ইতিমধ্যে বাতিল ঘোষণা কৰা হাইস্কুল শিক্ষান্ত আৰু হাই মাদ্ৰাছা পৰীক্ষাৰ মূল্যায়নৰ আধাৰ হ’ব শিক্ষাৰ্থীসকলে ইয়াৰ পূৰ্বৰ পৰীক্ষাসমূহত নৱম আৰু দশম শ্ৰেণীত লাভ কৰা নম্বৰ । সম্প্ৰতি এই বিষয়টোক লৈ অনুষ্ঠিত হোৱা সঘন বৈঠক আৰু কালিও এনে সম্পৰ্কীয় বৈঠকত এনে ইংগিতে স্পষ্ট হৈছে । কি পদ্ধতিৰ পৰীক্ষাৰ মূল্যায়ন কৰিব পৰা যাব তাকে লৈ কালি অনুষ্ঠিত আলোচনাত আন এক বিষয়ে চৰ্চা লাভ কৰিছে । এনে বহু ছাত্ৰ-ছাত্ৰী আছে যিসকলে পূৰ্বৰ পৰীক্ষাসমূহত উন্নত ফলাফল দেখুৱাব পৰা নাই । পৰৱৰ্তী পৰীক্ষাতহে অধিক মনোযোগী হ’ব বুলিও ভবা বহু ছাত্ৰ-ছাত্ৰী আছে ।
তদুপৰি, বিভিন্ন কাৰণত সময়ে সময়ে হৈ থকা বিদ্যালয়ৰ আভ্যন্তৰীণ পৰীক্ষাসমূহত উপযুক্ত ফলাফল লাভ নকৰা ছাত্ৰ-ছাত্ৰীও আছে । এনে বহু ছাত্ৰ-ছাত্ৰীৰ আশা-ভৰসাৰ থলী আছিল মেট্ৰিক পৰীক্ষাত অৱতীৰ্ণ হোৱাটো । মেট্ৰিক পৰীক্ষাতে নিজৰ সম্পূৰ্ণ পাৰদৰ্শিতা প্ৰদৰ্শন কৰিব বুলি সাজু হৈ থকা ছাত্ৰ-ছাত্ৰীৰ অভাৱ নাই । কিন্তু এইবাৰ তেনে নহ’ল । এই প্ৰসংগত প্ৰশ্ন উত্থাপন হৈছে যে পূৰ্বৰ পৰীক্ষাত ভাল প্ৰদৰ্শন নকৰা সকলৰ এতিয়া কি হ’ব পুনৰ ফলাফল ভাল কৰাৰ সুযোগৰ পৰা বঞ্চিত হ’ব নেকি ছাত্ৰ-ছাত্ৰীসকল । একাংশ অভিভাৱকে কয় যে, এনে বহু কথাই চালি-জাৰি চোৱাৰ প্ৰয়োজন আছে । যাতে, ছাত্ৰ-ছাত্ৰীসকল উপযুক্ত মূল্যায়নৰ পৰা বঞ্চিত নহয় ।
চলিত বৰ্ষত বাতিল হোৱা হাইস্কুল শিক্ষান্ত পৰীক্ষা আৰু হাই মাদ্ৰাছা পৰীক্ষাৰ ফলাফল কিদৰে ঘোষণা কৰা হ’ব এই সন্দৰ্ভত শিক্ষা বিভাগে গঠন কৰি দিয়া নজনীয়া সমিতিখনৰ এক গুৰুত্বপূৰ্ণ পৰ্যালোচনাৰ বৈঠক কালি অসম মাধ্যমিক শিক্ষা পৰিষদৰ সভাকক্ষত অনুষ্ঠিত হৈ যায় ।
প্ৰাক্তন উপাচাৰ্য তথা উচ্চস্তৰীয় সমিতিৰ অধ্যক্ষ ড° অলক কুমাৰ বুঢ়াগোহাঁইৰ সঞ্চালনাত অনুষ্ঠিত হোৱা এই বৈঠকত মূলতঃ ছেবা কৰ্তৃপক্ষই বিদ্যালয়সমূহৰ পৰা বিচৰা পৰীক্ষাৰ্থীৰ তথ্যৰ ওপৰত ভিত্তি কৰি কেনে পদ্ধতিৰে ফলাফল মূল্যায়ন কৰিব পৰা যায় তাৰ সূত্ৰৰ সন্দৰ্ভত আলোচনা কৰা হয় ।
উল্লেখ্য যে মেট্ৰিক আৰু হাই মাদ্ৰাছাৰ ফলাফল ঘোষণাৰ সন্দৰ্ভত ইতিমধ্যে ছেবা কৰ্তৃপক্ষই পৰীক্ষাৰ্থী অৱতীৰ্ণ হ’ব লগা সংশ্লিষ্ট বিদ্যালয়ৰ শিক্ষাৰ্থীসকলৰ বিগত পৰীক্ষাৰ পাৰদৰ্শিতাৰ তথ্য বিচাৰি প্ৰ-পত্ৰ প্ৰেৰণ কৰিছে । এই প্ৰ-পত্ৰত সংশ্লিষ্ট বিদ্যালয়খনৰ কিমান পৰীক্ষাৰ্থী পৰীক্ষাত অৱতীৰ্ণ হ’ব, তাৰে নিয়মীয়া, বিশেষভাৱে সক্ষম আৰু বিগত অনুত্তীৰ্ণ পৰীক্ষাৰ্থীৰ সংখ্যা কিমান পৃথকে পৃথকে তথ্য যোগানৰ নিৰ্দেশ দিয়া হৈছে ।
সমান্তৰালভাৱে প্ৰথমবাৰলৈ পৰীক্ষাত অৱতীৰ্ণ হ’ব লগা তথা নিয়মীয়া শিক্ষাৰ্থীসকলে ২০১৯ত নৱম শ্ৰেণীত লাভ কৰা মুঠ নম্বৰ, ২০২০ত দশম শ্ৰেণীত অনুষ্ঠিত চাৰিটা ইউনিট টেষ্ট, ছমহীয়া পৰীক্ষা আৰু মেট্ৰিকৰ আগমুহূৰ্তত লোৱা টেষ্টত কিমান নম্বৰ লাভ কৰিছিল প্ৰ-পত্ৰৰ জৰিয়তে সংগ্ৰহ কৰা হৈছে ।
একেদৰে বিগত পৰীক্ষাত উত্তীৰ্ণ নোহোৱা তথা এইবাৰ পুনৰ আবেদন কৰা কোনো শিক্ষাৰ্থীয়ে ২০২০-২১ শিক্ষাবৰ্ষত নিয়মীয়া পাঠদানত অংশগ্ৰহণ কৰিছিল নেকি, কোন বৰ্ষত অনুত্তীৰ্ণ, কেতিয়ালৈকে নিয়মীয়া পাঠদানত আছিল আদি তদ্যও সংশ্লিষ্ট বিদ্যালয়সমূহৰ পৰা বিচৰা হৈছে । এই তথ্য অধ্যয়ন কৰিয়েই উচ্চস্তৰীয় সমিতিখনে ফলাফল ঘোষণাৰ পদ্ধতি মূল্যায়ন কৰি শীঘ্ৰে শিক্ষা বিভাগৰ হাতত প্ৰতিবেদন দাখিল কৰিব ।
ইফালে, বৈঠকৰ অন্তত সমিতিৰ অধ্যক্ষ ড° বুঢ়াগোহাঁইয়ে কয় যে, বৈজ্ঞানিকভাৱে বিবেচনা কৰি বস্তুনিষ্ঠভাৱে ফলাফল ঘোষণাৰ আৰ্হি প্ৰস্তুত কৰা হ’ব, যাতে সকলো পৰীক্ষাৰ্থীৰ বাবে এই আৰ্হিৰ গ্ৰহণযোগ্যতা থাকে । তেওঁ কয় যে, ইতিমধ্যে শিক্ষাৰ্থীসকলৰ পূৰ্বৰ পৰীক্ষাৰ পাৰদৰ্শিতাৰ তথ্য বিদ্যালয়সমূহৰ পৰা সংগ্ৰহ কৰা হৈছে । এই তথ্যসূত্ৰসমূহৰ ওপৰত ভিত্তি কৰি বস্তুনিষ্ঠ আৰু বৈজ্ঞানিক এই দুটা বস্তু সংযুক্ত কৰি মূল্যায়নৰ ব্যৱস্থা কৰা হ’ব । সংগ্ৰহ কৰা তথ্য অধ্যয়ন কৰা হৈছে, যাতে কোনো ত্ৰুটি থাকি নাযায় আৰু শীঘ্ৰে প্ৰতিবেদন চৰকাৰৰ হাতত দাখিল কৰা হ’ব বুলি তেওঁ কয় ।
উল্লেখ্য যে, উক্ত বৈঠকত নজনীয়া সমিতিখনৰ অন্যতম সদস্য তথা ছেবাৰ অধ্যক্ষ আৰ চি জইন, মাধ্যমিক শিক্ষাৰ উপ-সচিব এছ এন দাস, বিদ্যালয়সমূহৰ পৰিদৰ্শক প্ৰসন্ন বৰা, শিক্ষাবিদ ৰঞ্জিত ডাম, হাকিম তাৰাফদাৰ, চি বি ৰায়, মৃণাল খাউণ্ড আৰু সমিতিখনৰ সমন্বয়ক ছেবাৰ সচিব সুৰঞ্জনা সেনাপতি উপস্থিত থাকে ।