২১ নং শালবাৰী সমষ্টিৰ অনাবড়ো সমৰ্থিত গণ সুৰক্ষা পাৰ্টিৰ প্ৰাৰ্থী চক্ৰধৰ দাসৰ হৈ আজি সমষ্টিটোত এক বৃহৎ বাইক ৰেলী উলিওৱা হয় ৷ আনন্দ বজাৰৰ পৰা আৰম্ভ হোৱা বাইক ৰেলীটোৱে সমষ্টিটোৰ সৰ্বদিশ পৰিভ্ৰমণ কৰে ৷ৰেলী উদ্বোধন কৰাৰ প্ৰাক মুহূৰ্তত সাংসদ নৱ কুমাৰ শৰণীয়াই সংবাদমাধ্যমৰ আগত কয়-“আমাৰ হাতত অস্ত্ৰ শস্ত্ৰ নাথাকিলেও খালী হাতেৰে হ’লেও যুঁজিম ৷সব পাৰ্টিৰেই টাৰ্গেট গণ সুৰক্ষা পাৰ্টি৷বিটিচিত এতিয়াও হাজাৰতকৈ বেছি অবৈধ অস্ত্ৰ আছে ৷
আমি ৰাজনৈতিক ক্ষমতা ল’ব পাৰিলে বিটিএডিত অস্ত্ৰৰ খেলা বন্ধ কৰিব পাৰিম ৷ আমাৰ বিৰোধী সকলৰ বাবেহে আমি সন্ত্ৰাসবাদী,উগ্ৰপন্থী৷কিন্তু আমাৰ মুক্তিকামী জনসাধাৰণৰ বাবে আমি পৰিয়ালৰ এজন বা ৰক্ষাকাৰী৷” শৰণীয়াই কয়-“আমি যি ভাল কৰিলেও এচামে ভাল বুলি নকয় ৷ আজিৰ দিনত সকলোৱে গম পাইছে যে এইবাৰ গণ সুৰক্ষা পাৰ্টিয়ে বিটিচিত চৰকাৰ গঠন কৰিব ৷ অনাবড়ো মানুহে কোনো ধৰণৰ ভয় কৰাৰ কথা নাই ৷ এই খেল আমি আগতেও খেলি আহিছোঁ ৷
আমি যদি আমাৰ ভেঁটি সুৰক্ষিত কৰি ৰাখিব পাৰোঁ তেতিয়াহ’লে বিগত পাঁচটা দশক ধৰি ভয়,শংকা,সংঘৰ্ষৰ মাজত জীৱন অতাবাহিত কৰি অহা অনাবড়ো সকলে অনাগত দিনত ভাল দিন এটা উপহাৰ পাবলৈ সক্ষম হ’ব ৷ এনডিএফবি সকলে যদিও মাত্ৰ ১৪৯ টা অস্ত্ৰ চৰকাৰক জমা দিছিল কিন্তু তেওঁলোকৰ কেডাৰ দেৰ হাজাৰতকৈও অধিক থকাত এইটো সন্দেহ হয় যে বিটিএডিত বৰ্তমানো অবৈধ অস্ত্ৰ মজুত আছে৷বিটিএডিত এনেকুৱাও বহু লোক আছে যি গঁড় হত্যাত জড়িত,হত্যা,অপহৰণ আদিত জড়িত ৷ এইলোক সকলৰ হাততো অবৈধ অস্ত্ৰ মজুত থকাৰ সন্দেহ আছে৷” উল্লেখ্য যে আজি গণ সুৰক্ষা পাৰ্টিৰ উপৰিও সমষ্টিটোত বিপিএফৰ প্ৰাৰ্থী জয় মুছাহাৰীয়েও বৃহৎ সংখ্যক কৰ্মী সমৰ্থকক লগত লৈ বাইক ৰেলী কাৰ্যসূচী হাতত লয় ৷