ক’ত হয় আৰটিপিচিআৰ পৰীক্ষণ, ক’ভিড প্ৰতিষেধকৰ দ্বিতীয় পালি ক’ত লাভ কৰিব ইত্যাদিৰ বিষয়ে বিভ্ৰান্তি দূৰ কৰিবৰ বাবে এইবাৰ আগবাঢ়ি আহিল গুগল । স্মাৰ্টফোনৰ লোকেচন অন কৰি গুগল মেপত গৈ ‘ক’ভিড ভেকচিন চেণ্টাৰ নিয়াৰ মি’ বা ‘ক’ভিড-১৯ টেষ্ট নিয়াৰ মি’ লিখিলেই জানিব পাৰিব আপোনাৰ কাষত কোন কেন্দ্ৰত দিয়া হৈছে ক’ভিড প্ৰতিষেধক । ভাৰতত মংগলবাৰৰ পৰা উপলব্ধ হৈছে এই সুবিধা ।
ভাৰতসহ দহখন দেশক এই সুবিধা আগবঢ়াইছে গুগলে । ব্ৰাজিল, কম্বোডিয়া, ইণ্ডোনেছিয়া, মেক্সিকো, কানাডা, ফ্ৰান্স, চিলে, ছিংগাপুৰ, আমেৰিকা আছে এই তালিকাত । ভাৰতত কেন্দ্ৰীয় স্বাস্থ্য মন্ত্ৰণালয়ৰ পৰা তথ্য সংগ্ৰহ কৰি এই সুবিধা কৰিছে গুগলে । দেশৰ প্ৰায় ২৩ হেজাৰ প্ৰতিষেধক কেন্দ্ৰ আছে তালিকাখনত ।
গুগলে জনায়, সম্প্ৰতি মানুহৰ দুটা মূল চাহিদা হৈছে অক্সিজেনৰ যোগান আৰু হাস্পতালত ঠাই পোৱা । ভাৰতৰ কিছু সংখ্যক স্থানত পাইলট প্ৰকল্প হিচাপে এই তথ্যও দিয়া আৰম্ভ কৰিছে গুগলে । সংস্থাই জনায়, চকু মুদি বিশ্বাস কৰাৰ পূৰ্বে এবাৰ অনুসন্ধান কৰি ল’ব । সেয়ে ইয়াক পৰীক্ষণমূলক প্ৰয়াস কোৱা হৈছে ।
প্ৰতিষেধক কেন্দ্ৰ বা কৰ’না পৰীক্ষণ কেন্দ্ৰ আপলোড কৰাৰ সময়ত কেন্দ্ৰীয় চৰকাৰে দিয়া তথ্যসহ দেশজুৰি বিস্তৃত হৈ থকা নিজস্ব স্থানীয় গাইডসকলৰ পৰাও তথ্য সংগ্ৰহ কৰিছে গুগলে । হুগলীৰ শ্ৰীৰামপুৰৰ সৌনক দাস গুগলৰ স্থানীয় গাইড । তেওঁ জনায়, স্থানীয় ৱালছ হাস্পতালৰ লোকেচন চূড়ান্ত কৰাৰ পূৰ্বে তেওঁৰ পৰা তথ্য সংগ্ৰহ কৰা হৈছে ।
