আজি উচ্চতম ন্যায়ালয়ে অ’টিটি প্লেটফৰ্মত কি প্ৰদৰ্শন কৰা হ’ব তাৰ নিৰ্দেশাৱলী প্ৰকাশৰ নিৰ্দেশনা জাৰি কৰিলে । সমগ্ৰ বিষয়টোত কেন্দ্ৰীয় চৰকাৰৰ হস্তক্ষেপ প্ৰয়োজন বুলিও মন্তব্য কৰে উক্ত ন্যায়ালয়ে । সূত্ৰ অনুসৰি, পৰ্ন’গ্ৰাফীৰ দৰে চলচ্চিত্ৰও প্ৰদৰ্শন কৰা হয় এই মাধ্যমবোৰত । সেয়ে ইয়াৰ ওপৰত বিশেষ নিৰীক্ষণৰ প্ৰয়োজন ।
অ’টিটি প্লেটফৰ্মত কি প্ৰদৰ্শন কৰা হ’ব এই বিষয়ত উচ্চতম ন্যায়ালয়ৰ ন্যায়াধীশ অশোক ভূষণে কয়, ‘সম্প্ৰতি এনে ধৰণৰ মাধ্যমত চলচ্চিত্ৰ বা ছিৰিজ অতি পৰিচিত । কিন্তু ইয়াৰ ওপৰত নিৰীক্ষণ ৰখা প্ৰয়োজন । কাৰণ ইয়াত পৰ্ন’গ্ৰাফীও প্ৰদৰ্শন কৰা হয় ।’
এই ৱেব মাধ্যমৰ ওপৰত দৃষ্টি গোচৰ কৰিবৰ বাবে কেন্দ্ৰীয় চৰকাৰৰ ফালৰ পৰাও দীৰ্ঘদিন চেষ্টা চলাই আছে । এই বিষয়ত এটা কমিটি গঠনৰো পৰিকল্পনা কৰা হৈছে । অভিযোগ অনুসৰি, ক’ভিড পৰিস্থিতিৰ ফলত চলচ্চিত্ৰ গৃহসমূহ বন্ধ থকাৰ বাবে দীৰ্ঘদিন চলচ্চিত্ৰ প্ৰদৰ্শন কৰিব পৰা নাই, সেয়ে এই মাধ্যমবোৰে অবাধে চলচ্চিত্ৰ মুক্তি দিছে । চেনছ’ৰছিপৰ মৰ্যাদা নোহোৱাকৈ নানা ধৰণৰ চলচ্চিত্ৰ মুক্তি দিয়া হৈছে । সেয়ে এই মাধ্যমবোৰক নিয়ন্ত্ৰণত ৰাখিবৰ বাবে উঠিপৰি লাগিছে চৰকাৰ ।
