আমেৰিকাত কৰ্মৰত বিদেশী কৰ্মীক সকাহ দি ভিছা নীতি শিথিল ৰাষ্ট্ৰপতি ট্ৰাম্পৰ ব্যাপক চাপৰ পৰিপ্ৰেক্ষিতত মাৰ্কিন ভিছা নীতি শিথিল কৰিবলৈ বাধ্য হ’ল আমেৰিকাৰ ৰাষ্ট্ৰপতি ড’নাল্ড ট্ৰাম্প। বুধবাৰে জাৰি কৰা এক নিৰ্দেশনাত উল্লেখ কৰা মতে, কৰ’নাৰ সংক্ৰমণৰ ফলত এইচ-১ বি ভিছাৰে আমেৰিকাত কাম কৰিবলৈ অহা যিসকল বিদেশী কৰ্মীয়ে স্বদেশলৈ উভতি গৈছিল, তেওঁলোকে সেই পদত কৰ্মৰত হ’বলৈ পুনৰ আমেৰিকালৈ আহিব পাৰিব।
ট্ৰাম্প চৰকাৰৰ এই সিদ্ধান্তৰ ফলত আমেৰিকাৰ তথ্য প্ৰযুক্তি আৰু স্বাস্থ্য সেৱা খণ্ডত ভাৰতীয় পেছাদাৰী উপকৃত হ’ব বুলি ধাৰণা কৰা হৈছে। মাৰ্কিন বৈদেশিক মন্ত্ৰণালয়ৰ নতুন নিৰ্দেশনাত এইদৰে উল্লেখ কৰা হৈছে , ‘সংশোধিত আইন অনুসৰি প্রবাসী বিদেশী কৰ্মীয়ে যদি একেজন নিয়োগকর্তাৰ কাষলৈ উভতি আহিব বিচাৰে, তেন্তে তেওঁলোকে এইচ-১ বি আৰু এল-১ ভিছা লাভ কৰিব পাৰিব।
স্বাস্থ্য সেৱা, বিশেষকৈ ক’ভিড-১৯ বা কৰ্কটৰ দৰে ব্যাধিৰ গৱেষণাৰ স’তে যিসকল জড়িত হৈ আছে তেওঁলোকেও এই সুবিধা লাভ কৰিব।’ মাৰ্কিন বৈদেশিক মন্ত্ৰণালয়ে লগতে কয় নতুনকৈ কৰ্মী নিয়োগৰ পথত অগ্ৰসৰ হ’ব লাগিব নিয়োগকর্তা সংস্থাসমূহৰ ওপৰত বিত্তীয় হেঁচা অধিক বৃদ্ধি পোৱাৰ শংকা থকাৰ প্ৰতি লক্ষ্য আমেৰিকাৰ ভিছা নীতি শিথিল কৰিবলৈ ট্ৰাম্প প্ৰশাসনে সিদ্ধান্ত ল’লে ।
উল্লেখ্য যে যোৱা ২২ জুনত ট্ৰাম্প প্রশাসনে ঘোষণা কৰি কৈছিল যে চলিত বৰ্ষত নতুনকৈ কোনো এইচ-১ বি, এইচ-৪, এল -১ আৰু জে-১ ভিছা আমেৰিকাই জাৰি নকৰে। তদুপৰি কৰ’না সংক্ৰমণৰ ফলত নিজ নিজ দেশলৈ উভতি যোৱা কৰ্মচাৰীসকলকো আমেৰিকাই উভতি অহাৰ বাবে ভিছা দিয়া নহ’ব বুলি ট্ৰাম্পে ঘোষণা কৰিছিল। কিন্তু বৰ্ধিত হেঁচাৰ পৰিপ্ৰেক্ষিতত মাৰ্কিন ৰাষ্ট্ৰপতিয়ে পূৰ্বৰ সিদ্ধান্ত সলনি কৰি ভিছা নীতি শিথিল ঘোষণা কৰিলে।
