‘ৰাজীৱ গান্ধী খেলৰত্ন পুৰস্কাৰ’ৰ নাম সলনি কৰিলে কেন্দ্ৰীয় চৰকাৰে । নতুন নাম দিয়া হৈছে ‘মেজৰ ধ্যানচন্দ খেলৰত্ন পুৰস্কাৰ’ । শুকুৰবাৰে এই কথা ঘোষণা কৰিলে প্ৰধানমন্ত্ৰী নৰেন্দ্ৰ মোদীয়ে ।
ধ্যানচন্দক ‘হকীৰ যাদুকৰ’ বুলি কোৱা হয় । টকিঅ’ অলিম্পিকত ভাৰতীয় পুৰুষ হকী দলে ব্ৰঞ্জ জয় কৰাৰ পাছৰ দিনাই খেলৰত্ন পুৰস্কাৰৰ নাম ধ্যানচন্দৰ নামত কৰাৰ কথা ঘোষণা কৰে প্ৰধানমন্ত্ৰী মোদীয়ে । আজি প্ৰধানমন্ত্ৰীগৰাকীয়ে টুইট কৰে, ‘খেলৰত্ন পুৰস্কাৰৰ নাম মেজৰ ধ্যানচন্দৰ নামত কৰিবৰ বাবে দেশৰ প্ৰচুৰ নাগৰিকৰ পৰা অনুৰোধ পাইছিলো । মতামত জনোৱাৰ বাবে তেওঁলোকক ধন্যবাদ জনাও । তেওঁলোকৰ ভাবধাৰাক সন্মান জনাই, খেলৰত্ন পুৰস্কাৰক মেজৰ ধ্যানচন্দ খেলৰত্ন পুৰস্কাৰ বুলি কোৱা হ’ব ।’
ক্ৰীড়া ক্ষেত্ৰত সাফল্যৰ বাবে ভাৰত চৰকাৰে প্ৰদান কৰা সৰ্বোচ্চ পুৰস্কাৰ হৈছে খেলৰত্ন । ১৯৯১-৯২ত প্ৰথমবাৰ এই পুৰস্কাৰ প্ৰদান কৰা হৈছিল । প্ৰথম পুৰস্কাৰটো পাইছিল দবা খেলুৱৈ বিশ্বনাথন আনন্দে । ক্ৰিকেটাৰ হিচাপে প্ৰথমবাৰ এই পুৰস্কাৰ লাভ কৰিছিল শচীন তেণ্ডুলকাৰে । ২০২০ত শেষবাৰ এই পুৰস্কাৰ দিয়া হৈছিল । আৰম্ভণিৰ পৰাই এই পুৰস্কাৰ প্ৰাক্তন প্ৰধানমন্ত্ৰী ৰাজীৱ গান্ধীৰ নামত দিয়া হৈছিল । প্ৰায় ৩০ বছৰৰ পাছত এই নাম পৰিৱৰ্তন কৰা হয় ।