১২১ নং চাবুৱা বিধানসভা সমষ্টিৰ ডিকম নাহৰতলি চাহ বাগিচা এলপি স্কুলৰ ৭ নং ভোট কেন্দ্ৰত ৫০ শতাংশ ভোটগ্ৰহণ হোৱাৰ সময়তে ইভিএম-ত কংগ্ৰেছৰ চিহ্ন সম্বলিত বুটামত কাগজ এটুকুৰা লগাই ৰখাৰ অভিযোগ তুলি কংগ্ৰেছৰ দলীয় কৰ্মীসহ প্ৰাৰ্থী অজয় ফুকনে কেন্দ্ৰটোত উত্তপ্ত পৰিস্থিতি সৃষ্টি কৰে ।
কেন্দ্ৰটোৰ চৌহদত প্ৰৱেশ কৰি ভোটাৰক উদ্দেশ্যি বক্তব্য আগবঢ়োৱাৰ সময়ত সংবাদ মাধ্যমক উদ্দেশ্যি গালি পৰা পৰিলক্ষিত হয় । অজয় ফুকনৰ সমৰ্থকসকলৰ স’তে কেন্দ্ৰটোত শ্ল’গান প্ৰদান কৰি পৰিস্থিতি উত্তপ্ত কৰি তোলাৰ সময়তে অগপ আৰু কংগ্ৰেছ কৰ্মীসকলৰ মাজত ঠেলা-হেঁচা কৰা পৰিলক্ষিত হয় ।
ঘটনা সন্দৰ্ভত প্ৰত্যক্ষদৰ্শী দুগৰাকীৰ মতে, ভোট দিয়াৰ সময়ত বুটামৰ ওপৰত এটা ষ্টিকাৰ লগোৱা আছিল আৰু প্ৰিজাইডিং অফিচাৰক অৱগত কৰা হৈছিল যদিও, ইভিএমটোৰ দৃষ্টি ৰখা আমাৰ কাম নহয় বুলি কয় অফিচাৰগৰাকীয়ে । ইয়াকে লৈ বাক-বিতণ্ডাৰ সৃষ্টি হোৱাত অৰ্ধসামৰিক বাহিনী আৰু আৰক্ষী উপস্থিত হৈ অগপ আৰু কংগ্ৰেছৰ সমৰ্থকসকলক নিয়ন্ত্ৰণলৈ আনে ।
বিগত কে’বাদিনৰ পৰা অসম গণ পৰিষদৰ প্ৰাৰ্থী পোনাকণ বৰুৱাই সমৰ্থকৰ দ্বাৰা মদ আৰু ধনৰ প্ৰলোভনেৰে ভোটাৰ ৰাইজৰ মাজত বিশৃংখল পৰিৱেশ সৃষ্টি কৰা বুলি অভিযোগ উত্থাপন কৰে ফুকনে । প্ৰশাসনেও নিৰপেক্ষ ভূমিকা পালন কৰাত ব্যৰ্থ হোৱা বুলিও অভিযোগ কৰিছে ।
লগতে অজয় ফুকনৰ দ্বাৰা উত্থাপিত সংবাদ মাধ্যমৰ ওপৰত অভিযোগ সন্দৰ্ভত সংবাদ মাধ্যমে স্পষ্টিকৰণ বিচৰাত দুই-এক সংবাদ মাধ্যম বুলি কৈ দায় সৰা মন্তব্য দিয়াৰ সময়ত চাবুৱাৰ আন এটা ভোট কেন্দ্ৰত কংগ্ৰেছৰ চিনত চিয়াঁহী ঢালি দিয়া বুলিও কয় । কেৱল ছয়মহীয়া ৰাজনৈতিক অভিজ্ঞতাৰে পৰিপুষ্ট প্ৰাৰ্থীগৰাকীয়ে সাংবাদিকক নিৰপেক্ষ ভূমিকা পালন কৰিবলৈ নীতি শিক্ষা দিয়ে ၊ দুই-এক সংবাদ মাধ্যম কংগ্ৰেছ বিৰুধী দলৰ স’তে মিলি থকা বুলি কেন্দ্ৰটোত ভোটদান কৰিবলৈ যোৱা ৰাইজৰ মাজত ভাষণ দিয়া দেখিবলৈ পোৱা যায় ।
ইপিনে, অসম গণ পৰিষদে বুটামত কাগজ লগাই ৰখা বুলি অভিযোগ উত্থাপন কৰে অজয়ে । অজয়ৰ এই অভিযোগ নস্যাৎ কৰিছে অসম মহিলা পৰিষদৰ কেন্দ্ৰীয় সমিতিৰ সদস্যাই আৰু সংবাদ মাধ্যমক গালি দিয়াৰ সন্দৰ্ভতো এগৰাকী কৰ্মীয়ে ভাষ্য প্ৰদান কৰে ।
কেন্দ্ৰীয় সমিতিৰ সদস্যাগৰাকীৰ মতে, এয়া সম্পূৰ্ণ কংগ্ৰেছৰ নিজা ষড়যন্ত্ৰ । কিয়নো কংগ্ৰেছ দলৰ প্ৰাৰ্থীগৰাকীয়ে পৰাজয়বৰণ কৰাটো নিশ্চিত বুলি জানি এইদৰে বিশৃংখল পৰিৱেশৰ সৃষ্টি কৰি তোলিছে । ‘অজয় ফুকন জিন্দাবাদ’ ধ্বনি দিয়াত সম্পূৰ্ণ আইন উলংঘা কৰা হৈছে, ইলেকচন কমিচনাৰ উপস্থিত থকা সময়ত অজয় ফুকনে কংগ্ৰেছ দলৰ প্ৰতীক চিহ্ন লগাই ভোট কেন্দ্ৰত অ
কেনেকৈ প্ৰৱেশ কৰিব পাৰিলে বুলি প্ৰতিক্ৰিয়া ব্যক্ত কৰি সমালোচনা কৰে সদস্যাগৰাকীয়ে ।
ৰসাতলে যোৱা এজন কাণ্ড জ্ঞানহীনক প্ৰতিনিধি হিচাপে চাবুৱাৰ ৰাইজে কেতিয়াও নিবিচাৰে বুলিও কটাক্ষ কৰে সদস্যাগৰাকীয়ে । আন এজন অগপ কৰ্মীয়ে অজয় ফুকনৰ অভিযোগৰ ভিত্তিত কয় যে, মদ আৰু পইচাৰ প্ৰলোভনৰ ৰাজনীতি কংগ্ৰেছে আৰম্ভ কৰা সংস্কৃতি ।
স্থানীয় ছেক্টৰ অফিচাৰ তথা ৰাজহ চক্ৰ বিষয়াই অভিযোগ পৰিস্থিতি নিয়ন্ত্ৰণলৈ অনা হৈছে বুলি জানিবলৈ দিয়ে । সাংবাদ মাধ্যমৰ ওপৰত উত্থাপিত অভিযোগক চাবুৱাৰ সকলো সাংবাদিকে একেমুখে ধিক্কাৰ প্ৰদান কৰি ভৱিষ্যতে এনে মন্তব্য প্ৰদান নকৰিবলৈ আহ্বান জনায় ।
