তুলনামূলকভাৱে মহিলা ভোটাৰৰ সংখ্যা সামান্য বৃদ্ধি আৰু যুৱ ভোটাৰৰ দপ্দপনিৰে আগন্তুক বৰ্ষত অসমত অনুষ্ঠিত হ’বলগীয়া বিধানসভা নিৰ্বাচনৰ বাবে আজি নিৰ্বাচন আয়োগে ফটোযুক্ত খচৰা ভোটাৰ তালিকা প্ৰকাশ কৰে । শেহতীয়া চূড়ান্তৰ ভোটাৰ তালিকাতকৈ এইবাৰৰ খচৰাৰ তালিকাত নাম অন্তৰ্ভুক্ত হোৱা নতুন ভোটাৰৰ সংখ্যা ৭৬,০২০ গৰাকী ।
উল্লেখ্য যে খচৰাত অন্তৰ্ভুক্ত ভোটাৰৰ সংখ্যা ২,২৪,৩৯,৫২২ গৰাকী । ইয়াৰ বিপৰীতে যোৱা ফেব্ৰুৱাৰীত প্ৰকাশিত চূড়ান্ত তালিকা অনুসৰি ৰাজ্যৰ বৰ্তমান ভোটাৰৰ সংখ্যা ২,২৩,৬৩,৫০২ জন । খচৰা তালিকা অনুসৰি ৰাজ্যত পুৰুষ ভোটাৰ হ’ল ১,১৪,২৫,৭৪৮ জন আৰু মহিলা হ’ল ১,১০,১৩,৭৭৪ গৰাকী । ইয়াৰ ভিত্তিত পুৰুষ ভোটাৰৰ ক্ষেত্ৰত বৰ্তমানৰ লগত খচৰাৰ পাৰ্থক্য হ’ল ৩০,৭৭৬ জন আৰু মহিলাৰ ক্ষেত্ৰত পাৰ্থক্য হ’ল ৪৫,২৪৪ গৰাকী ।
ইপিনে খচৰা অনুসৰি ৰাজ্যত আগন্তুক নিৰ্বাচনত যুৱ ভোটাৰৰ দপ্দপনি চলিব । কাৰণ ২০-২৯ বছৰ বয়সলৈ সৰ্বাধিক ভোটাৰ আছে । সেই সংখ্যা হ’ল ৬০,৬৪,৬৭৮ জন । ইয়াৰে পুৰুষ ভোটাৰ হ’ল ৩০,৮৯,৮৫৬ জন আৰু মহিলা ভোটাৰ হ’ল ২৯,৭৪,৮২২ গৰাকী । ইয়াৰ পাছতে ৫৬,৫৬,৭২৪ জন ভোটাৰ হ’ল ৩০ৰ পৰা ৩৯ বছৰ বয়সলৈ । তেওঁলোকৰ ২৮,৪২,৫৯৮ জন পুৰুষ আৰু ২৪,১৪,১২৬ গৰাকী মহিলা ।
নিৰ্বাচন বিভাগে সদৰী কৰা অনুসৰি ৰাজ্যত এইবাৰ নতুন ভোটাৰৰ সংখ্যা হ’ল ১,১৭,০৫১ জন । ১৮-১৯ বছৰ বয়সৰ ভিতৰৰ এইসকল ভোটাৰৰ ৫৯,১৮৫ জন পুৰুষ আৰু ৪৭,৮৬৬ গৰাকী মহিলা । ইয়াৰ উপৰি ৪০-৪৯ বছৰ বয়সলৈ ৪৫,৩৬,০২০ জন । ৫০-৫৯ বছৰ বয়সলৈ ৭,৮৩,১৬৯ জন আৰু ৮০ৰ পৰা ঊৰ্ধ্বলৈ ৩,১৫,০২৩ জন ভোটাৰৰ নাম খচৰাত অন্তৰ্ভুক্ত হৈছে । নিৰ্বাচন আয়োগে লগতে সদৰী কৰে যে আগন্তুক নিৰ্বাচনত থাকিবলগীয়া ভোট কেন্দ্ৰৰ সংখ্যা হ’ল ২৮,২০৫ টা ।
আনহাতে এইবাৰৰ ভোটাৰৰ বৃদ্ধিৰ হাৰ হ’ল ০.১৪ শতাংশ । নিৰ্বাচন আয়োগে গণতান্ত্ৰিক ব্যৱস্থাতো শক্তিশালী কৰাৰ স্বাৰ্থত ভোটাৰৰ বাবে যোগ্য হৈও বিভিন্ন কাৰণত বাদপৰা লোকসকলৰ নাম উপযুক্তাৰ ভিত্তিত ভোটাৰ তালিকাত অন্তৰ্ভুক্ত কৰাৰ অভিযান চলাবলৈ সকলো জিলাৰ উপায়ুক্তক নিৰ্দেশ দিছে । তাৰ ভিত্তিত যোৱা ১৬ নৱেম্বৰৰ পৰা সকলো জিলাত সজাগতা অভিযান চলিব । তাৰ মাজতে আজি খচৰা ভোটাৰ তালিকা আয়োগে প্ৰকাশ কৰে । ইপিনে আজিৰ পৰা অহা ১৫ ডিচেম্বৰলৈ খচৰাৰ ভিত্তিত ৰাইজৰ দাবী আৰু আপত্তি প্ৰকাশ কৰা হ’ব । চূড়ান্ত ভোটাৰ তালিকা প্ৰকাশ পাব আগন্তুক বৰ্ষৰ ১৫ জানুৱাৰীত ।
খচৰা অনুসৰি সৰ্বাধিক ১৪,২৪,২৮২ জন ভোটাৰ থকা জিলাখন হ’ল নগাঁও । আনহাতে আটাইতকৈ কম ১,২৮,৮৬৮ জন ভোটাৰ থকা জিলাখন মাজুলী । উল্লেখ্য যে জিলাখনত এটাই বিধানসভা সমষ্টি আছে ।