কৰ’না সংক্ৰমণ বৃদ্ধি হোৱাক লৈ উদ্বেগ সৃষ্টি হোৱাৰ সময়তে আশাৰ কিৰণ দেখা গ’ল অৰুণাচল প্ৰদেশত । তিনিজন সক্ৰিয় ক’ভিড ৰোগী সুস্থ হোৱাৰ পাছতে ভাৰতৰ ভিতৰতে প্ৰথম কৰ’না মুক্ত ৰাজ্য হ’ল অৰুণাচল প্ৰদেশ ।
আজি স্বাস্থ্যমন্ত্ৰণালয়ে দিয়া তথ্য অনুসৰি, সম্প্ৰতি ৰাজ্যখনত কোনো সক্ৰিয় ক’ভিড ৰোগী নাই । সকলোৱে সুস্থ । সুস্থতাৰ হাৰ ৯৯.৬৬ শতাংশ । পজিটিভিটি তথা সংক্ৰমণৰ হাৰ শূণ্য । ৰাজ্যৰ পৰ্যৱেক্ষক বিষয়া লোবছাং জাম্পাই কয়, বিগত ২৪ ঘণ্টাত কোনো লোক নতুনকৈ সংক্ৰমিত হোৱা নাই ।
অৰুণাচল প্ৰদেশৰ মুঠ ১৬ হেজাৰ ৮৩৬ জন লোক কৰ’না আক্ৰান্ত হৈছিল । তেওঁলোকৰ ভিতৰত ১৬ হেজাৰ ৭৮০ জন লোক সুস্থ হৈছে । তিনিজন সক্ৰিয় ক’ভিড ৰোগী আছিল । আজি তেওঁলোকো সুস্থ হোৱাৰ পাছত ৰাজ্যখন কৰ’না মুক্ত হ’ল বুলি দাবী কৰে পৰ্যৱেক্ষক বিষয়াজনে ।
লোবছাং জাম্পাই কয়, মুঠ চাৰি লাখ পাঁচ হেজাৰ ৬৪৭ জন লোকৰ নমুনা পৰীক্ষণ কৰা হৈছিল । কালি ৩১২ জন লোকৰ নমুনা পৰীক্ষণ কৰা হৈছে । কাৰো ৰিপ’ৰ্ট পজিটিভ অহা নাই ।
তেওঁ লগতে কয় যে, ৰাজ্যত দ্ৰুত হাৰত টিকাকৰণৰ প্ৰক্ৰিয়াও আৰম্ভ হৈছে । সম্প্ৰতি ৩২ হেজাৰ ৩২৫ জন স্বাস্থ্যকৰ্মী আৰু আগশাৰীৰ যুদ্ধাসকলক প্ৰতিষেধক প্ৰদান কৰা হৈছে । সোমবাৰ, বৃহস্পতিবাৰ, শুকুৰবাৰ আৰু শনিবাৰ সপ্তাহৰ এই চাৰিটা দিনত টিকাকৰণ কাৰ্যসূচী ৰখা হৈছে ।
অৰুণাচল প্ৰদেশ কৰ’না মুক্ত হ’লেও দেশৰ বহুকেইখন ৰাজ্যত নতুনকৈ সংক্ৰমণ বৃদ্ধিত উদ্বেগৰ সৃষ্টি হৈছে । দেশৰ দৈনিক সংক্ৰমণ চাৰি দিনৰ মূৰে মূৰে ১৬ হেজাৰ অতিক্ৰম কৰে । মুঠ দৈনিক সংক্ৰমণৰ ভিতৰত ৮৬ শতাংশই মহাৰাষ্ট্ৰ, কেৰালা, পঞ্জাৱ, কৰ্ণাটক, তামিলনাডু আৰু গুজৰাটৰ । এই ৰাজ্যসমূহৰ ভিতৰত দৈনিক সংক্ৰমণৰ বিষয়ত মহাৰাষ্ট্ৰ আৰু কেৰালাত উদ্বেগ বৃদ্ধি পাইছে ।
সংক্ৰমণ ৰোধ কৰিবলৈ অমৰাৱতী, নাগপুৰসহ মহাৰাষ্ট্ৰৰ বহুকেইখন জিলাত ইতিমধ্যে তলাবন্ধ জাৰি কৰিছে প্ৰশাসনে । আঠ মাৰ্চলৈকে এই তলাবন্ধৰ ম্যাদ বৃদ্ধি কৰা হৈছে । কেৰালাতো কিছুসংখ্যক জিলাত কঠোৰ পদক্ষেপ গ্ৰহণ কৰিছে প্ৰশাসনে । কেৰালাত ভোট ঘোষণা হৈছে । এনে পৰিস্থিতিত সংক্ৰমণ নিয়ন্ত্ৰণ কৰি ভোট পৰিচালনা কৰা এক বৃহৎ প্ৰত্যাহ্বান হৈ পৰিছে ৰাজ্যৰ প্ৰশাসনৰ বাবে ।