দক্ষিণ ভাৰতীয় ছবিৰ সীমা অতিক্ৰম কৰি সেইখন ছবিৰ বাবেই তেওঁ এতিয়া সমগ্ৰ দেশৰ বাবেই ‘বাহুবলী’ অভিনেতা প্রভাস । সেই বাহুবলীয়ে এতিয়া হ’বগৈ ‘আদিপুৰুষ’ । ৰামায়ণৰ প্ৰেক্ষাপটতে শীৰ্ঘ্ৰে নিৰ্মাণ হ’ব লগা মেগা বাজেটৰ ছবি ‘আদিপুৰুষ’। এই ছবিখনৰে মুখ্য চৰিত্ৰত অভিনয় কৰিব দক্ষিণৰ চুপাৰষ্টাৰ প্ৰভাসে । ছবিখন পৰিচালনা কৰিব ‘তানাজী: দ্য আনছাং বেৰিয়ৰ’ৰ পৰিচালক ওম ৰাউটে ।
ইতিমধ্যে ‘আদিপুৰুষ’ৰ প’ষ্টাৰ সামাজিক মাধ্যমত আপলোড কৰে স্বয়ং প্ৰভাসে । প’ষ্টাৰত নীলা ৰঙৰ প্ৰেক্ষাপটত ডাঙৰকৈ লিখা আছে সোণালী ৰঙৰ ইংৰাজী ‘এ’ বৰ্ণ । তাৰ মাজতে লিখা আছে ‘আদিপুৰুষ’ ৰূপে প্রভাসৰ নাম । তলত কেপচনত লিখা হৈছে, ‘অশুভক হৰুৱাই শুভ শক্তিৰ বিজয়োৎসৱ’। সমগ্ৰ প’ষ্টাৰ খনত আছে ৰামায়ণৰ বিভিন্ন মুহূৰ্ত । ছবিখনৰ প্ৰযোজক ভূষণ কুমাৰ । এই ছবিখন তেলেগু আৰু হিন্দী ভাষাত নিৰ্মাণ কৰাৰ উপৰি তামিল, মালায়ালম, কন্নড় আৰু একাংশ বিদেশী ভাষাতো ডাবিং কৰাৰ কথা জনাইছে প্ৰযোজকে ।