‘কৰ’নাৰ সন্ত্ৰাসৰ মাজতো মই ওলাই নাহিলে মা লঘোণে থাকিব ৷’ এয়া কলিয়াবৰৰ এগৰাকী জীৱন সংগ্ৰামী যুৱকৰ মনৰ কথা ৷ এই কথাৰ আঁৰত আছে এখন বিশেষ বিপনী ৷ যিখন ভ্ৰাম্যমান বিপনীয়ে সদাব্যস্ত চহৰ জখলাবন্ধাত এতিয়া সকলোৰে দৃষ্টি কাঢ়িছে ৷
এই ভ্ৰাম্যমাণ বিপনীখনৰ আঁৰৰ ব্যক্তিগৰাকীৰ নাম ৰাজেশ ছেত্ৰী । ৰাজেশ এগৰাকী বিশেষভাৱে সক্ষম যুৱক ৷ চৌদিশে কৰ’না মহামাৰীৰ সন্ত্ৰাস ৷ পদপথৰ অতি ক্ষুদ্ৰ পোহাৰীগৰাকীৰ পৰা সকলো এতিয়া একপ্ৰকাৰ পৰিয়ালৰ ভৱিষ্যতৰ চিন্তাত নিমগ্ন ৷ ইয়াৰ মাজতে পেটৰ তাড়নাত কলিয়াবৰৰ জখলাবন্ধাত বিশেষভাৱে সক্ষম ৰাজেশে বিশেষ কৌশলৰে নিৰ্মাণ কৰা চাইকেলখনতে সাঁজি লৈছে এখন ভ্ৰাম্যমান দোকান । কৰি গৈছে জীৱনৰ সংগ্ৰাম ৷
বিপনীখনত দিনটোত চিপচ্, ছকলেটৰ পেকেটকেইটা বিক্ৰী কৰি যি উপাৰ্জন হয় তাৰেই পৰিয়াল পোহপাল দিয়ে জখলাবন্ধাৰ বিশেষভাৱে সক্ষম এই যুৱকজনে । আজিৰ দিনটোত সদাব্যস্ত চহৰ ৰূপে পৰিচিত জখলাবন্ধাৰ এয়া এখন চিনাকী ছবি । বিশেষভাৱে সক্ষম ব্যক্তিৰ চাইকেলখনতে এখন ভ্ৰাম্যমান দোকান সাজি জখলাাবন্ধাৰ চোকে-কোণে দিনটো ঘূৰি ফুৰে ৰাজেশ । লক্ষ্য এটাই, দোকানখনত ওলোমাই ৰখা বস্তু কেইপদ সোনকালেই বিক্ৰী কৰিব লাগে তেওঁ । কিয়নো তাৰে পোৱা দুপইচাৰে তেতিয়াহে বৃদ্ধ মাতৃৰ আখলত জুই জ্বলে ।
পুৱাই ওলাই অহা সকলোৰে অতি চিনাকী ৰাজেশৰ দোকানলৈ কণমানি এটাও দৌৰি আহি চিপচ্ এপেকেট কিনে । ২০১৮ত নিয়তিৰ নিৰ্দয় আঁচোৰত ৰাজেশৰ জীৱনলৈ নামি আহিছিল ঘোৰ অমানিশা । ইয়াৰ আগেয়ে ৰাজেশ আছিল সুন্দৰ সুঠাম যুৱক । চেন্নাইত কৰ্মৰত ৰাজেশ ঘৰলৈ আহিছিল কৰ্মৰত কোম্পানীৰ ছুটী কটাবলৈ । কিন্তু ২০১৮ৰ ২৭ ফেব্ৰুৱাৰীত গুৱাহাটীৰ পৰা শিলঘাটলৈ অহা ৰে’লৰ দুৰ্ঘটনাত শৰীৰৰ তলৰ অংশত আঘাটপ্ৰাপ্ত হয় ৰাজেশ । ইয়াৰ পাছত বহু কষ্টৰ মূৰত গুৱাহাটী মেডিকেল কলেজত চিকিৎসা কৰি সুস্থ হৈ ঘৰলৈ উভতে ৰাজেশ । কিন্তু তেওঁ দুয়োখন ভৰি হেৰুৱাই । তথাপিও ভাগৰি নপৰিল সুঠাম যুৱকজন ।
চৰকাৰৰ পৰা লাভ কৰা বিশেষভাৱে সক্ষম লোকৰ চাইকেলখনতে গঢ়ি তুলিলে এখন ভ্ৰাম্যমান দোকান আৰু এতিয়া দোকানখনেৰে পোহপাল দি আছে পৰিয়ালটো । নতুন চৰকাৰখনলৈ এইগৰাকী ভ্ৰাম্যমাণ বিপনীৰ ব্যৱসায়ীৰ অনুৰোধ যাতে চৰকাৰে দোকানখন চলাই নিয়াত আৰ্থিকভাৱে সহায় কৰে এওঁক ৷ একাংশৰ কৰ্মবিমুখীতাৰ বিপৰীতে এইগৰাকী বিশেষভাৱে সক্ষম ব্যক্তি সকলোৰে বাবেই আদৰ্শ ৷