ব্ৰিটেইনত প্ৰৱেশ কৰিব নোৱাৰাৰ বাবেই ঠেহ পাতি সুদীৰ্ঘ ১৮ বছৰ ধৰি এটা বিমানকোঠতে বাস কৰিছিল এজন মানুহে । সেই লোকজনেই এতিয়া সমগ্ৰ ফ্ৰান্সতে পৰিচিত হৈ পৰিছে । লোকজনৰ নাম মেহৰান কৰিমি নাছেৰী, যি অধিক পৰিচিত ছাৰ আলফ্ৰেড মেহৰান নামেৰে । ইয়াৰ উপৰি তেওঁৰ আন এক পৰিচিত নাম হৈছে ‘দ্য টাৰ্মিনেল মেন’ । কিয়নো জীৱনৰ ১৮ টা বছৰ তেওঁ বিমানকোঠতে কটাইছিল ।
১৯৮৮ৰ ২৬ আগষ্টৰ পৰা ২০০৬ৰ জুলাই পৰ্যন্ত ফ্ৰান্সৰ শ্বাৰ্লে ডি গৌলে বিমানকোঠৰ বিষয়া-কৰ্মীসকলেই আছিল তেওঁৰ পৰিয়াল, বন্ধু-বান্ধৱ । থকা, খোৱা, পঢ়া-শুনা সকলোবোৰেই চলিছিল এই বিমানকোঠত । মেহৰানক আন ঠাইলৈ আঁতৰাই নিয়াৰ বাবে আনকি আদালতত মামলাও চলিছিল । কিন্তু ২০০৬ৰ জুলাইত অসুস্থ হৈ হাস্পতালত ভৰ্তি নোহোৱা পৰ্যন্ত কোনেও তেওঁক বিমানকোঠৰ আনলৈ আঁতৰাই নিবলৈ সক্ষম হোৱা নাছিল ।
মেহৰানৰ জন্ম ইৰানত । পিতৃ আছিল ইৰানৰ এংল’-পাৰ্ছিয়ান তেল কোম্পানীৰ চিকিৎসক । মাতৃৰ জন্ম যদিও তেঁৱো উক্ত কোম্পানীত নাৰ্ছ আছিল । ১৯৭৩ত ইউনিভাৰছিটি অৱ ব্ৰেডফ’ৰ্ডৰ পৰা এটা তিনি বছৰীয়া পাঠ্যক্ৰম সম্পূৰ্ণ কৰাৰ বাবে মেহৰান ব্ৰিটেইনলৈ আহে । নিৰ্দিষ্ট সময়ত তেওঁ ইৰানলৈ উভতি যায় ।
১৯৭৭ত মেহৰানে দাবী কৰে যে ইৰানৰ অন্তিম ৰজা মহম্মদ ৰেজা শ্বাহৰ বিৰুদ্ধে সৰৱ হোৱাৰ বাবে তেওঁক ইৰানৰ পৰা বহিষ্কাৰ কৰা হয় । ইয়াৰ পাছত মেহৰানে একাধিক দেশৰ নাগৰিকত্ব বিচাৰি আবেদন জনাইছিল যদিও সেই আবেদন গ্ৰাহ্য হোৱা নাছিল ।
বেলজিয়ামৰ ‘ইউনাইটেড নেচনছ্ হাই কমিচনাৰ ফৰ ৰিফিউজি’ নামৰ সংস্থাটোৱে তেওঁক শৰণাৰ্থী আখ্যা দিয়ে । যদিও ইৰানৰ পৰা বাহিৰ কৰি দিয়া বুলি মেহৰানে কৰা দাবীৰ সত্যতাক লৈ প্ৰশ্ন উত্থাপন হৈছিল ।
অৱশ্যে শৰণাৰ্থী আখ্যা পোৱাত তেওঁ ইউৰোপৰ কিছু সংখ্যক দেশত প্ৰৱেশৰ অনুমতি লাভ কৰে । মেহৰানে জীৱনৰ বাকি কালছোৱা ব্ৰিটেইনত কটাব বিচাৰিছিল । ১৯৮৮ত লণ্ডনলৈ যোৱাৰ বাবে তেওঁৰ ফ্ৰান্সৰ পৰা বিমানত উঠে । লণ্ডনৰ অৱতৰণৰ পাছত প্ৰবাসন বিষয়াক পাছপ’ৰ্ট দেখুওৱাব নোৱাৰিলে মেহৰানে । ফলত বিমানকোঠৰ পৰাই তেওঁক ফ্ৰান্সলৈ ঘূৰাই পঠোৱা হয় । ফ্ৰান্সৰ শ্বাৰ্লে ডি গৌল বিমানকোঠত তেওঁক গ্ৰেপ্তাৰ কৰা হয় ।
মেহৰানে দাবী কৰিছিল যে লণ্ডনৰ বিমানত উঠাৰ সময়তে তেওঁৰ বেগ চুৰি হৈছিল । সেই বেগতে আছিল পাছপ’ৰ্টসহ যাৱতীয় জৰুৰী নথি-পত্ৰ । ফৰাচী আৰক্ষীয়ে মেহৰানক গ্ৰেপ্তাৰ কৰিলেও অৱশেষত তেওঁক মুকলি কৰি দিয়ে । কাৰণ লণ্ডনলৈ যোৱাৰ বাবে ফ্ৰান্সৰ বিমানকোঠৰ পৰা বিমানত উঠাৰ সময়ত তেওঁ নিজৰ নথি-পত্ৰ দেখুৱাইছিল । সেই তথ্যৰ ভিত্তিতেই তেওঁক মুকলি কৰি দিয়া হয় ।
আইনৰ দৃষ্টিত মেহৰান আছিল শৰণাৰ্থী । সেয়ে নিৰ্দিষ্ট কৰি কোনো দেশলৈ প্ৰেৰণ কৰাটো সম্ভৱ নাছিল । আনহাতে, মেহৰানে প্ৰৱল ইচ্ছা আছিল ব্ৰিটেইনলৈ যোৱা । সেয়াও সম্ভৱ নাছিল । তেতিয়াৰ পৰাই ফ্ৰান্সৰ সেই বিমানকোঠৰ এক নম্বৰ টাৰ্মিনেল হৈ উঠে মেহৰানৰ বাসগৃহ ।
মেহৰানক বিমানকোঠৰ পৰা আঁতৰোৱাৰ অনেক চেষ্টা চলাইছিল। আদালতত গোচৰো উঠিছিল । অৱশ্যে ১৯৯২ত ফ্ৰান্সৰ আদালতে স্পষ্ট কৰি দিয়ে যে মেহৰানে অবৈধ্যভাৱে বিমানকোঠত প্ৰৱেশ কৰা নাছিল । সেয়ে তেওঁক তাৰ পৰা আঁতৰ কৰিব পৰা নাযাব ।
উল্লেখ্য যে মেহৰান ব্ৰিটিছ নাগৰিক হ’ব বিচাৰিছিল । সেই বাবে নিজৰ নাম সলনি কৰি ৰাখিছিল ছাৰ আলফ্ৰেড মেহৰানে । সেয়ে পৰৱৰ্তী সময়ত বেলজিয়াম আৰু ফ্ৰান্সে মেহৰানক নাগৰিকত্ব দিয়াৰ ইচ্ছা প্ৰকাশ কৰিলেও তেওঁ সেই প্ৰস্তাৱ অগ্ৰাহ্য কৰিছিল । ২০০৬ত অসুস্থ হৈ মেহৰানে উক্ত বিমানকোঠৰ এক নম্বৰ টাৰ্মিনেল ত্যাগ কৰে । তেওঁক হাস্পতালত ভৰ্তি কৰোৱাৰ পাছতে তেওঁ থকা ঠাইখিনি বিমানকোঠ কৰ্তৃপক্ষই ভাঙি পেলায় ।
ইয়াৰ পাছত হাস্পতালৰ পৰাই ফ্ৰান্সৰ ৰেড ক্ৰছে তেওঁৰ দায়িত্ব লয় । হাস্পতালৰ পৰা মুক্তি পোৱাৰ পাছত তেওঁক কিছুদিন বিমানকোঠৰ কাষৰ এখন হোটেলত ৰখা হৈছিল । পাছত তেওঁক প্ৰবাসীসকলৰ এটা আশ্ৰয়গৃহলৈ নিয়া হয় ।
উল্লেখ্য যে সুদীৰ্ঘ ১৮ বছৰ ধৰি মেহৰানে বিমানকোঠৰ এক নম্বৰ টাৰ্মিনেলত পঢ়া-শুনা, ডায়েৰি লিখিয়েই অতিবাহিত কৰিছিল । বিমানকোঠৰ কৰ্মীসকলৰ পৰাই তেওঁ আহাৰ খাইছিল, তেওঁলোকৰ স’তে আড্ডা মাৰি সময় কটাইছিল । ২০০৪ত মেহৰানৰ আত্মজীৱনী ‘দ্য টাৰ্মিনেল মেন’ প্ৰকাশ পায় । তেওঁৰ জীৱনৰ ভিত্তিত ছবিও মুক্তি পাইছে । সেইদৰে তেওঁৰ আত্মজীৱনীৰ আলমত নিৰ্মাণ হৈছিল ‘লষ্ট ইন ট্ৰেনজিট’ নামৰ এখন ফৰাচী ছবি । লেখক-পৰিচালক এলেক্সি কুৰোচে তেওঁক লৈ এখন তথ্যচিত্ৰও নিৰ্মাণ কৰিছিল ।