পাকিস্তানৰ চোৰাংচোৱা সংস্থা আইএছআইৰ পৰিকল্পনাত ভাৰতলৈ চোৰাংকৈ সৰবৰাহ হৈ আছে নিষিদ্ধ মাদক দ্রব্য। চোৰাং সৰবৰাহকাৰীক এই ক্ষেত্ৰত চীনেও সহায় কৰাৰ অভিযােগ উঠিছে। শ্রীলংকাৰ উপকূলৰ পৰা সিংঘলী উপকূলৰক্ষীয়ে কালি চোৰাং সৰবৰাহকাৰীৰ এটা চক্রক আটক কৰাৰ পাছতে এই ভয়াৱহ তথ্য পােহৰলৈ আহে। চোৰাং সৰবৰাহকাৰীৰ জিম্মাৰ পৰা ২১ হেজাৰ কোটি টকা মূল্যৰ মাদক দ্রব্য জব্দ কৰা হৈছে।উল্লেখ্য যে কিছুদিন পূর্বে ভাৰতীয় উপকূলৰক্ষীয়ে তামিলনাডুৰ উপকূলৰ পৰা এশ কেজি হেৰ’ইন সহ শ্রীলংকাৰ ছজন নাগৰিকক গ্রেপ্তাৰ কৰিছিল।
তেতিয়াই প্রকাশ পাইছিল যে আইএছআইৰ পৰিকল্পনাত পাকিস্তান আৰু শ্ৰীলংকাৰ চোৰাং সৰবৰাহকাৰীয়ে সমুদ্রপথেৰে ভাৰত তথা অন্যান্য দেশলৈ মাদক দ্রব্য সৰবৰাহ কৰি আছে। কালি চাৰিজন চোৰাং সৰবৰাহকাৰীক গ্রেপ্তাৰ কৰাৰ পাছত শ্রীলংকাৰ উপকুলীয়েও ইয়াৰ প্রমাণ পালে। স্থানীয় সূত্রই জনােৱা মতে,দেওবাৰে নির্দিষ্ট সূত্ৰৰ ভিত্তিত শ্রীলংকাৰ মাৱিলা থােড়ুৱাৱা বন্দৰৰ সমীপত এখন নাও আটক কৰে আবকাৰী দপ্তৰৰ এটা দলে। নাওখনত তালাচী চলাই এশ কেজি হেৰ’ইন আৰু এশ কেজি মেথামফেটামাইন আইচ জব্দ কৰে। এই মাদক দ্রব্যসমূহৰ আনুমানিক বজাৰ মূল্য প্রায় ২১ হেজাৰ কোটি টকা।
অভিযানকাৰীদলে নাওখনত থকা চাৰিজন লােকক গ্রেপ্তাৰ কৰে। ইপিনে, শ্রীলংকা প্রশাসনৰ এক সূত্রই জনাইছে যে উক্ত মাদক দ্রব্য পাকিস্তানৰ ধােও অঞ্চলৰ পৰা চীন নিয়ন্ত্রিত গােৱাদাৰ বন্দৰ হৈ শ্রীলংকাৰ মাৰাৱিলা থােড়ুৱাৱা বন্দৰলৈ অনা হৈছিল। ধৃকসকলে জেৰাত স্বীকাৰ কৰা মতে, চীনৰ সহযােগত আৰু পাক গুপ্তচৰ সংস্থা আইএছআইৰ পৰিকল্পনা অনুসৰিয়ে এই চোৰাং সৰবৰাহ অব্যাহত আছিল। এই চোৰাং সৰবৰাহৰ অন্তৰালত ডুবাইত আত্মগােপন কৰি থকা কুখ্যাত মাদক সৰবৰাহকাৰী জুদেৰ গেং আছে বুলি সন্দেহ কৰা হৈছে।
প্রধানকৈ মালদ্বীপ আৰু শ্ৰীলংকাৰ মাজত থকা সমুদ্রপথ ব্যৱহাৰ কৰিয়েই মাদক সৰবৰাহ অব্যাহত আছে বুলিয়ে তদন্তকাৰী দলে তথ্য লাভ কৰিছে। উল্লেখ্য যে কিছুদিনৰ পূর্বে তামিলনাডুৰ দক্ষিণ উপকূল থুথুকড়িৰ সমীপত জব্দ কৰা এখন নাৱৰ পৰা ৯৯টা পেকেটত প্রায় এশ কেজি হেৰ’ইন উদ্ধাৰ হৈছিল।সমান্তৰালকৈ ২০টা সৰু বাকচত ছিন্থেটিক ড্রাগছ পােৱা গৈছিল। উক্ত অভিযানত গ্রেপ্তাৰ হােৱা ছজন চোৰাং সৰবৰাহকাৰীৰ পৰা পাঁচটা নাইন এমএম পিষ্টলাে জব্দ কৰা হৈছিল।