দুৰ্গাপূজাৰ এৰাব নোৱাৰা অংগ যাত্ৰাদল সমূহক নাট পৰিবেশন কৰিবলৈ পূজাৰ পূৰ্বে নতুন এছঅ’পি ঘোষণা কৰি অনুমতি প্ৰদান কৰিবলৈ চৰকাৰক দাবী জনাইছে সদৌ অসম যাত্ৰাদল প্ৰযোজক সন্থাই ।
বৃহস্পতিবাৰে গুৱাহাটী প্ৰেছ ক্লাৱত এক সংবাদমেলযোগে এই দাবী জনাই সন্তগাৰ সভাপতি নব শৰ্মাই কয়, ‘ক’ভিড পৰিস্থিতি কিছু উন্নত হোৱাৰ পৰিপ্ৰেক্ষিতত ৰাজ্যৰ পৰিৱেশ স্বাভাৱিক অৱস্থালৈ ঘূৰি আহিছে । যাৰ বাবে অসম চৰকাৰে ক’ভিড বিধি মানি দুৰ্গাপূজা অনুষ্ঠিত কৰিবলৈ অনুমতি প্ৰদান কৰিছে । দুৰ্গাপূজাৰ এক এৰাব নোৱাৰা অংগ হৈছে যাত্ৰাদল । এই সময়ছোৱাৰ বাবেই যাত্ৰাদলৰ শিল্পী কলা-কুশলী হেঁপাহেৰে ৰৈ থাকে । যোৱা দুটা বছৰে শিল্পীসকল মঞ্চত উঠা নাই । এইবাৰ যিহেতু দূৰ্গাপূজা অনুষ্ঠিত হ’ব সেয়েহে যাত্ৰাদলে নাটক পৰিবেশন কৰিব পৰাকৈ চৰকাৰে যেন এক নতুন এছঅ’পি ঘোষণা কৰে । আমি এই ক্ষেত্ৰত মুখ্যমন্ত্ৰীৰ পৰা ইতিবাচক সঁহাৰি পাম বুলি আশা কৰিলো ।
লগতে, বিগত দুটা বছৰে অসমৰ যাত্ৰাদল প্ৰযোজকসকলে বৃহৎ ক্ষতিৰ সন্মুখীন হৈছে । ভ্ৰাম্যমাণ থিয়েটাৰৰ প্ৰযোজকৰ সমস্যাক গুৰুত্ব প্ৰদান কৰা চৰকাৰখনে কিন্তু একে সময়তে যাত্ৰাদলৰ প্ৰযোজকসকলক উপেক্ষা তথা অনাদৰ কৰি আহিছে । আমি যাত্ৰাদলৰ প্ৰযোজক সন্থাৰ তৰফৰ পৰা যাত্ৰাদলৰ প্ৰযোজকসকলক অতি কমেও পাঁচ লাখ টকা ক্ষতিপূৰণ দিয়াৰ বাবে অনুৰোধ জনালো । লগতে, যাত্ৰাদলৰ অভিনেতা-অভিনেত্ৰী , শিল্পী, কলা-কুশলীক এককালীন আৰ্থিক সাহায্য দিয়াৰ বাবে দাবী উত্থাপন কৰিলো ।
ইয়াৰ লগতে যাত্ৰাদলৰ প্ৰযোজক, শিল্পী, কলা-কুশলীক পেঞ্চন দিয়াৰ ব্যৱস্থা কৰা আৰু অসমত যিমানবোৰ টোলগেট আছে তাত প্ৰতিটো যাত্ৰাদলৰ বাহনসমূহৰ কৰ উঠাই দিয়াৰ দাবী জনালো ।’