’আমিটো পাহাৰৰ মানুহ, আমাৰ বেমাৰ লাগিলে কোনে চাব? কোনে নিব আমাক আঁতৰৰ হস্পিতাললৈ? সেইবাবেই নিজেই নিজৰ সহায় হৈছো৷ সজাগ কৰিছো পাহাৰীয়া গাঁওখনৰ মানুহজাকক৷ ইহঁতো বাছি থাকক, ময়ো বাছি থাকো ৷’ এয়া দূৰ্গম কাৰ্বিপাহাৰৰ হেনছেক্ দাদাৰ কথা ৷
কাৰ্বিআংলঙৰ দূৰ্গম পাহাৰৰ এজন নিৰৱ ক’ভিড যুঁদ্ধা বিদৰসিং হেনছেক্ ৷ মৰমতে তেঁওৰ সকলোৱে মতা নাম ’হেনছেক্ দাদা ’৷ পাহাৰীয়া কাৰ্বিআংলং জিলাৰ চুচেনধেন্টা সমষ্টিৰ ৰঙাগড়া বে’ গাঁৱৰ বাসিন্দা হেনছেক্ দাদা ৷
এইগৰাকী পাহাৰৰ সমাজহিতৈষী লোকে নিজ নঙলামুখৰ পৰাই আৰম্ভ কৰিছে ক’ভিডৰ বিৰুদ্ধে যুঁজ৷ নিজ নঙলামুখত নঙলা জপাই ইয়াৰ কাষতে তেওঁ কাঠৰ ফলকত লিখিছে- ‘ন’ মাস্ক-ন’ এণ্ট্ৰী’ ৷
ইয়াৰ লগতে কাঠেৰে সজা আন এখন কাঠৰ ফলকত চূণেৰে কাৰ্বি ভাষাতে তেওঁ লিখিছে- ’নন মালম কেদাম, কেবাং ছেৰে নাংজি, ক’ৰনা কেছ’৷ ’ ইয়াৰ অসমীয়া অৰ্থ হৈছে – ’অহা-যোৱাত সাৱধান, ক’ৰনা মহামাৰী হৈছে৷’
এয়া পাহাৰৰ মানুহ হিচাপে পৰিচিত হেনছেক দাদাৰ সজাগতাৰ অভিযান৷ পাহাৰীয়া জীৱনশৈলীৰে উঠা-বহা কৰা হেনছেক্ দাদাই খেতি-বাতি কৰিয়েই চলাই আহিছে পৰিয়ালটো ৷ এতিয়া চৌপাশে ক’ভিডৰ সংহাৰী ৰূপ ৷
সকলোতে সন্দেহ, ভয় শংকাই গ্ৰাস কৰিছে জনজীৱন৷ কিন্তু ইয়াৰ মাজতো এতিয়াও সজাগ নহয় নগৰীয়া সভ্যতাৰে খাপ খোৱা একাংশ তথাকথিত জ্ঞানবান লোক৷ কিন্তু ইয়াৰ বিপৰীতে একপ্ৰকাৰ দেৱৰ অগম্য খোজ কাঢ়িয়েই প্ৰজন্মৰ পাছত প্ৰজন্ম পাৰ কৰা কাৰ্বিপাহাৰৰ এই ছাৰপ’ বে’ গাৱঁৰ হেনছেক্ দাদাই গ্ৰহণ কৰিছে প্ৰশংসনীয় পদক্ষেপ ৷
পাহাৰৰ এই ৰঙাগড়া ছাৰপ’ বে’ গাঁৱত কোনো লোকে প্ৰৱেশ কৰিলে এই সময়ত মাস্ক পৰিধান কৰাতো বাধ্যতামূলক কৰিছে এই হেনছেক্ দাদাই ৷ তেঁওৰ নিজ ঘৰৰ নঙলামুখৰ পৰাই এইগৰাকী সহজসৰল পাহাৰৰ দাদাই আৰম্ভ কৰিছে এই সজাগতা অভিযান ৷
ইয়াৰ লগতে ক’ভিডৰ সময়ত গ্ৰহণ কৰিবলগা আন আন সজাগতাসমূহো সম্পূৰ্ণৰূপে পালন কৰাটো বাধ্যতামূলক কৰা হৈছে অঞ্চলটোত ৷ সকলোতকৈ আকৰ্ষণীয় কথাটো হ’ল এই ছাৰপ’ গাঁৱত এতিয়ালৈকে প্ৰৱেশ কৰিব পৰা নাই কোনো চাৰিচকীয়া বাহন ৷
পাহাৰীয়া লুংলুঙীয়া পথেই জনজীৱনৰ একমাত্ৰ বহিঃজগতৰে যোগাযোগৰ মাধ্যম ৷ যুগে যুগে চৰকাৰী বঞ্চনাৰ বলি হোৱা অঞ্চলবাসীৰ বাবে আধুনিক বিশ বহু কথাই বৰ্তমানেও বহুত দূৰৈত ৷ পথ পানীৰ সমস্যাত বাৰুকৈয়ে ভাৰাক্ৰান্ত অঞ্চলটোৰ জনসাধাৰণ ৷
কিন্তু ইয়াৰ মাজতো এই জটিল সময়ত এনে সজাগতাৰ ছবিখনে ভৱাই তুলিছে তথাকথিত চহৰীয়া সভ্যতাৰ সোঁতত উটি যোৱা প্ৰতিজন লোকক ৷ গাঁওখনৰ বাহিৰৰ পৰা কোনোবা ইয়াৰ কোনো গৃহস্থীৰ ঘৰত প্ৰৱেশ কৰিব বিচাৰিলে তেওঁ আজিৰ সময়ত সকলো ক’ভিড বিধি মনাতো বাধ্যতামূলক ৷
কোনো আৰক্ষীৰ লাঠিৰ কোবৰ ভয় বা সজাগতামূলক সংস্থাৰ প্ৰচাৰমূলক কাৰ্যৰ জৰিয়তে নহয়, এইগৰাকী হেনছেক্ দাদাৰ একক প্ৰচেষ্টাৰেই এতিয়া ক’ভিড যুঁদ্ধা হৈ উঠিছে সকলো ৷ গ্ৰাম্য ক’ভিড যোদ্ধা এইগৰাকী বিদৰসিং হেনছেক ৰঙাগৰা অঞ্চলবাসীৰ বাবে হৈ পৰিছে এক আদৰ্শ ৷
এওঁৰ তৎপৰতাতে সজাগ হৈ উঠিছে পাহাৰৰ জনতা ৷ হেনছেক্ দাদাৰ আশা-সকলোৰে এনে সজাগতাই বিশ্বৰ পৰা নিঃশেষ কৰিব ক’ভিডক ৷