অতিমাৰী পৰিস্থিতিত অক্সিজেন আৰু প্ৰতিষেধকৰ নাটনি হৈ থকাৰ সময়তে প্ৰধানমন্ত্ৰী নৰেন্দ্ৰ মোদীৰ স্বপ্নৰ চেণ্ট্ৰেল ভিষ্টাৰ বাবে ৰাজকোষৰ অৰ্থৰ নাটনি হোৱা নাই । ফলত গংগাত উটিছে ক’ভিডত শ ৰোগীৰ মৃতদেহ, প্ৰতিখন ৰাজ্যতে জ্বলিছে চিতা ।
প্ৰধানমন্ত্ৰী মোদীৰ সপোন পূৰণ কৰিবৰ বাবে মহাত্মা গান্ধীৰ সবৰমতী আশ্ৰমৰ কাষত থকা দুশৰো অধিক দলিত পৰিয়ালক উচ্ছেদ কৰা হৈছে । সবৰমতী আশ্ৰমক প্ৰধানমন্ত্ৰী মোদীৰ উদ্যোগত ‘বিশ্বমানৰ পৰ্যটন কেন্দ্ৰ’ হিচাপে গঢ়ি তুলিবৰ বাবেই এই আশ্ৰমৰ ভূমিত বাস কৰা হৰিজনসকলক উচ্ছেদৰ প্ৰকল্প হাতত লৈছে কেন্দ্ৰই । ১৯১৭ত বাপুজীয়ে প্ৰতিষ্ঠা কৰা আশ্ৰমত পাঁচ প্ৰজন্ম ধৰি বাস কৰা হৰিজন পৰিয়ালবোৰক অন্য স্থানলৈ স্থানান্তৰ কৰিবৰ বাবে গুজৰাট চৰকাৰক নিৰ্দেশ দিছে কেন্দ্ৰীয় গৃহমন্ত্ৰী অমিত শ্বাহে ।
গৃহমন্ত্ৰী শ্বাহে কয় যে, প্ৰধানমন্ত্ৰীৰ ‘সপোনৰ প্ৰকল্প’ গঢ়ি তুলিবৰ বাবে উন্নয়ন কৰা হ’ব চত্বৰৰ । এই সন্দৰ্ভত শ্বাহৰ স’তে বৈঠকৰ পাছত আশ্ৰম ভ্ৰমণত যায় গুজৰাটৰ মুখ্যমন্ত্ৰী বিজয় ৰূপাণীৰ মুখ্য সচিব কে কৈলাসনাথ । ৰাজ্যৰ প্ৰস্তাৱ, এই আশ্ৰমবাসীসকলৰ বাবে বিকল্প বাসস্থানৰ ব্যৱস্থা কৰা হ’ব । তেওঁলোক ইয়াৰ বাবে মান্তি নহ’লে ৬০ লাখ টকাকৈ ক্ষতিপূৰণ দিয়া হ’ব ।
সবৰমতী আশ্ৰমৰ বিস্তৃত অংশত পাঁচখন বেচৰকাৰী স্বেচ্ছাসেৱী সংস্থাৰ কাৰ্যালয়ো আছে । গান্ধীৰ অনুপ্ৰেৰণাত নানান গঠনমূলক কাৰ্যসূচী চলায় এই সংস্থাবোৰে । এই পাঁচখন সংস্থাৰ প্ৰতিনিধিসকলক লৈ গঠিত উপদেষ্টা কমিটিৰ শীৰ্ষত আছে বিজয় ৰূপাণী । সূত্ৰ অনুসৰি, মোদীৰ ‘স্বপ্নৰ প্ৰকল্প’ৰ বাবে আশ্ৰমল দলিত পৰিয়ালসমূহক উচ্ছেদৰ পৰিকল্পনাৰ কথা চৰকাৰে এই প্ৰতিনিধিসকলক জনোৱা নাছিল ।
আশ্ৰমৰ বাসিন্দাসকলক ইতিমধ্যে চুক্তিপত্ৰত স্বাক্ষৰ কৰাৰ প্ৰস্তাৱ দিছে আহমেদাবাদ পৌৰসভাই । স্বাক্ষৰ কৰাসকলক আগতীয়াকৈ ২০ লাখ টকা দিয়া হৈছে । আশ্বাস দিয়া হৈছে গৃহ ত্যাগ কৰাৰ পাছত ৪০ লাখ টকা দিয়া হ’ব ।