তিনিচুকীয়া জিলাৰ ডুমডুমাস্থিত বীৰ ৰাঘৱ মৰাণ চৰকাৰী আদৰ্শ মহাবিদ্যালয়ত আজি তিনিটাকৈ জাতীয় সংগঠনে “ৰাজহুৱা শ্ৰমদান কাৰ্যসূচী” ৰূপায়ণ কৰে । সদৌ অসম ছাত্ৰ সন্থা, অসম জাতীয়তাবাদী যুৱ-ছাত্ৰ পৰিষদ আৰু সদৌ মৰাণ ছাত্ৰ সন্থাৰ নেতৃত্বত আজি পুৱাই মহাবিদ্যালয় চৌহদত উপস্থিত হৈ মহাবিদ্যালয়ত প্ৰৱেশ কৰা জৰাজীৰ্ণ তথা বোকাময় পথত শিল-ইটা দি মেৰামতি কৰাৰ লগতে মহাবিদ্যালয় চৌহদ পৰিস্কাৰ কৰি শ্ৰমদান কাৰ্যসূচী ৰূপায়ণ কৰে ।
উল্লেখযোগ্য যে, বৃহত্তৰ ডুমডুমা অঞ্চলৰ ছাত্ৰ-ছাত্ৰীক উচ্চ শিক্ষা প্ৰদানৰ লক্ষৰে ২০২০ বৰ্ষতেই সেই সময়ৰ শিক্ষামন্ত্ৰী তথা বৰ্তমানৰ মুখ্যমন্ত্ৰী ড° হিমন্ত বিশ্ব শৰ্মাই অসমীয়া জাতিৰ বীৰ ৰাঘৱ মৰাণৰ নামত ডুমডুমাত এখন আদৰ্শ মহাবিদ্যালয় প্ৰতিষ্ঠা কৰাৰ ঘোষণা কৰিলে, যদিও বৰ্তমানেও ডুমডুমা মহাবিদ্যালয়ৰ ছাত্ৰ-আৱাসতেই পাঠদান চলাই থকা হৈছে । বিগত বৰ্ষৰে পৰা পাঠদান আৰম্ভ হোৱা আৰ্দশ মহাবিদ্যালয়খনত ছাত্ৰ-ছাত্ৰীৰ অধ্যয়ণৰ সুবিধা মাত্ৰ ১২০ জন যদিও বিগত বৰ্ষত প্ৰায় চাৰিশৰো অধিক ছাত্ৰ-ছাত্ৰীয়ে প্ৰথম ষাণ্মাষিকৰ পৰা বৰ্তমান দ্বিতীয় ষাণ্মাষিকলৈ উৰ্ত্তীণ হৈছে ৷
ইফালে, এই বৰ্ষতো আদৰ্শ মহাবিদ্যালয়খনত বৰ্তমানলৈকে প্ৰায় ২৭৫ গৰাকী ছাত্ৰ-ছাত্ৰীয়ে অনলাইন যোগে নামভৰ্তিৰ বাবে পঞ্জীয়ন কৰিছে ৷ গতিকে মহাবিদ্যালয়খন স্থায়ীভাৱে প্ৰতিষ্ঠা কৰি গুৰুত্ব দিবলৈ ৰজাঘৰীয়াক দল-সংগঠনসমূহে চৰকাৰক দাবী জনাইছে ।