বিটিচি নিৰ্বাচনৰ আনুষ্ঠানিক ঘোষণা হোৱা নাই যদিও বাক্সা জিলাত বিটিচি নিৰ্বাচনৰ বাবে বিভিন্ন দল সংগঠনে নিৰ্বাচনী প্ৰচাৰ তীব্ৰতৰ কৰি তোলা পৰিলক্ষিত হৈছে । ২২ নং ককলাবাৰী পৰিষদীয় সমষ্টিৰ জালাহ এলেকাত আজি গণ সুৰক্ষা পাৰ্টি, অবড়ো সুৰক্ষা সমিতি আৰু অবড়ো যুৱ মঞ্চৰ উদ্যোগত এক চাইকেল ৰেলী উলিয়াই নিৰ্বাচনী প্ৰচাৰ চলায় ।
ককলাবাৰী পৰিষদীয় সমষ্টিৰ অবড়ো সুৰক্ষা সমিতি আৰু গণ সুৰক্ষা পাৰ্টিৰ সমৰ্থিত প্ৰাৰ্থী মৃদুল দাসে চাইকেল ৰেলীটো উদ্বোধন কৰি নিজে চাইকেল চলাই ৰেলীত অংশগ্ৰহণ কৰে ।
ৰেলীটো উদ্বোধন কৰি গণ সুৰক্ষা পাৰ্টিৰ প্ৰাৰ্থী মৃদুল দাসে ককলাবাৰী পৰিষদীয় সমষ্টিৰ লগতে সমগ্র বিটিএডিত ২৫ ৰ পৰা ৩০ খন আসন লাভ কৰি পৰিষদ গঠন কৰিব বুলি মন্তব্য কৰে ৷ প্ৰমোদ বড়োৱে ককলাবাৰী পৰিষদীয় সমষ্টিত পৰাজয় লাভ কৰিব বুলিও কয় জিএছপিৰ প্ৰাৰ্থী মৃদুল দাসে ৷
জিএছপিৰ এই চাইকেল ৰেলীটো আজি জালাহস্থিত অবড়ো সুৰক্ষা সমিতিৰ কাৰ্যালয়ৰ পৰা আৰম্ভ কৰি আলিগুৰি, কদমগুৰি, বিলপাৰ, জালাহ গাঁও হৈ খাগ্ৰাবাৰী, ঠুকুৰীয়া চুপা, নাওশালীলৈকে ৰাওনা হয় ৷
