আৰক্ষীৰ উপ পৰিদৰ্শকৰ পদত নিযুক্তিৰ বাবে আয়োজিত পৰীক্ষাৰ প্ৰশ্নকাকত ফাদিলৰ ঘটনাত জড়িত আছে বহু ৰথী মহাৰথী ৷দালাল চক্ৰৰ প্ৰত্যক্ষ সহযোগত দীৰ্ঘদিন ধৰি অতি পৰিকল্পিতভাৱে এই প্ৰভাৱশালী চক্ৰটোৱে ৰাজ্য চৰকাৰৰ বিভিন্ন বিভাগত নিযুক্তিৰ নামত অসম আৰক্ষী নিযুক্তি ব’ৰ্ডত অব্যাহত ৰাখিছে ছিণ্ডিকেটৰাজ ।
জেৰাত এই কথা স্বীকাৰ কৰে প্ৰশ্নকাকত ফাদিলৰ গোচৰত গ্ৰেপ্তাৰ হোৱা প্ৰাক্তন ডি আই জি প্ৰশান্ত কুমাৰ দ্তই। চি আই ডিৰ সূত্ৰই এই কথা সদৰী কৰি জনোৱা মতে আৰক্ষী উপ পৰিদৰ্শক পদৰ নিযুক্তিৰ নামতেই নহয়,ৰাজ্য চৰকাৰৰ বিভিন্ন বিভাগত ইতিপূৰ্বে সম্পন্ন হোৱা নিযুক্তিৰ ক্ষেত্ৰতো এই প্ৰভাৱশালী চক্ৰটোৱে অনিয়ম সংঘটিত কৰি আহিছে ৷
বৃহৎ পৰিমাণৰ উৎকোচৰ বিনিময়ত বিভিন্ন বিভাগত নিযুক্তিৰ নামত ছিণ্ডিকেটৰাজ অব্যাহত ৰখা চক্ৰটোত বিভিন্ন পৰ্যায়ৰ লোক সম্পূৰ্ণ শৃংখল পদ্ধতিৰে সংযুক্ত হৈ থকাৰ কথাও ধৃত দত্তই উল্লেখ কৰে।
কেচুঁ খান্দোতে সাপ ওলোৱাৰ উপক্ৰম হৈছে প্ৰশ্ন কাকত ফাদিলৰ ঘটনাত ৷উপ পৰিদৰ্শক পদৰ প্ৰশ্নকাকত ফাদিল কৰা চক্ৰটোৱে ইতিপূৰ্বে বিভিন্ন বিভাগত নিযুক্তি সম্পৰ্কীয় বাছনি পৰীক্ষাৰ প্ৰশ্নকাকত ফাদিলেৰে প্ৰত্যক্ষভাৱে জড়িত ৷
উক্ত সময়ছোৱাত সংশ্লিষ্ট প্ৰশ্নকাকত ফাদিলক লৈ হৈ চৈৰ সৃষ্টি হৈছিল ,যদিও প্ৰভাৱশালী চক্ৰৰ প্ৰচণ্ড হেঁচাত সমগ্ৰ বিতৰ্ক তল পৰে ৷ইয়াৰ সুযোগতে এই প্ৰভাৱশালী চক্ৰটোৱে আৰক্ষীৰ উপ পৰিদৰ্শক পদৰ প্ৰশ্ন কাকত ফাদিলৰ বাবে পূৰ্বৰ দৰে পৰিকল্পনা যুগুত কৰে ৷
এই পৰিকল্পনাত আৰক্ষীৰ উপ পৰিদৰ্শক পদৰ লিখিত পৰীক্ষা অনুষ্ঠিত কৰাৰ বাবে উপ ঠিকা আবন্টন লাভ কৰা মেচাৰ্ছ অক্ষয় টেলি কমিউনিকেছন প্ৰাইভেট লিমিটেড,মোচাৰ্ছ এমেইটেক কনছালটেণ্টছ প্ৰাইভেট লিমিটেডৰ বিষয়ববীয়া,বিভিন্ন স্থানত কৰ্মৰত আৰক্ষী কনিষ্টবল,শীৰ্ষ পৰ্যায়ৰ আৰক্ষীৰ পৰা আৰম্ভ কৰি ৰাজনৈতিক তথা সংশ্লিষ্টসকলে প্ৰাৰ্থী যোগাৰৰ বাবে প্ৰান্তে প্ৰান্তে নিয়োগ কৰা এজেন্ট জড়িত আছে।
অৱশ্যে সংশ্লিষ্টসকলেৰে চিনা পৰিচয় নাথাকিলেও কেইউজনেই একেডাল শৃংখলতে সংযুক্ত হৈ থকাৰ কথাও প্ৰাক্তন ডি আই জিজনে জেৰাত স্বীকাৰ কৰা বুলি সূত্ৰটোৱে জনায়।
প্ৰশ্নকাকত ফাদিল কৰা চক্ৰটোৰ অন্যতম অভিযুক্ত বিজেপি নেতা দ্বিবন ডেকা,মেচাৰ্ছ অক্ষয় টেলি কমিউনিকেছনৰ অন্যতম অংশীদাৰ ৰুবুল হাজৰিকা,সঞ্চালক গৌতম মেচ৷
সহযোগী সৰোজ শৰ্মাৰে প্ৰত্যক্ষ সহযোগত থকাৰ কথা ধৃত দত্তই স্বীকাৰ কৰিছে। এই সমগ্ৰ প্ৰক্ৰিয়াত সহযোগৰ আঁৰত। সহজলভ্য ধনৰ লালসা থকাৰ কথাও ধৃত দত্তই স্বীকাৰ কৰিছে।
আৰক্ষীৰ উপ পৰিদৰ্শক পদৰ প্ৰশ্নকাকত ফাদিলৰ ঘটনাত জড়িত ৰথী মহাৰথী গ্ৰেপ্তাৰৰ পূৰ্বে পৰ্যাপ্ত তথ্য আহৰণৰ নিৰ্দেশ দিছে ৰাজ্য চৰকাৰৰ গৃহ বিভাগে ৷
বিশেষকৈ এই ঘটনাত জড়িত কোনো এজন আৰক্ষীয়ে যাতে সাৰি নাযায় নিশ্চিত কৰিবলৈ তদন্তকাৰী সংস্থাটোক নিৰ্দেশ দিয়া বুলি সূত্ৰটোৱে জনায়। সংশ্লিষ্ট গোচৰত জড়িত ৰথী মহাৰথীৰ কাষ চপাৰ পূৰ্বে বিভিন্ন শ্ৰেণীত কৰ্মৰত দালাল,আৰক্ষী বিষয়া আৰু কনিষ্টবলক গ্ৰেপ্তাৰৰ বাবে ৰণনীতি যুগুত কৰিছে চি আই ডিয়ে।
প্ৰাৰম্ভিক পৰ্যায়ত ৰাজ্যৰ দুই জিলাত কৰ্মৰত দুজন অতিৰিক্ত আৰক্ষী অধীক্ষক পৰ্যায়ৰ বিষয়া গ্ৰেপ্তাৰ হোৱাৰ পূৰ্ণ সম্ভাৱনা আছে বুলি জনায় সূত্ৰটোৱে ৷
প্ৰশ্নকাকত ফাদিলৰ ঘটনাত প্ৰাক্তন ডি আই জি পি কে দত্তৰ নাম সাঙোৰ খোৱাৰ পাছত বৰাকত কৰ্মৰত অতিৰিক্ত আৰক্ষী অধীক্ষক পৰ্যায়ৰ বিষয়াই যোৱা ২২ ছেপ্টেম্বৰত অসুস্থতাৰ বাবে দুদিনৰ বাবে ছুটী লয়,কিন্তু সংশ্লিষ্ট আৰক্ষী বিষয়াজনে এই পৰ্যন্ত অকৰ্তৃত্বশীলভাৱে কৰ্তব্যত যোগদান কৰা নাই বুলি সূত্ৰটোৱে জনায়।
লগতে বিজেপি নেতা ডেকাক আত্মসমৰ্পণ কৰোৱাৰ ক্ষেত্ৰত অন্যতম ভূমিকা গ্ৰহণ কৰা পশ্চিম অসমৰ আন এখন জিলাত কৰ্মৰত আন অতিৰিক্ত আৰক্ষী অধীক্ষক পৰ্যায়ৰ বিষয়াৰে নামো দত্তই জেৰাৰ সময়ত উল্লেখ কৰা বুলি সূত্ৰটোৱে জনায় ।
