বিশ্বনাথ জিলাৰ তথা উত্তৰ জামুগুৰিৰ নিকটৱৰ্তী ইটাখোলাৰ সমীপত অৱস্থিত শান্তিপুৰ গাঁৱত পানীৰ পৰা উদ্ধাৰ কৰা হৈছে এটা সুগৰী পহু । গাওঁখনৰ নিৱাসী তথা ইটাখোলাস্থিত দিকৰাই উচ্চতৰ মাধ্যমিক বিদ্যালয়ৰ অসমীয়া বিভাগৰ বিষয় শিক্ষক মিকুল কলিতাই আবেলি প্ৰায় চাৰি মান বজাত নিজ পুখুৰীত এটা পহু পৰি থকা প্ৰত্যক্ষ কৰে । পাছত গাঁৱৰ যুৱক এজনৰ সহায়ত প্ৰায় ৩০ কিলোগ্ৰাম ওজনৰ পহুটোক পুখুৰীৰ পানীৰ পৰা উদ্ধাৰ কৰে ।
শিক্ষক মিকুলৰ ঘৰত পহু ওলোৱা বাতৰি বিয়পি পৰাৰ লগে তাৎক্ষণিক ভাৱে পহু চাবলৈ বহু লোকে আহি ভিৰ কৰেহি । শিক্ষক মিকুলে ইটাখোলাস্থিত ডিপলোঙা বন সংমণ্ডল কাৰ্যালয়ত খৱৰ দিয়াত বনকৰ্মী তেওঁৰ ঘৰত উপস্থিত হৈ পহুটোক লৈ যায় । বনকৰ্মীৰ পৰা জানিব পৰা মতে উক্ত পহুটো বান পানীৰ ফলত কাজিৰঙা ৰাষ্ট্ৰীয় উদ্যানৰ ষষ্ঠ সংযোজনৰ পৰা ওলাই আহি ওখ ঠাই বিচাৰি গাঁৱত প্ৰৱেশ কৰিছিল ।