‘ছেকেণ্ড হেণ্ড’ বিমান কিনিব বিচাৰে নেকি ? অতি শীঘ্ৰেই এই সুযোগ লাভ কৰিব । ১২খন বিমান নিলামত দিব বাংলাদেশে । যিকোনো দেশৰ নাগৰিক, চৰকাৰী বা বেচৰকাৰী সংস্থাই এই বিমান ক্ৰয় কৰিব পাৰিব ।
১২খন বিমানৰ বহুকেইখন শেষবাৰ উৰিছিল ২০১২তেই । বিগত ন বছৰ ধৰি ঢাকাৰ শ্বাহজালাল বিমানবন্দৰত পৰিত্যক্ত অৱস্থাত পৰি আছে ।
এই বিমানবোৰ বাংলাদেশৰেই বন্ধ হৈ যোৱা কিছুসংখ্যক বেচৰকাৰী উৰন সংস্থাৰ । ইয়াৰ ভিতৰত আঠখন ইউনাইটেড এয়াৰৱেজৰ, দুখন ৰিজেণ্ট এয়াৰৱেজৰ, এখন জিএমজি এয়াৰ লাইন্স আৰু এখন এভিয়ানা এয়ৰলাইন্সৰ ।
দীৰ্ঘদিন পাৰ্কিং মাচুলৰ বাবদ এই সংস্থাবোৰৰ পৰা বাংলাদেশী মুদ্ৰাত আঠশ কোটি টকা পাব আছে শ্বাহজালাল বিমানবন্দৰ কৰ্তৃপক্ষই । বকেয়া ধন শোধ নকৰাৰ বাবে নিলামত দিয়াৰ সিদ্ধান্ত লৈছে কৰ্তৃপক্ষই ।
চিভিল আইন অনুযায়ীয়েই নিলামত দিয়া হৈছে বিমানকেইখন । আশানুৰূপ মূল্য লাভ নকৰিলে কেজিৰ দৰত বিক্ৰী কৰি দিয়া হ’ব ১২খন বিমান ।
আগতেই বিমানকেইনৰ পঞ্জীয়ন বাতিল হৈছিল । বিমানবন্দৰৰ পৰা এইসমূহ আঁতৰ কৰিবৰ বাবে জাননীও দিয়া হৈছিল বহুবাৰ । কিন্তু শীৰ্ষ ন্যায়ালয়ৰ জাননীৰ কোনো প্ৰত্যুত্তৰ দিয়া নাছিল সংস্থাবোৰে ।
শ্বাহজালাল কৰ্তৃপক্ষই জনাইছে, কেৱল বকেয়া ধন সংগ্ৰহ কৰাই এই নিলামৰ উদ্দেশ্য নহয় । বিমানবন্দৰৰ স্থান দখল কৰি বছৰৰ পাছত বছৰ পৰি থকা পৰিত্যক্ত বিমানবোৰক আঁতৰ কৰাও তেওঁলোকৰ লক্ষ্য ।
ঢাকাৰ এই আন্তৰ্জাতিক বিমানবন্দৰৰ পৰিচালক গ্ৰুপ কেপ্টেইন এছএম টৌহিদুল আহছান । সংবাদ সংস্থাক দিয়া এক সাক্ষাৎকাৰত তেওঁ জনায়, শ্বাহজালালত তৃতীয় টাৰ্মিনেল তৈয়াৰ কৰা হৈছে । বিমানবোৰক আঁতৰ কৰিলে বন্দৰৰ স্থান ওলাব ।
শ্বাহজালালৰ কাৰ্গ’ ভিলেজৰ স্থান দখল কৰি বিগত আঠ বছৰ ধৰি পৰি আছে ১০খন বিমান । তৃতীয় টাৰ্মিনেলৰ বাবে কাৰ্গ’ ভিলেজৰ ঠাইডোখৰ খালি কৰিব লাগে বুলি জনায় টৌহিদুলে ।
ঢাকাৰ জিএমজি এয়াৰলাইন্স বন্ধ হয় ২০১২ত । ২০১৬ত ইউনাইটেড এয়াৰৱেজ । ২০২০ৰ মাৰ্চত বন্ধ হয় ৰিজেণ্ট এয়াৰলাইন্স । সম্পূৰ্ণ বন্ধ হোৱাৰ কেইবছৰমানৰ আগৰ পৰাই বহু কেইটা ৰুটত বিমান চলাচল বন্ধ কৰিবলৈ আৰম্ভ কৰিছিল সংস্থাবোৰে । তেতিয়াৰ পৰাই কেইখনমান বিমান ৰাখিবলৈ আৰম্ভ কৰিছিল শ্বাহজালালত ।
পাৰ্কিং চাৰ্জৰ বাবদ এতিয়া জিএমজি এয়াৰলাইন্সৰ পৰা বাংলাদেশী মুদ্ৰাত ৩৬০ টকা, ৰিজেণ্টৰ পৰা দুশ কোটি আৰু ইউনাইটেড এয়াৰৱেজৰ পৰা ১৯০ কোটি টকা পাব আছে শ্বাহজালাল বিমানবন্দৰ কৰ্তৃপক্ষই । ইয়াৰ ভিতৰত অৱশ্যে একমাত্ৰ ইউনাইটেড এয়াৰৱেজে বাংলাদেশৰ শ্বেয়াৰবজাৰৰ তালিকাভুক্ত ।
সম্প্ৰতি বিমানকেইখন নিলামত দিয়াৰ চূড়ান্ত সিদ্ধান্ত গ্ৰহণ কৰা হৈছে । টৌহিদুলে জনায়, নিলামৰ প্ৰক্ৰিয়া নিৰ্ধাৰণৰ কমিটীও গঠন কৰা হৈছে । ইয়াৰ উপৰি কেনেদৰে নিলাম কৰা হ’ব তাৰ প্ৰক্ৰিয়া আৰু অনুমোদনো প্ৰায় সমাপ্ত হোৱাৰ পথত ।
