কৃষক আন্দোলন আৰু ক’ভিড সংকটক লৈ চৰকাৰৰ সমালোচনা কৰাৰ বাবে পূৰ্বেও সাংসদ-বিধায়কসকলৰ টুইট ডিলিট কৰি দিয়া হৈছিল । এইবাৰ প্ৰধানমন্ত্ৰী নৰেন্দ্ৰ মোদীৰ পদত্যাগৰ দাবী উত্থাপন কৰি আৰম্ভ হোৱা হেছটেগ দিয়া কেইহেজাৰমান পোষ্ট স্তব্ধ কৰি ৰখাৰ অভিযোগ উত্থাপন হ’ল ফেচবুকৰ বিৰুদ্ধে । কেন্দ্ৰীয় চৰকাৰৰ নিৰ্দেশত মৰ্মে তেওঁলোকে এই পদক্ষেপ গ্ৰহণ কৰিছে বুলি অভিযোগ উত্থাপন হয় । অৱশ্যে ভুলৱশতঃ হেছটেগসমূহ স্তব্ধ কৰি দিয়া হৈছিল বুলি জনায় ফেচবুক কৰ্তৃপক্ষই ।
দেশৰ কৰ’না সংকটৰ ভয়াবহ পৰিস্থিতিৰ বাবে আৰু স্বাস্থ্য ব্যৱস্থাত হোৱা বিপৰ্যয়ৰ বাবে কেন্দ্ৰীয় চৰকাৰকে দোষী সাব্যস্ত কৰিছে একাংশই । নিজৰ দায়িত্ব পূৰণত ব্যৰ্থ হোৱা বুলি দাবী উত্থাপন কৰি সামাজিক মাধ্যমত #ৰিজাইনমোদী লিখি পোষ্ট কৰে তেওঁলোকে । কালি পুৱাৰ পৰাই ফেচবুক আৰু টুইটাৰত জনপ্ৰিয় হৈ পৰে এই ট্ৰেণ্ড ।
কিন্তু কালি ফেচবুকে কিছু সময়ৰ বাবে হেছটেগ বন্ধ কৰি দিয়ে । #ৰিজাইনমোদী লিখি পোষ্ট কৰিবলৈ ল’লেই সেইটো ব্লক কৰি দিয়া হয় । লগতে #ৰিজাইনমোদী বুলি কৰা সকলো পোষ্ট ডিলিট কৰি দিয়া হয় । কোৱা হয়, এই হেছটেগ ফেচবুকৰ পৰিপন্থী । ফলত কিছু সময়ৰ বাবে হেছটেগ দি কৰা পোষ্ট পঢ়িব নোৱাৰা হৈ যায় । কেৱল ভাৰতৰ বাবেই হেছটেগ বন্ধ কৰি দিয়া হয় । আমেৰিকা, কানাডা আৰু ব্ৰিটেইনৰ লোকে পঢ়িব পাৰিছিল ।
এই সন্দৰ্ভত এটাৰ পাছত আনটো অভিযোগ উত্থাপন হোৱাৰ পাছতে ফেচবুকৰ বিৰুদ্ধে সৰৱ হয় সামাজিক মাধ্যম ব্যৱহাৰকাৰীসকল । কেন্দ্ৰীয় চৰকাৰৰ নিৰ্দেশতে ফেচবুক কৰ্তৃপক্ষই তেওঁলোকৰ বাক্ স্বাধীনতা খৰ্ব কৰিছে বুলি অভিযোগ কৰে সামাজিক মাধ্যম ব্যৱহাৰকাৰীসকলে । বহুতে ফেচবুক বয়কট কৰিবৰ বাবেও হুংকাৰ দিয়ে ।
ইয়াৰ কেইঘন্টামানৰ পাছতেই সেই হেছটেগ দি কৰা পোষ্ট পুনৰ প্ৰত্যক্ষ হ’বলৈ লয় । এই সন্দৰ্ভত ফেচবুকৰ মুখপাত্ৰ এণ্ডি ষ্ট’নে কয়, ‘ভুলৱশতঃ সেই হেছটেগ সাময়িকভাৱে বন্ধ কৰি দিয়া হৈছিল । ভাৰত চৰকাৰৰ নিৰ্দেশত নহয় । সেইটো আমি পুনৰ আৰম্ভ কৰি দিছো ।’