কেন্দ্ৰৰ নিৰ্দেশ অনুসৰি ৰাজ্যৰ শিক্ষানুষ্ঠানসমূহত আজিৰে পৰা পুনৰ আৰম্ভ হৈছে পাঠদান প্ৰক্ৰিয়া। দুখৰ বিষয় যে, ওডালগুৰি,চেপনৰ লগতে মাজুলীৰ গ্ৰামাঞ্চলত বাস কৰা বহু ছাত্ৰ-ছাত্ৰীয়ে বৰ্তমানেও ম’বাইলৰ অভাৱ অথবা নেটৱৰ্কৰ অসুবিধাৰ বাবে পাঠদানত অংশ ল’ব পৰা নাই ।
আজি বিদ্যালয় খোলাৰ প্ৰথমদিনাই নৱম শ্ৰেণীৰ লগতে দশম শ্ৰেণীৰ ছাত্ৰ-ছাত্ৰীয়ে বিদ্যালয়লৈ গৈও পুনৰ উভতি আহে ঘৰলৈ । আনহাতে, অভিভাৱকৰ অনুমতি নোহোৱা আন একাংশ ছাত্ৰ-ছাত্ৰীয়ে স্কুলত গৈও পুনৰ ঘৰ অভিমুখে উভতি আহে ।
গড়মূৰ পীতাম্বৰ দেৱ উচ্চ মাধ্যমিক বিদ্যালয়ত ক’ভিডৰ কেন্দ্ৰৰ ব্যৱস্থা কৰাত বন্ধ থাকে আৰু বৰবিল উচ্চ মাধ্যমিক বিদ্যালয়ত সময়মতে চেনিটাইজ নকৰাৰ ফলত ওভতাই পঠিওৱা হয় ছাত্ৰ-ছাত্ৰীক । বহু অভিভাৱকে ছাত্ৰ-ছাত্ৰীক বিদ্যালয়লৈ পঠিয়াবলৈ শংকা কৰাত কে’বাখনো বিদ্যালয়ত উপস্থিতি হয় শূণ্য । সামগ্ৰিকভাৱে আজি মাজুলীত উপস্থিতিৰ হাৰ সেৰেঙা ।
আজি হাতত পৰা তথ্য অনুসৰি আউনীআটি উচ্চ মাধ্যমিক বিদ্যালয়ত ৫০%, চামগুৰি সত্ৰ ৰাৱনাপাৰ উচ্চতৰ মাধ্যমিকত ৪০%, মাজুলী আউনীআটী হেমচন্দ্ৰ উচ্চতৰ মাধ্যমিক বিদ্যালয়ত ৫ জন, কমলাবাৰী উচ্চ মাধ্যমিক বালিকা বিদ্যালয়ত ৪ জন, কৰতিপাৰ উচ্চ মাধ্যমিক বিদ্যালয়ত ২৮ জন, বেঙেনাআটী ৰমাকান্ত দেৱ উচ্চ মাধ্যমিক বিদ্যালয়ত ৮ জন, ভকতি দুৱাৰ উচ্চ মাধ্যমিক বিদ্যালয়ত ১২ জন, মধ্যমাজুলি জনজাতি উচ্চ মাধ্যমিক বিদ্যালয়ত ২ জন, ত্ৰিবেণী উচ্চ মাধ্যমিক বিদ্যালয়ত ৫ জন , কাঠনিআটী বালিচাপৰি উচ্চ মাধ্যমিক বিদ্যালয়ত ১৫ জন, আহতগুৰি হাইস্কুলত ৮ জন, শালমৰা হাইস্কুলত ৯ জন উপস্থিত থাকে বিদ্যালয়ত ।
ইপিনে, মাজুলীৰ উজনিৰ নয়াবজাৰ ফুলনি অঞ্চলত ক’ভিড-১৯ সংক্ৰমণ দ্ৰুতগতিত বৃদ্ধি হোৱাৰ বাবে বহু অভিভাৱকে ছাত্ৰ-ছাত্ৰীক বিদ্যালয়লৈ পঠিয়াবলৈ ৰাজি নহয় ।
