ক’ভেক্সিনৰ ক্লিনিকেল ট্ৰায়েলৰ সময়ত ভাৰতীয় গৱেষণা চিকিৎসা প্ৰতিষ্ঠানে জৰুৰী ব্যৱহাৰৰ বাবে প্ৰদান কৰা অনুমোদন পত্ৰৰ চৰ্ত তুলি লয় ।
আইচিএমআৰে জনায়, এইবাৰ সাৰ্বজনীনভাৱে জৰুৰী ভিত্তিত ব্যৱহাৰ কৰা হ’ব ভাৰত বায়’টেকৰ ক’ভেক্সিন । ক’ভেক্সিনৰ তৃতীয় পৰ্যায়ৰ পৰীক্ষামূলক প্ৰয়োগৰ ফলাফল লাভ কৰাৰ পাছতে এই সিদ্ধান্ত গ্ৰহণ কৰা হয় ।
কৰ’নাৰ বিৰুদ্ধে ভাৰতত প্ৰস্তুত কৰা প্ৰথম প্ৰতিষেধক ক’ভেক্সিন । ক’ভিশ্বিল্ডৰ লগতে ক’ভিক্সিনকো জৰুৰী ভিত্তিত প্ৰয়োগৰ বাবে অনুমোদন দিয়া হয় ভাৰতত । ক’ভিক্সিনক এক প্ৰকাৰ পৰীক্ষামূলক প্ৰয়োগ বা ‘ট্ৰায়েল মোদ’ত অনুমোদন প্ৰদান কৰা হৈছিল ।
সেয়ে বহুতে এই প্ৰতিষেধক গ্ৰহণ কৰিবলৈ নাকচ কৰিছিল । বহুতেই পৰীক্ষামূলক প্ৰয়োগৰ চূড়ান্ত ফলাফল লাভ কৰাৰ পূৰ্বেই প্ৰতিষেধক প্ৰদান কৰাটো ঠিক হোৱা নাই বুলি অভিযোগ উত্থাপন কৰিছিল ।
মাৰ্চৰ তিনি তাৰিখে তৃতীয় পৰ্যায়ৰ ক্লিনিকেল ট্ৰায়েলৰ ফলাফল ঘোষণা কৰে ভাৰত বায়’টেকে । সংস্থাই জনায় যে, তৃতীয় পৰ্যায়ৰ ফলাফলত পোৱা গৈছে যে এই প্ৰতিষেধক ক’ভিডৰ বিৰুদ্ধে ৮১ শতাংশ কাৰ্যকৰী । মুঠ ২৫,৮০০জন স্বেচ্ছাসেৱকৰ শৰীৰত তৃতীয় পৰ্যায়ৰ পৰীক্ষামূলক প্ৰয়োগ কৰা হয় ।
ভাৰতীয় লোকৰ শৰীৰতেই আটাইতকৈ বেছি এই প্ৰতিষেধকৰ কাৰ্যকৰীতা পৰিলক্ষিত হয় । আইচিএমআৰে সমগ্ৰ প্ৰক্ৰিয়াটোৰ পৰ্যৱেক্ষণ কৰে ।