ভাৰতত কৰ’না যুদ্ধত সহযোগৰ বাবে আগ্ৰহী বন্ধুৰাষ্ট্ৰ ৰাছিয়া । বিগত সপ্তাহতে ৰাছিয়াই সমগ্ৰ বিশ্বৰ ভিতৰতে প্ৰথম কৰ’না ভাইৰাছৰ প্ৰতিষেধক নিৰ্মাণ কৰি উলিওৱাৰ খবৰ প্ৰকাশিত হৈছে । ইতিমধ্যে পৰ্যায়ক্ৰমে এই ভাইৰাছৰ মানৱ দেহত পৰীক্ষণো হৈ গৈছে । এতিয়া এই ভেকচিন উৎপাদনৰ ক্ষেত্ৰত ভাৰতক অংশীদাৰ হিচাপে বিচাৰিছে ৰাছিয়াই ।
‘ৰাছিয়ান ডাইৰেক্ট ইনভেষ্টমেণ্ট ফাণ্ড’ৰ অধ্যক্ষ কিৰিল দিমিত্রিয়েভে এই সন্দৰ্ভত জনাই, ‘ভাৰতৰ লগত আমাৰ যথেষ্ট সহযোগিতা আছে । ক’ভিড-১৯ প্ৰতিষেধকৰ উৎপাদন বৃদ্ধিৰ প্ৰচুৰ ক্ষমতা ভাৰতৰ আছে ।সেয়েহে ক’ভিড-১৯ ৰ প্ৰতিষেধকৰ উৎপাদন ভাৰতত বৃদ্ধি কৰিবলৈ আগ্ৰহী ।”
লগতে দিমিত্ৰিভে জনায়, ‘এই ক্ষেত্ৰত ভাৰতৰ প্ৰধান মন্ত্ৰী নৰেন্দ্ৰ মোদীয়েও সহযোগিতা আগবঢ়াইছে । ভাৰত, ভাৰতৰ বৈজ্ঞানিক-গৱেষকৰ লগত আমাৰ পূৰ্ণ সহযোগিতা আছে ।’ লগতে তেওঁ কয়, ‘এই প্ৰতিষেধক সম্পূৰ্ণ নিৰাপদ । মোৰ ৯০বৰ্ষীয় পিতৃ-মাতৃকো এই ভেকচিন দিয়া হৈছে ।’
লগতে তেওঁ জনাই যে এই ভেকচিন উৎপাদনৰ ক্ষেত্ৰত ‘হু’ৰ মঞ্জুৰীৰ কোনো আৱশ্যকতা নাই । উল্লেখ্য যে ৰাছিয়া, ব্ৰিটেইনৰ লগতে ভাৰততো ৩টা ভেকচিনৰ মানৱ পৰীক্ষণ আৰু গৱেষণাৰ কাম অব্যাহত আছে। ৰাছিয়াৰ এই প্ৰস্তাৱৰ বিষয়ে এইপৰ্যন্ত ভাৰত চৰকাৰে কোনো আনুষ্ঠানিক বিবৃতি প্ৰকাশ কৰা নাই।