কাৰ্বি আংলঙত হোম গাৰ্ডৰ ততপৰতাত ধৰা পৰিল ১৩ কোটিৰ নিষিদ্ধ ড্ৰাগছ

কাৰ্বি আংলঙত পুনৰ জব্দ হৈছে প্ৰায় ১৩ কোটি টকা মূল্যৰ নিষিদ্ধ ড্ৰাগছ | আজি নিশা কাৰ্বি আংলং জিলাৰ ডিলাই আৰক্ষী থানাৰ সন্মুখত এখন যাত্ৰীবাহী বাছত তালাচী চলাই উদ্ধাৰ কৰা হয় বৃহত পৰিমাণৰ নিষিদ্ধ ড্ৰাগছখিনি | প্ৰাপ্ত তথ্য মতে, ডিলাই আৰক্ষী থানাৰ হোম গাৰ্ড বৰছিং বে’ MN-06, B, 0511 নম্বৰযুক্ত যাত্ৰীবাহী বাছখনত তালাচী চলাওতে প্ৰত্যক্ষ কৰে সন্দহযুক্ত সামগ্ৰীখিনি | পাছত, নিষিদ্ধ ড্ৰাগছৰ উমান পায় হোম গাৰ্ড বৰছিঙে | বৰছিঙক ড্ৰাগছ সৰবৰাহকাৰীয়ে উতকোচ দিয়ে যদিও সেয়া গ্ৰহণ নকৰি পুনে পুনে আৰক্ষী থানাৰ ভাৰপ্ৰাপ্ত বিষয়া বিতুপন চেতিয়াক অৱগত কৰে | তাৰ পাছত যাত্ৰীবাহী বাছখনত উদ্ধাৰ হয় প্ৰায় ৩ কেজি নিষিদ্ধ ড্ৰাগছ | ইয়াৰ বজাৰ মূল্য প্ৰায় ১৩ কোটি টকা হ’ব বুলি কোৱা হৈছে যদিও ইয়াৰ আন্ত:ৰাষ্ট্ৰীয় বজাৰ মূল্য প্ৰায় ৫০ কোটিৰো অধিক হ’ব বুলি সন্দেহ কৰিব পৰা যায় | ঘটনাৰ স’তে জড়িত ড্ৰাগছ সৰবৰাহকাৰী চেন্নাইৰ দুই মহিলা শ্ৰীমতী পাঞ্জাভাৰাম আৰু লক্ষ্মী ডি ক গ্ৰেপ্তাৰ কৰাৰ লগতে মনিপুৰৰ থউবল জিলাৰ খইৰম বসন্ত সিং নামৰ লোকজনকো আৰক্ষীয়ে গ্ৰেপ্তাৰ কৰিছে | ইতিমধ্যে অসমৰ আৰক্ষী সঞ্চালক প্ৰধান ভাস্কৰ জ্যোতি মহন্তই ডিলাই আৰক্ষী থানাৰ হোম গাৰ্ড বৰছিং বে’ক এক লাখ টকা পুৰস্কাৰ প্ৰদানৰ কথা ঘোষণা কৰিছে | ঘটনাৰ পাছতে ডিলাই আৰক্ষী থানাত কাৰ্বি আংলং জিলাৰ শীৰ্ষ বিষয়া উপস্থিত হৈ এক উচ্চ পৰ্যায়ৰ তদন্ত আৰম্ভ কৰা বুলি জানিব পৰা গৈছে |