Chhattisgarh:✒️ ছত্তিশগড়ৰ ৰাজধানী ৰাইপুৰত (Raipur) এক চাঞ্চল্যকৰ ঘটনাত ভাৰতীয় বায়ু সেনা(Indian Air Force)ৰ উইং কমাণ্ডাৰ বিপুল যাদৱ(Vipul Yadav) ৰ মৃতদেহ তেওঁৰ বাসগৃহৰ পৰা উদ্ধাৰ কৰা হৈছে।
আৰক্ষীৰ তথ্য অনুসৰি, বিধায়ক কলনী এলেকাত থকা বাসগৃহত ফেনৰ পৰা ওলমি থকা অৱস্থাত তেওঁৰ দেহটো উদ্ধাৰ কৰা হয়। ঘৰৰ কৰ্মচাৰীয়ে প্ৰথমে ঘটনাটো লক্ষ্য কৰি আৰক্ষীক খবৰ দিয়াৰ পিছতেই আৰক্ষী আৰু ফৰেনছিক দল ঘটনাস্থলীত উপস্থিত হৈ তদন্ত আৰম্ভ কৰে।
তথ্য অনুসৰি ,ঘটনাৰ সময়ত তেওঁৰ দুজন সন্তান ঘৰৰ আনটো কোঠাত আছিল। তেওঁৰ পত্নী পূৰ্বে বায়ুসেনাত কৰ্মৰত আছিল যদিও বৰ্তমান আইটি খণ্ডত কৰ্মৰত আৰু বেংগালুৰু (Bengaluru)ত থাকে।
দুয়োৰে মাজত পাৰিবাৰিক মতানৈক্য থকাৰ সম্ভাৱনাৰ কথাও তদন্তত পোহৰলৈ আহিছে বুলি আৰক্ষী সূত্ৰে জানিবলৈ দিছে।
উল্লেখযোগ্য যে উইং কমাণ্ডাৰ যাদৱ ছত্তিশগড়ত নক্সাল-বিৰোধী অভিযানৰ স’তে জড়িত গুৰুত্বপূর্ণ দায়িত্বত নিযুক্ত আছিল। ঘটনাস্থলীত কোনো ছুইচাইড নোট উদ্ধাৰ হোৱা নাই যদিও মৃত্যুৰ সঠিক কাৰণ জানিবলৈ আৰক্ষীয়ে তদন্ত অব্যাহত ৰাখিছে।এই ঘটনাই অঞ্চলটোত তীব্ৰ চাঞ্চল্যৰ সৃষ্টি কৰিছে।