বাগছাৰ বালিপূৰত মানাহৰ হাতীৰ জাকৰ তাণ্ডৱ

মানাহ ৰাষ্ট্ৰীয় উদ্যানৰ পৰা ওলাই অহা এটা বৃহৎ হাতীৰ জাকে বাগছা জিলাৰ শালবাৰীৰ বালিপুৰ গাঁৱত যোৱা নিশা মানুহৰ ঘৰ-দুৱাৰ ভাঙি, খেতি-পথাৰ অনিষ্ট কৰি তাণ্ডৱৰ সৃষ্টি কৰে ৷ নিশাৰ ভাগত প্ৰায় ২৫-৩০ জনীয়া হাতীৰ জাকটোৱে অঞ্চলটোত প্ৰৱেশ কৰি কৃষকৰ বিলাহী, জলকীয়া, বেঙেনা, কল গছ আদিৰ বিঘাই বিঘাই খেতি অনিষ্ট কৰে ৷

একেদৰে বৃহৎ হাতীৰ জাকটোৱে বালিপুৰ গাঁৱৰ বহু পৰিয়ালৰ বাসগৃহও ভাঙি চুৰমাৰ কৰে ৷ যোৱা তিনিদিন ধৰি অঞ্চলটোত হাতীৰ জাকে তাণ্ডৱ চলোৱাৰ পাছতো বনবিভাগে কোনো ধৰণৰ গুৰুত্ব নিদিয়াৰ অভিযোগ উত্থাপন কৰিছে ভুক্তভোগী ৰাইজে ৷

টকা ঋণত লৈ খেতি কৰি এতিয়া হাতীৰ তাণ্ডৱৰ বাবে মূৰে-কপালে হাত দিবলগীয়া হৈছে গাঁওখনৰ খেতিয়কসকল ৷ সংবাদ মাধ্যমৰ জৰিয়তে চৰকাৰক ক্ষতিপূৰণ আদায় দিবলৈও আবেদন জনাইছে দুৰ্ভগীয়া খেতিয়কসকলে ৷