দুৰ্নীতিৰ ক্ষেত্ৰত শূন্য সহনশীল নীতিৰ পক্ষপাতী বিজেপি নেতৃত্বাধীন অসম চৰকাৰ । কিন্তু চিৰাঙত বিজেপি দলৰ বিটিচি পৰিষদীয় মানাস সেৰফাং সমষ্টিত বিজেপিৰ ওলোটা ছবিহে পোহৰলৈ আহিছে । ৰাজহুৱা বিতৰণ ব্যৱস্থাৰ চাউল হিতাধিকাৰীৰ মাজত বিতৰণ নকৰি বিজেপি দলে নিৰ্বাচনী আচৰণ বিধি উলংঘা কৰি বান সাহাৰ্য্য বিতৰণ কৰি থকা অৱস্থাত আৰক্ষীয়ে জব্দ কৰে চাউলসহ গাড়ী ।
অভিযোগ অনুসৰি চিৰাং জিলাৰ বিজনী মহকুমাৰ অন্তৰ্গত বিষ্ণুপুৰ সমবায় সমিতি লিমিটেডৰ অন্তৰ্গত লক্ষীঝোৰাৰ সুলভ মূল্যৰ দোকানত সংঘটিত হৈছে এই দুৰ্নীতিৰ ঘটনা । যোৱা ২ আগষ্ট তাৰিখে বিজেপিকৰ্মী সকলে বানাক্ৰান্তৰ মাজত চাউল বিতৰণ কৰি থকা অৱস্থাত আৰক্ষীয়ে চাউল খিনি জব্দ কৰে পানবাৰী থানাৰ আৰক্ষীয়ে । পানবাৰী থানাৰ ভাৰপ্ৰাপ্ত বিষয়া উত্তম কুমাৰ দলেই জনায় যে অভিযোগ অনুসৰি আমি অভিযান চলাই এক নং কচুবিলৰ পৰা চৰকাৰী ৰাজহুৱা বিতৰণ ব্যৱস্থাৰ চিল মোহৰ থকা বস্তাৰ চাউলখিনি জব্দ কৰা হয় বুলি জনায়।
জব্দ চাউলখিনি চিন্তামনি সৰকাৰ আৰু কানাই নম: দাস নামৰ লোক দুজনৰ সুলভ মূল্যৰ দোকানৰ পৰা সংগ্ৰহ কৰা চাউল আছিল । ইয়াৰে চিন্তামনি সৰকাৰ চিকাঝোৰা বিশপানীৰ সুলভ মূল্যৰ দোকানী আৰু কানাই নম: দাস লক্ষীঝোৰাৰ সুলভ মূল্যৰ দোকানী । ইয়াৰে মানাস সেৰফাং মণ্ডল বিজেপিৰ সভাপতি দিব্যজ্যোতি নম: দাস সুলভ মূল্যৰ দোকানে কানাই নমঃদাসৰ পুত্ৰ হোৱাৰ সুবাদতে দুমাহ বহু কেইজন লোকক চাউল বিতৰণ নকৰি সেই চাউল বান সাহাৰ্য্য হিচাপে বিতৰণ কৰিছে ।
গতিকে এই সন্দৰ্ভত পানবাৰী থানাত ভাৰতীয় দণ্ডবিধিৰ ১৪৩/১৭১(চি)/১৭১(ই) আৰু নিৰ্বাচন আয়োগৰ ৭ নং অনুচ্ছেদ অনুসৰি ১১৩/২০২০ গোচৰ পঞ্জিয়ন কৰিছে । বিপিএফৰ মানাস সেৰফাং ব্লক সভাপতি গণেশ চন্দ্ৰ বসুমতাৰীয়ে এই সন্দৰ্ভত পানবাৰী থানাত গোচৰ দিছিল । আজি এক/দুই/তিনি নং লক্ষীঝোৰা গাঁওৰ লোকে অভিযোগ কৰে যে সলভ মূল্যৰ দোকানী দুজনে বহু লোকক বিগত দুমাহে চাউল বিতৰণ কৰা নাই। সকলো হিতাধিকাৰীৰ কাৰ্ডসমূহ জমা লৈছে।
বহু লোকৰ নাম দুবাৰ তিনিবাৰ কৈ উঠাই সমবায়ৰ পৰা চাউল আনে যদিও বিতৰণ নকৰি এইদৰে পৰিষদীয় মানাস সেৰফাং সমষ্টিৰ বিজেপি প্ৰাৰ্থী শিবনাথ ব্ৰহ্মৰ নামত বানাক্ৰান্তৰ মাজত বিতৰণ কৰিছিল বুলি অভিযোগ উত্থাপন কৰিছে হিতাধিকাৰী গাঁৱৰ ৰাইজে । একেদৰে চিৰাং জিলা সমিতি আছুৰ সভাপতি ৰূপম কুমাৰ দাসে কয় যে শূন্য সহনশীল বুলি দাবী কৰি নিজেই দুৰ্নীতিত লিপ্ত হৈছে বিজেপি চৰকাৰ ।
বিজেপি দলৰ লোকসকলে কোন আইন মতে সুলভ মূল্যৰ দোকানীৰ পৰা চাউল বিতৰণ নকৰি বানাক্ৰান্তক বিতৰণ কৰিলে বুলি প্ৰশ্ন উত্থাপন কৰিছে। মাছৰ তেলেৰে মাছ ভজাৰ দৰে কৰি বাহ বাহ লৈ দুৰ্নীতিৰে নিৰ্ব্বাচনত জয়ী হোৱাৰ সপোন দেখিছে বিজেপিয়ে । ছাত্ৰ নেতা জনে আৰু অভিযোগ কৰে যে আমি পূৰ্বৰে পৰা কৈ আহিছিলো যে সুলভ মুল্যৰ দোকানসমূহে জনসাধাৰণক নিয়ম অনুসৰি চাউল বিতৰণ নকৰে। এয়া প্ৰমানিত হ’ল । বিজেপিয়ে বান পানী গৰাখহনীয়াক ৰাষ্ট্ৰীয় সমস্যা ঘোষণা কৰিব নোৱাৰি এই দৰে সুলভ মুল্যৰ চাউল বিতৰণ কৰি আছে।
সেয়ে ছাত্ৰ সন্থাৰ পৰা দাবী জনায় যে যিহেতু আইন সকলোৰে বাবে সমান সেয়ে এই দুৰ্নীতিত জড়িত সকলৰ বিৰুদ্ধে প্ৰশাসনে বিহিত ব্যৱস্থা গ্ৰহণ কৰিব লাগে অন্যথা ৰাইজে বুজিবলৈ বাধ্য হ’ব যে বিজেপিয়ে দুৰ্নীতি কৰিলে তাৰ কোনো বিচাৰ নহয় । এই সন্দৰ্ভত এক মাত্ৰ দৈনিক অগ্ৰদূত কাকতে যোৱা ৩ আগষ্ট তাৰিখে বিতং বাতৰি পৰিবেশন কৰাৰ পিচতে বিজনী মহকুমা প্ৰশাসনে ব্যৱস্থা গ্ৰহণ কৰা পৰিলক্ষিত হৈছে । এই সন্দৰ্ভত বিজনী মহকুমাধিপতি ধ্ৰুৱজ্যোতি দাসে খাদ্য আৰু অসামৰিক যোগান বিভাগক তদন্তৰ নিৰ্দেশ দিয়া বুলি জানিব পৰা গৈছে ।