তালিবানে ভয়ৰ কোনো কাৰণ নাই, সকলো পূৰ্বৰ দৰেই থাকিব বুলি কৈছে যদিও, আফগানিস্তানৰ নাৰী-শিক্ষা যে অন্ধকৰৰ দিশে, সে কথা নিশ্চিত । ১২ বছৰৰ ঊর্ধ্বৰ ছোৱালীবোৰৰ শিক্ষা নিষিদ্ধ কৰিছে তালিবানে । ইয়াৰ আগতেও কেৱল ধর্মীয় শিক্ষাত অনুমতি দিয়া হৈছে । বিগত ২০ বছৰত আফগান শিক্ষা ব্যৱস্থাৰ যি আধুনিকীকৰণ হৈছিল, তাৰ ক্ষয়ক্ষতি লৈ প্রবল আশংকা সৃষ্টি হৈছে । তালিবানৰ হাতত বিভিন্ন গৱেষণাপত্র, নথি, পুথি, শিক্ষাৰ্থীসকলৰ স্নাতকৰ শংসাপত্রও নষ্ট হ’ব পাৰে বুলিও ভয়ৰ সৃষ্টি হৈছে । এনে যাৱতীয় তথ্য-সম্পদ সংৰক্ষণ কৰিবলৈ আগবাঢ়ি আহিছে ‘ইউনিভার্চিটী অৱ কেলিফর্নিয়া, ডেভিচ’ (ইউচি ডেভিচ) ।
বিশ্ববিদ্যালয়ৰ তৰফৰ পৰা জনোৱা হৈছে যে, যিহেতু আফগানিস্তান এতিয়া তালিবানৰ দখলত, শিক্ষা ক্ষেত্রত সন্ত্ৰাসবাদী আক্ৰমণৰ শংকা প্ৰবল । সেয়ে গৱেষণাপত্র, পুৰণি নথিপত্র ধ্বংস কৰিব পাৰে তেওঁলোকে । শিক্ষাৰ্থীসকলৰ শিক্ষাগত যোগ্যতাৰ চার্টিফিকেট আৰু এই সংক্রান্ত অন্যান্য প্রয়োজনীয় সামগ্ৰীও ধ্বংস হৈ যাব পাৰে আক্ৰমণত । ছিৰিয়া, আফগানিস্তানত এনে ঘটনা পূর্বে সংঘটিত হৈছে ।
সেই অভিজ্ঞতাৰ পৰাই বিশ্ববিদ্যালয়ে জনাইছে, আফগান স্কুল-কলেজৰ শিক্ষাৰ্থীসকলে যদি বিচাৰে, তেওঁলোকে ‘ইউচিডেভিস বেকপেক’ প’র্টেলত তেওঁলোকৰ যাৱতীয় তথ্য জমা ৰাখিব পাৰে । কেৱল শিক্ষাৰ্থীসকলেই নহয়, শিক্ষাবিদ, মানৱ অধিকাৰ কর্মী আৰু অন্য জীৱিকাৰ স’তে জড়িত আফগানীসকলকো এই প’ৰ্টেল ব্যৱহাৰৰ বাবে আমন্ত্ৰণ জনাইছে কেলিফর্নিয়া বিশ্ববিদ্যালয়ে ।
এই বিষয়ত ‘ইউচিডেভিচ’ৰ ওয়েবচাইটত কিছু তথ্য জনোৱা হৈছে: ১) সকলো তথ্য ইন্টাৰনেটত সুৰক্ষিত থাকিব । ‘বেকপেক’ ব্যৱহাৰকাৰীসকলে যিকোনো সময়ত তেওঁলোকৰ নিজৰ নথি ব্যৱহাৰ কৰিব পাৰিব । ২) বিশ্বৰ যিকোনো প্রান্তত ব্যৱহাৰ কৰিব পাৰিব । ৩) কেৱল ব্যৱহাৰকাৰীয়েহে, নিজৰ নথি চাব পাৰিব, অন্যই নোৱাৰে । কোনো চৰকাৰী, বেচৰকাৰী সংস্থায়ো নোৱাৰে । ৪) বেকপেক ব্যৱহাৰকাৰীয়ে ইচ্ছা কৰিলে যিকোনো সময়ত তেওঁলোকৰ নথি প’র্টেলৰ পৰা মছি পেলাব পাৰিব । ৫) এই প’র্টেলৰ পৰা কোনো তথ্য বিক্রী কৰা নহয় । ৬) বেকপেক স্কলাৰশ্বিপ প্র’গ্রেম নহয়, কিন্তু স্কলাৰশ্বিপ পোৱাত সহায় কৰে । ৭) প’র্টেলে গোপনীয়তা আইন মানি চলে ।
এই প’র্টেল ব্যৱহাৰৰ বাবে ইংৰাজী আৰু দাৰি (আফগান ভাষা), দুটা ভাষাই আছে বুলি জনাইছে ইউচিডেভিচে । সম্পূর্ণ ব্যৱস্থাটো আফগানসকলৰ বাবে বিনামূলীয়া ।