জলবায়ু পৰিৱৰ্তন বিষয়ক আন্তৰ্জাতিক শীৰ্ষ সন্মিলনত যোগদানৰ বাবে প্ৰধানমন্ত্ৰী নৰেন্দ্ৰ মোদী আৰু চীনৰ ৰাষ্ট্ৰপতি ছি জিনপিঙক আমন্ত্ৰণ জনালে আমেৰিকাৰ ৰাষ্ট্ৰপতি জ’ বাইডেনে । আজি এই বিষয়ে জনালে হোৱাইট হাউচে ।
আগন্তুক ২২/২৩ এপ্ৰিলৰ ভাৰ্চুৱেল বৈঠকত বিশ্বৰ মুঠ ৪০ জন ৰাষ্ট্ৰনেতাক আমন্ত্ৰণ জনায় বাইডেনে । এই তালিকাত মোদী আৰু জিনপিংসহ ৰাছিয়াৰ ৰাষ্ট্ৰপতি ভ্লাডিমিৰ পুতিন, ব্ৰিটেইনৰ প্ৰধানমন্ত্ৰী বৰিছ জনছন, ব্ৰাজিলৰ ৰাষ্ট্ৰপতি জাইৰ ব’লছ’নাৰ’, বাংলাদেশৰ প্ৰধানমন্ত্ৰী শেখ হাছিনাক আমন্ত্ৰণ জনোৱা হৈছে ।
হোৱাইট হাউচৰ প্ৰেছ বিজ্ঞপ্তিত কোৱা হৈছে, ‘আগন্তুক নৱেম্বৰত স্কটলেণ্ডৰ গ্লাছগ’ত ৰাষ্ট্ৰসংঘৰ জলবায়ু পৰিৱৰ্তন বিষয়ক আন্তৰ্জাতিক সন্মিলন (চিঅ’পি) অনুষ্ঠিত হ’ব । ইয়াৰ পূৰ্বে এই শীৰ্ষ সন্মিলন অতি গুৰুত্বপূৰ্ণ । ২০২০ত চিঅ’পি-২৬ অনুষ্ঠিত হ’বলগীয়া আছিল, কিন্তু ক’ভিড পৰিস্থিতিৰ বাবে বাতিল কৰা হয় ।’
গোলকীয় উষ্ণতাৰ পৰা বিশ্বক সুৰক্ষা প্ৰদানৰ লক্ষ্যৰে ২০১৫ত ৰাষ্ট্ৰসংঘৰ পেৰিছ জলবায়ু সন্মিলনত বিভিন্ন প্ৰস্তাৱ সন্দৰ্ভত আলোচনা হৈছিল । সেই সময়ত আন্তৰ্জাতিক জলবায়ু পৰিৱৰ্তন বিশেষজ্ঞ সমিতিয়ে জনাইছিল যে, গ্ৰীণ হাউচ গেছৰ মাত্ৰা হ্ৰাস পোৱাৰ ফলত গোলকীয় উষ্ণতা বৃদ্ধি পাইছে । এই গেছৰ পৰিমাণ তিনি গুণ বৃদ্ধি নকৰিলে পৃথিৱীৰ তাপমাত্ৰা নিয়ন্ত্ৰণ কৰা অসম্ভৱ হৈ পৰিব । ২০২০ৰ পৰাই এই পৰিকল্পনা কাৰ্যকৰী কৰিব লাগিব । গ্ৰীণ হাউচ গেছ নিয়ন্ত্ৰণ পদ্ধতিত একমত নহয় পেৰিছ সন্মিলন ।