শান্তিপূর্ণ পদ্ধতিৰে প্ৰতিবাদ কৰি থকা আফগানিস্তানৰ মানুহ আৰু সাংবাদিকসকলৰ ওপৰত যিদৰে দমন-পীড়ন কৰি আছে তালিবানে, তাক লৈ উদ্বেগ প্রকাশ কৰিছে ৰাষ্ট্ৰসংঘই । শীঘ্ৰে সকলোবোৰ বন্ধ কৰিবৰ বাবে তালিবানক আহ্বান জনোৱা হৈছে ।
আজি এক বিবৃতিত ৰাষ্ট্ৰসংঘৰ মানৱ অধিকাৰ ৰক্ষা শাখাৰ হাইকমিচনাৰ ৰবিনা শামদশানিয়ে কয়, ‘‘বিগত চাৰি সপ্তাহ ধৰি আফগানিস্তানৰ বিভিন্ন প্রদেশত যি শান্তিপূর্ণ বিক্ষোভ চলিছে, হিংসাৰ মাধ্যমত তাৰ প্রতিক্রিয়া জনাইছে তালিবানে । বিক্ষোভকাৰীসকলৰ ওপৰত অস্ত্র-শস্ত্র, লাঠি আৰু চাবুকৰ ব্যৱহাৰ কৰা হৈছে ।’’
ৰাষ্ট্ৰসংঘৰ মতে, দেশত এই চূড়ান্ত অনিশ্চয়তাৰ সময়ত আফগানিস্তানৰ নাৰী-পুৰুষ ৰাস্তাত ওলাই আহিছে । নাৰীসকলৰ অধিকাৰ ৰক্ষা, শিক্ষা আৰু ৰাজনীতিত যোগদানৰ অধিকাৰ, মানৱ অধিকাৰ ৰক্ষাৰ দাবীক লৈ সৰৱ হৈছে তেওঁলোক । ফলত যিয়ে ক্ষমতা দখল কৰিছে, তেওঁলোকে আফগান জনগণৰ এই কথা শোনা উচিত ।
তালিবানে যিদৰে এই ধৰণৰ শান্তিপূর্ণ বিক্ষোভক বেআইনী ঘোষণা কৰিছে আৰু কাবুলত ইন্টাৰনেট বন্ধ কৰিছে, তাক লৈও ৰাষ্ট্ৰসংঘই ক্ষোভ প্রকাশ কৰিছে ।
বিবৃতিত কোৱা হৈছে, যোৱা ১৫ আগষ্টৰ পৰা আফগানিস্তানৰ বিভিন্ন প্রান্তত বিক্ষোভ প্ৰদৰ্শন কৰিছিল সাধাৰণ জনতাই । বিক্ষোভকাৰীসকলৰ সংখ্যা ক্রমশ বাঢ়ি আছে । কিন্তু যোৱা বুধবাৰ সন্ধিয়া তালিবানৰ তৰফৰ পৰা জনোৱা হয়, এই ধৰণৰ প্রতিবাদ বেআইনী । বিক্ষোভ প্ৰতিৰোধ কৰিবলৈ শক্তিপ্রয়োগ কৰা আৰম্ভ কৰে । ইয়াকে লৈ বিভিন্ন সাংবাদিকৰ কথা দাঙি ধৰি উদ্বেগ প্রকাশ কৰা হৈছে ৰাষ্ট্ৰসংঘৰ বিবৃতিত ।
আফগানিস্তানত নিজৰ অধিকাৰ ৰক্ষা কৰিবলৈ পথত নমা দেশৰ মহিলাসকলক বলপ্রয়োগ কৰি প্ৰতিৰোধ কৰাৰ চেষ্টা কৰিছে তালিবানে । ইয়াৰোপৰি, প্ৰতিবাদৰ খবৰ কৰিবলৈ গৈ হিংসাৰ বলি হয় স্থানীয় সাংবাদিকসকল ।
কেইদিনমান আগতেই দুজন স্থানীয় সাংবাদিকক বিক্ষোভস্থলীৰ পৰাই হাত বান্ধি কাবুলৰ এখন থানালৈ লৈ যোৱা হৈছিল । তাৰ পাছত তেওঁলোকক মাৰ-ধৰ কৰে তালিবানে । একেলেথাৰি ১০ মিনিট ধৰি তেওঁক মাৰ-ধৰ কৰে বুলি অভিযোগ কৰিছে সেই সাংবাদিকসকলৰে এজনে ।
আফগানিস্তানৰ দুই সাংবাদিকৰ ওপৰত সেই নৃশংস অত্যাচাৰৰ ছবি সম্প্রতি প্রকাশ পাইছে সামাজিক মাধ্যমত । ৰাষ্ট্ৰসংঘৰ বিবৃতিত বিষয়টো উল্লেখ কৰি কোৱা হৈছে, ‘‘কোনো সমাবেশক বেআইনী ঘোষণা কৰাৰ পাছতো সাংবাদিকসকলে যদি তাৰ খবৰ কৰিবলৈ যায়, তেন্তে তেওঁলোকৰ ওপৰত হিংসা আৰু বলপ্রয়োগ কৰিব নোৱাৰে ।’’