অক্সফোৰ্ড আষ্ট্ৰাজেনেকাৰ প্ৰতিষেধক অতি শীঘ্ৰে ব্ৰাজিল প্ৰেৰণৰ বাবে প্ৰধানমন্ত্ৰী নৰেন্দ্ৰ মোদীক অনুৰোধ জনাই ব্ৰাজিলৰ ৰাষ্ট্ৰপতি জাইৰ বলচ’নাৰে । সেই মৰ্মে প্ৰধানমন্ত্ৰী মোদীক পত্ৰ প্ৰেৰণ কৰে ব্ৰাজিলৰ ৰাষ্ট্ৰপতিয়ে ।
ব্ৰাজিলত ক’ভিড ভেক্সিনেছন আৰম্ভ কৰিবৰ বাবে বলচ’নাৰৰ ওপৰত চাপ বৃদ্ধি পাইছে । সমালোচকসকলৰ দাবী, নিকটৱৰ্তী দেশসমূহৰ তুলনাত ভেক্সিনেছন সম্পৰ্কিত যাবতীয় কাৰ্যসূচীত বহুত পিছ পৰি আছে ব্ৰাজিল । এই সন্দৰ্ভত বলচ’নাৰ কিমান সক্ৰিয় তাক লৈও প্ৰশ্ন উত্থাপন হৈছে ।
প্ৰধানমন্ত্ৰী মোদীলৈ প্ৰেৰণ কৰা পত্ৰত বলচ’নাৰে লিখে, ‘ভেক্সিনেছন কাৰ্যসূচী অবিলম্বে কাৰ্যকৰী কৰিবলৈ জৰুৰী প্ৰয়োগৰ বাবে ব্ৰাজিলত ২০ লাখ টকাৰ প্ৰতিষেধক প্ৰেৰণ কৰিলে ভাল হয় । কিন্তু ইয়াৰ দ্বাৰা ভাৰতৰ ভেক্সিনেছন কাৰ্যসূচী যাতে কোনো কাৰণতে বিঘ্নিত নহয় সেইটোও জৰুৰী ।’
ব্ৰাজিলৰ ৰাষ্ট্ৰপতিৰ দৰেই ফিউক্ৰোজ বায়’মেডিকেল চেণ্টাৰো অক্সফোৰ্ড-আষ্ট্ৰাজেনেকাৰ প্ৰতিষেধক ক’ভিশ্বিল্ডৰ অপেক্ষাত আছে । ব্ৰাজিলত এই প্ৰতিষেধকৰ নিৰ্মাণ সম্পূৰ্ণ কৰিবৰ বাবে কিছুমান উপাদানৰ প্ৰয়োজন ।
সূত্ৰ অনুসৰি, চীনৰ পৰা ৰপ্তানি সংক্ৰান্ত লাইচেন্স নোপোৱাৰ বাবে উপাদানবোৰ ব্ৰাজিললৈ প্ৰেৰণ কৰা হোৱা নাই । সেয়েহে ভাৰতৰ পৰা ২০ লাখ প্ৰতিষেধকৰ অনুৰোধ জনাইছে ব্ৰাজিলে । চলিত মাহৰ মাজভাগত প্ৰতিষেধক ব্ৰাজিললৈ প্ৰেৰণ কৰাৰ সম্ভাৱনা আছে । জৰুৰী প্ৰয়োগৰ বাবে প্ৰতিষেধকৰ অনুমোদন পত্ৰ দিবৰ বাবে আবেদন কৰিছে ফিউক্ৰোজে ।