যাদুকৰী হাঁহি আৰু মন চুই যোৱা অভিনয়েৰে দৰ্শকৰ হৃদয়ত স্থান ল’বলৈ সক্ষম হোৱা অপৰূপ সৌন্দৰ্যৰ অধিকাৰী বলিউদৰ অভিনেত্ৰী শ্ৰীদেৱীয়ে খুব কম বয়সতে খোজ দিছিল অভিনয় জগতত । শিশুশিল্পী হিচাপেই অভিনয়ৰ যাত্ৰা আৰম্ভ কৰিছিল শ্ৰীদেৱীয়ে ।
প্ৰথমে অভিনয়ৰ কামত শ্রীদেৱীক তেখেতৰ মাতৃয়ে সংগ দিছিল যদিও পাছলৈ লগত গৈছিল তেখেতৰ ভগ্নী শ্ৰীলতা। শ্বুটিঙৰ হিচাপৰ পৰা আৰম্ভ কৰি শ্ৰীদেৱীৰ আয়, ব্যয়ৰ হিচাপ ৰাখিছিল শ্রীলতাই। ক’বলৈ গ’লে ব্যৱহাৰিকভাৱে অভিনয়ৰ লগত জড়িত শ্রীদেৱীৰ প্ৰায় সকলোবোৰ কামৰ তদাৰক কৰিছিল শ্ৰীলতাই।
অৱশ্যে ভগ্নীৰ যোগদানৰ কথাও শ্রীদেৱীয়ে বহু সাক্ষাৎকাৰত স্বীকাৰ কৰিছে । সময়ৰ লগে লগে বলিউডত শ্রীদেৱীৰ জনপ্ৰিয়তা লাহে লাহে বাঢ়িবলৈ আৰম্ভ কৰিছিল । বলিউদৰ প্ৰথমগৰাকী চুপাৰষ্টাৰ নায়িকা হিচাপে পৰিচিত হৈছিল শ্রীদেৱী, যিয়ে অকলেই যিকোনো ছবিৰ সফলতা কঢ়িয়াই আনিব পাৰে । সেইসময়তে অভিনেত্ৰীগৰাকীৰ কাম-কাজসমূহ তদাৰক কৰিবৰ বাবে এই ক্ষেত্ৰখনৰ লগত বহু লোকৰ আগমন ঘটিছিল । তেওঁলোকৰ পৰা বিভিন্ন সময়ত সহায়ো লৈছিল শ্ৰীদেৱীয়ে। পৰিণামস্বৰূপে শ্ৰীদেৱীৰ কাম-কাজ আৰু গুৰুত্ব কিছুপৰিমাণে কমি গৈছিল ।
ইয়াৰ পাছতে ১৯৮৯ত ৰাজনৈতিক নেতা সঞ্জয় ৰামস্বামীৰ লগত শ্ৰীলতাৰ বিবাহ সম্পন্ন হয় । বিয়াৰ পাছত শ্ৰীলতা নিজৰ পাৰিবাৰিক জীৱনত ব্যস্ত হৈ পৰে। ১৯৯০ত শ্ৰীদেৱীয়ে লণ্ডনত ‘লমহে’ ছবিখনৰ শ্বুটিং চলি থকাৰ সময়তে ভাৰতত পিতৃৰ মৃত্যু ঘটে । শ্বুটিঙৰ ব্যস্ত সময়খিনিৰ মাজতে শ্ৰীদেৱীয়ে কেৱল এটা দিনৰ বাবে আহিছিল । তেখেতৰ ভগ্নীয়ে পিতৃৰ শ্ৰাদ্ধৰ বাকী সকলো কামৰ তদাৰক কৰিছিল ।
তাৰ পিছতে ১৯৯৫ত শ্রীদেৱীয়ে মাতৃক হেৰুৱায়। এই সময়খিনিতে তেওঁলোক দুয়োগৰাকীৰ সম্পৰ্কত ফাঁট মেলিবলৈ আৰম্ভ কৰে। ইয়াৰ কাৰণ আছিল সম্পত্তি। শ্রীদেৱীয়ে দাবী কৰা মতে, মুম্বাই আৰু চেন্নাইত অধিকাংশ সম্পত্তি ক্ৰয় কৰিছিল মাকে।
শ্ৰীদেৱীয়ে কৰা অভিযোগ অনুসৰি, শ্ৰীলতাৰ স্বামী ৰামস্বামীৰ কথা মতেই তেখেতৰ ভগ্নীয়ে সম্পত্তিৰ বাবে শ্ৰীদেৱীলৈ আইনী ন’টিছ পঠিয়াইছিল । সম্পৰ্কত ইমানেই ফাট মেলিছিল যে, ১৯৯৬ত শ্রীদেৱীৰ বনি কাপুৰৰ সৈতে হোৱা বিবাহ অনুষ্ঠানত অনুপস্থিত থাকে শ্ৰীলতা। উল্লেখ্য যে, বিয়াৰ পাছত বনি কাপুৰৰ পৰিয়ালে বহুদিন পৰ্যন্ত ধৰি তেওঁলোকৰ বিবাহক স্বীকাৰ কৰা নাছিল ।
ইয়াৰ উপৰিও প্ৰায় ২০বছৰ ধৰি দুয়োগৰাকী ভগ্নীৰ মাজত কোনো সম্পৰ্ক নাছিল । আনকি দুয়োগৰাকীৰ মাজত কোনো কথা-বাৰ্তাও হোৱা নাছিল । ২০১৩ত শ্ৰীদেৱীক পদ্মশ্ৰী উপাধিৰে সন্মানিত কৰা হয়। সেই বছৰটোতে দুয়ো পুনৰ লগ হয় ।
২০১৮ৰ ফেব্ৰুৱাৰী মাহত ডুবাইত ফেব্ৰুৱাৰী মাহত ডুবাইত আকস্মিকভাৱে মৃত্যু হৈছিল অভিনেত্ৰীগৰাকীৰ। অভিনেত্ৰীগৰাকীৰ মৃত্যুৰ সময়ত শ্ৰীলতা ডুবাইতে আছিল বুলি কোনো এক সূত্ৰৰ পৰা জানিব পৰা গৈছিল । কিন্তু, শ্ৰীদেৱীৰ মৃত্যুৰ সন্দৰ্ভত শ্ৰীলতাই মুখ বন্ধ ৰাখিছিল । আনকি শ্ৰীদেৱীৰ মৃত্যুৰ পাছত চেন্নাইত হোৱা প্ৰাৰ্থনাসভাতো চামিল হোৱা নাছিল শ্ৰীলতা।
শ্ৰীদেৱীৰ মৃত্যুৰ সন্দৰ্ভত বহু প্রশ্ন উত্থাপন হয় । কিন্তু আশ্চৰ্যজনক কথাটো হ’ল, এই ঘটনাৰ পাছত শ্ৰীলতাই সংবাদমাধ্যমৰ পৰা নিজকে সম্পূৰ্ণ আঁতৰাই ৰাখে । অভিনেত্ৰীগৰাকীৰ মৃত্যুৰ প্ৰসংগত একেবাৰে নীৰৱ হৈ পৰে শ্ৰীলতা । ইয়াৰ পাছতে চেন্নাইৰ বাসগৃহটোৰ স্বত্বাধিকাৰী হয় শ্ৰীলতা।