয়াৰ ফলত অঞ্চলটোত সাম্প্ৰদায়িক সংঘাত বৃদ্ধি পোৱাৰ আশংকা প্ৰকাশ কৰা হৈছে, বিশেষকৈ ভূমি অধিকাৰক লৈ দুই ফৈদৰ মাজত ইতিমধ্যে উত্তেজনা চলি থকা পৰিস্থিতিত।
এই ঘটনাৰ পাছতে নাইজেৰিয়া চৰকাৰে ৰাজ্যখনত নিৰাপত্তা ব্যৱস্থা অধিক কটকটীয়া কৰিছে। উল্লেখযোগ্য যে, দেশখনত সাধাৰণ নিৰ্বাচনলৈ এক বছৰতকৈ কম সময় বাকী থকা অৱস্থাত এই ধৰণৰ হিংসাত্মক ঘটনা বিশেষ উদ্বেগজনক হিচাপে বিবেচিত হৈছে।
ৰাজ্যখনৰ গৱৰ্ণৰ আহমাদু উমাৰু ফিন্টিৰি(Ahmadu Umaru Fintiri)য়ে কয়, “দেওবাৰে দুৰ্বৃত্তই ২৯ জন লোকক হত্যা কৰে। স্থানীয় গমবি চৰকাৰ অধীনস্থ গুয়াকু সম্প্ৰদায়ৰ লোকসকলক লক্ষ্য কৰি এই আক্ৰমণ চলোৱা হৈছিল।”
স্থানীয় বাসিন্দা ফিলিপ আগাবাছে জনোৱা মতে, “আমাৰ লোকসকল ফুটবল খেলপথাৰত সমবেত হৈ আছিল। সেই সময়তে দুৰ্বৃত্তই অস্ত্ৰসহ প্ৰৱেশ কৰি হঠাৎ গুলীচালনা আৰম্ভ কৰে। উপাসনাস্থলী, ঘৰ আৰু বহু মটৰচাইকেলো জ্বলাই দিয়া হয়।”
গৱৰ্ণৰে আৰু কয় যে, “কেবাঘণ্টা ধৰি দুৰ্বৃত্তই নিৰ্বিচাৰে গুলীচালনা চলাই, যাৰ ফলত বহু লোকৰ মৃত্যু হয় আৰু ব্যাপক সম্পত্তি ক্ষতি সাধন হয়।” প্ৰশাসনে এই ঘটনাৰ বাবে বোকো হাৰাম(Boko Haram)ক জগৰীয়া কৰিছে।
ইফালে, সমগ্ৰ ঘটনাৰ দায় স্বীকাৰ কৰিছে ইছলামিক ষ্টেট ৱেষ্ট আফ্ৰিকা প্ৰভিন্স(Islamic State West Africa Province)য়ে। সংগঠনটোৰ দাবী অনুসৰি, “২৫ জন খ্ৰীষ্টান ধৰ্মাৱলম্বী লোক নিহত হৈছে, গীৰ্জা জ্বলাই দিয়া হৈছে আৰু প্ৰায় ১০০খন মটৰচাইকেলো ধ্বংস কৰা হৈছে।”