মানাহ ৰাষ্ট্ৰীয় উদ্যানৰ সমীপৱৰ্তী তথা বাগসাৰ শালবাৰীৰ কাচিমদহা নৈত শনিবাৰে নিশাৰ ভাগত এজন যুৱকৰ মৃতদেহ উদ্ধাৰ হয় ৷
উদ্ধাৰ হোৱা মৃতদেহটো বৰপেটা ৰোডৰ যুৱক চিন্ময় দাস(১৭)ৰ বুলি আৰক্ষী আৰু পৰিয়ালৰ লোকে চিনাক্ত কৰিছে৷ শনিবাৰে আবেলি নিজৰ ককায়েকৰ লগতে লগৰীয়াৰ স’তে মানাহলৈ ফুৰিবলৈ আহি জ্ঞাতিগাঁৱৰ কাষৰীয়া মানাহ ৰাষ্ট্ৰীয় উদ্যানৰ মাজেৰে বৈ অহা কাচিমদহা নামৰ নৈখনত গা ধুবলৈ গৈ সন্ধানহীন হৈছিল যুৱকজন ৷
তৎমুহূৰ্ততে হুৱাদুৱা লাগে উপস্থিত থকা লোকসকলৰ মাজত ৷যিয়ে যেনেকৈ পাৰে যুৱকজনক বচাবলৈ উঠিপৰি লাগে যদিও নৈৰ বুকুতেই সন্ধানহীন হৈ পৰে যুৱকজন ৷
পৰৱৰ্তী সময়ত ঘটনাস্থলীত শালবাৰী আৰক্ষী,বাঁহবাৰী আৰক্ষী আৰু এছডিআৰএফ বাহিনী উপস্থিত হৈ প্ৰায় এঘণ্টাজোৰা বিচাৰ খোচাৰৰ অন্তত নিশাৰ ভাগত যুৱকজনৰ মৃতদেহ উদ্ধাৰ কৰিবলৈ সক্ষম হয় ৷
উল্লেখ্য যে চিন্ময় দাস নামৰ যুৱকজনে এইবেলি হাইস্কুল শিক্ষান্ত পৰীক্ষাত উত্তীৰ্ণ হৈ বজালীৰ পাঠশালাৰ শ্ৰীৰাম একাডেমি নামৰ শিক্ষানুষ্ঠানখনত উচ্চতৰ মাধ্যমিকত নামভৰ্তি কৰিছিল ৷
বৰপেটাৰ বাউসী বাণীকান্ত কাকতি কলেজৰ অধ্যাপক তথা বৰপেটা ৰোড নিবাসী গিৰিধাৰী দাসৰ দ্বিতীয় পুত্ৰ আছিল চিন্ময় দাস ৷