Batadova Doul Yatra:
‘কাহালী মহৰী ঢাক ঢোল ভেবী/অসংখ্য বাদ্য বজাই।/কৃষ্ণৰ কীৰ্তন কৰিলা উৎসূকে/ফায়ু গুণ্ডি সিঞ্চি যায়।’ মহাপুৰুষ শ্রীমন্ত শংকৰদেৱে মাত্র ২১ বছৰ বয়সতে বটদ্রৱাত দৌল প্রতিষ্ঠা কৰি ‘এক দেৱ এক সেৱ, এক বিনে নাহি কেব’ বুলি একমাত্র কৃষ্ণৰ জয়গান গায়। গুৰু, দেউ, নাম, শুকত এই চাৰি বস্তু প্রকাশ কৰিলে বটদ্ৰৱাতেই। দৌল সাজি ফাকুৱা উৎসৱৰে তেওঁ কৃষ্ণৰ বন্দনাৰে একেশ্বৰবাদক অধিক দৃঢ়ভাবে প্রতিষ্ঠা কৰিছিল। মহাপুৰুষ শ্রীমন্ত শংকৰদেৱে আৰম্ভ কৰা বটদ্ৰৱা দৌল উৎসৱৰ পৰম্পৰাৰ ধাৰাবাহিকতা আজিও অব্যাহত আছে বটদ্ৰৱাত।
পূৰ্বৰ ধাৰাবাহিকতা অক্ষুণ্ণ ৰাখি এইবাৰো গুৰুজনাৰ পবিত্র জন্মস্থান বটদ্ৰৱাৰ শ্রীশ্রী বটদ্ররা থানত পাঁচদিনীয়াকৈ শ্রীকৃষ্ণব দৌলযাত্রা মহোৎসৱ সোমবাৰৰ পৰা আৰম্ভ হৈছে। কার্যসূচী অনুসৰি, পুৱা ৪-৩০ বজাত তাল কোবোৱা প্রসংগ আৰু মঞ্জিৰ নাম, আঠ বজাত আইসকলৰ নাম-প্ৰসংগ, খোল খায় প্রসংগ, নাম-প্রসংগ প্রসাদ বিতৰণ, ১১ বজাত চিত্রাংকন প্রতিযোগিতা, কুইজ প্রতিযোগিতা, ফাকুৱা গীত প্রতিযোগিতা, বিয়লি তিনি শূন্য পাঠ, বিয়লি প্রসংগ, বিয়লি চাৰি আইসকলৰ নাম-প্ৰসংগ, সন্ধিয়া প্রসংগ আৰু তাল কোবোবা প্রসংগ, গুণমালা আৰু ভটিমা প্রসংগ খোল প্রসংগ, নাম-প্রসংগ আদি কাৰ্যসূচীৰ পাছত গায়ন-বায়ন আৰু ভক্তসকলৰ দ্বাৰা গাই-বাই গোসাঁই (শ্রীকৃষ্ণৰ মূর্তি ভাগ) কীৰ্তনঘৰৰ পৰা উলিয়াই আনি স্নান কার্য সম্পাদন কৰি ৰভাঘৰত স্থাপন কৰা হয়। পাছত গায়ন-বায়নৰ ৰাম ধেমালি পৰিৱেশন কৰি গোসাঁইক গন্ধ তেলেৰে নোৱাই গন্ধ কার্য সম্পাদন কৰা হয়।
আনহাতে, মঙলবাৰে পুৱা তাল কোবোৱা প্ৰসংগ আৰু মঞ্জিৰা নাম, আইসকলৰ নাম, খোল প্রসংগ আৰু ভকতৰ নাম-প্রসংগ অনুষ্ঠিত হয় ৷ ইয়াৰ মাজতে মুখ্যমন্ত্ৰী ড:হিমন্ত বিশ্ব শৰ্মা উপস্থিত হয় শ্ৰী শ্ৰী বটদ্ৰৱা থানত ৷ চুৰিয়া- ধূতি পৰিহিত মুখ্যমন্ত্ৰী গৰাকীয়ে কীৰ্তন ঘৰত প্ৰৱেশ কৰি সিংহাসনৰ ওচৰত সেৱা লয় । ইয়াৰ পিছত তেখেতক থান কমিটিৰ তৰফৰ পৰা ফুলাম গামোচা আৰু শৰাইৰে আদৰণি জনোৱা হয় ৷ অনুষ্ঠানত আঁত ধৰে থান পৰিচালনা কমিটিৰ সম্পাদক লাচিত বৰদলৈয়ে । মুখ্যমন্ত্ৰীয়ে ইয়াৰ পিছতে থান চৌহদ আৰু বটদ্ৰৱাৰ আৱিৰ্ভাৱ ক্ষেত্ৰ পৰিভ্ৰমণ কৰে ৷ মুখ্যমন্ত্ৰীক সংগ দিয়ে নগাঁও-বটদ্ৰৱাৰ বিধায়ক ৰূপক শৰ্মা,বিধায়ক জিতু গোস্বামী আৰু শশীকান্ত দাস সহ বহু কেবা গৰাকী বিশিষ্ট ব্যক্তিয়ে।
বিয়লি কৃষ্ণ গোসাঁইৰ আগত গায়ন-বায়নৰ ন-ধেমালি গীত পৰিৱেশন, গোসাঁই সেৱা সম্পন্ন কৰি গোসাঁই মূৰত ফাকু দিয়া উৎসৱ। যাত্রীৰ সেৱাৰ সুবিধাৰ বাবে গোটেই নিশা গোঁসাইক ৰভাতলীয়া কৰি ৰখা হ’ব ৷
আনহাতে বিয়লি শূন্য পাঠ আৰু বিয়লি প্রসংগ, সন্ধিয়া প্রসংগ আৰু তাল কোবোৱা প্ৰসংগ, গুণমালা আৰু ভটিমা প্রসংগ, দুই সত্ৰৰ ভক্তসকলৰ পদূলিত এগছিকৈ বস্তি প্রজ্বলন, খোল প্রসংগ আৰু নাম-প্ৰসংগ, শ্রীশ্রী বটদ্ৰৱা থানৰ নাটঘৰ আৰু দৌল উৎসৱ মন্দিৰ প্ৰাংগণত বিভিন্ন স্থানৰ পৰা অহা নামতীসকলৰ দ্বাৰা নাম পৰিৱেশন, খেৰখুতি সাংস্কৃতিক মঞ্চত সত্রীয়া সাংস্কৃতিক অনুষ্ঠান, অংকীয়া নাট প্রদর্শন আদি কার্যসূচী ৰূপায়ণ কৰা হ’ব। শ্রীকৃষ দৌলযাত্রা মহোৎসৱ উপলক্ষে সোমবাৰে প্রথম দিনটোতে ৰাজ্যৰ বিভিন্ন প্ৰান্তৰ পৰা ভালে সংখ্যক ভক্তপ্রাণ ৰাইজ আহি বটদ্ৰৱা থানত উপস্থিত হৈ হৰি নামৰে মুখৰিত কৰি তোলে থান চৌহদ।
