মানাহৰ বাথানত উৎপাদন কৰা হয় সৰভোগৰ দৈৰ গাখীৰ
ভোগালী বিহুলৈ মাজত মাথো এটা দিন ৷ ভোগালীক আদৰিবলৈ তৎপৰ হৈ পৰিছে ৰাজ্যবাসী ৷ ভোগালী বিহু বুলিলেই মনলৈ আহে সৰভোগৰ দৈৰ কথা ৷ সৰভোগৰ পৰাই অসমৰ বিভিন্ন প্ৰান্তলৈ সৰবৰাহ হয় উৎকৃষ্ট দৈসমূহ ৷ কিন্তু এই দৈৰ বাবে প্ৰয়োজনীয় উৎকৃষ্ট গাখীৰৰ উৎপাদন হয় ক’ত ?
মানাহ ৰাষ্ট্ৰীয় উদ্যানৰ দাঁতিকাষৰীয়া বাগছাৰ কাহিতামা, চু্ক্ৰুংবাৰী, ছামথায়বাৰী আদিত গৰু আৰু ম’হৰ বাথানত উৎপাদন হয় এই গাখীৰৰ ৷ ইয়াত উৎপাদিত বৃহৎ পৰিমানৰ গাখীৰ লৈ যোৱা হয় কাষৰীয়া সৰভোগলৈ ৷ তাতেই এই উৎকৃষ্ট গাখীৰৰ পৰা উৎপাদন কৰা হয় এঠাজাতীয় আৰু সোৱাদযুক্ত দৈৰ ৷
মানাহৰ এবিধ বিশেষ ঘাঁহৰ বাবেই এই অঞ্চলৰ গৰু-ম’হৰ গাখীৰ অতি উৎকৃষ্ট মানদণ্ডৰ হয় বুলি জানিবলৈ দিয়ে বাথানৰ গৰাকীয়ে ৷ কিন্তু এই ঘাঁহৰ পৰিমাণ কমি যোৱাৰ বাবে বৰ্তমান গাখীৰৰ উৎপাদন হ্ৰাস পোৱা বুলিও উল্লেখ কৰে বাথান এখনৰ গৰাকী লক্ষ্মন স্বৰ্গীয়াৰীয়ে ৷ তেওঁ জানিবলৈ দিয়ামতে বৰ্তমান পাঁচশৰ পৰা ছয়শ গৰু ম’হৰ বাথান আছে যদিও জনবসতি বৃদ্ধিৰ বাবে ক্ৰমান্বয়ে হ্ৰাস পাবলৈও ধৰিছে বাথানৰ সংখ্যা ৷
