এইবাৰ চীনে ব্ৰাজিলৰ পৰা আমদানি কৰা মূৰ্গীত কৰ’না ভাইৰাছ থকাৰ দাবী কৰিছে। ইয়াৰ পূৰ্বে চীনে জুনত ব্ৰাজিলৰ লগতে কিছুমান অন্যান্য দেশৰ মাংসৰ আমদানিত প্ৰতিবন্ধকতা আৰোপ কৰিছিল । অৱশ্যে পিছত এই প্ৰতিবন্ধকতা খুলি দিছিল চীনে ৷
আনহাতে ডিজিজ কন্ট্ৰ’ল চেন্টাৰ অৰ্থাৎ চিডিচিয়ে ব্ৰাজিলৰ পৰা আমদানি কৰা মূৰ্গীৰ নমূনা লৈছিল । এই নমূনা পৰীক্ষা কৰাৰ পিছত পজিটিভ ৰিপৰ্ট আহে । চিডিচিৰ বিষয়াবৰ্গই লগতে কয় যে ব্ৰাজিলৰ পৰা পঠোৱা বাকী বস্তুসমূহৰ পৰীক্ষাৰ ফলাফল নিগেটিভ আহে । অৱশ্যে এই সন্দৰ্ভত ব্ৰাজিলে কোনো প্ৰতিক্ৰিয়া প্ৰকাশ কৰা নাই।
উল্লেখযোগ্য যে চীনৰ উহানৰ পৰা সমগ্ৰ বিশ্বত বিয়পি পৰিছিল কৰ’না ভাইৰাছ । সকলোৱে আশংকা কৰিছে যে চীনৰ এখন খাদ্য বজাৰৰ পৰা কৰ’নাৰ সংক্ৰমণ হৈছিল ৷ তথ্য অনুসৰি এই বজাৰখনত বিভিন্ন জন্তুৰ লগতে সৰীসৃপৰ মাংস বিক্ৰী কৰা হয় ।
কিন্তু সমগ্ৰ বিশ্বই চীনক লৈ সমালোচনা কৰাৰ কাৰণে সম্প্ৰতি দেশখনত সৰীসৃপৰ ধৰি বিভিন্ন মাংসৰ বিক্ৰীত প্ৰতিবন্ধকতা আৰোপ কৰে । ইতিমধ্যে চীনত পুনৰ দুজন লোকৰ শৰীৰত কৰ’না ভাইৰাছ পোৱা গৈছে । অৱশ্যে এই দুজন লোকৰ সংস্পৰ্শলৈ অহা লোকসকলৰ শৰীৰত কৰ’নাৰ লক্ষণ পোৱা নাই যদিও সকলোকে কোৱাৰেন্টাইনত ৰখা হৈছে।