বৃষ্টিপাত আৰু তাৰ ফলত হৰপ্পা বানৰ কবলত পৰি উত্তৰাখণ্ডৰ নাইনিতালত প্ৰায় ১৬ জনৰ মৃত্যু হৈছে । এই পৰ্যন্ত বহু লোক সন্ধানহীন । মৃত্যুৰ সংখ্যা আৰু বৃদ্ধি পাব পাৰে বুলি শংকা প্ৰকাশ কৰিছে । তিনিদিন ধৰি প্রবল বৃষ্টিপাত হৈছে উত্তৰাখণ্ডত । ফলত নাইনিতালৰ পানী উপচি চহৰত সোমাইছে । পানীৰ তীব্ৰতাত সেতু বৈ গৈছে । আৱদ্ধ হৈ থকা বাসিন্দাসকলৰ উদ্ধাৰকাৰ্য আৰম্ভ কৰিছে ৰাষ্ট্ৰীয় বিপর্যয় প্ৰশমন বাহিনীয়ে ।
এই প্রসংগত উত্তৰাখণ্ডৰ মুখ্যমন্ত্রী পুষ্কৰ সিং ধামিয়ে সংবাদ মাধ্যমক কয়, ‘‘প্রধানমন্ত্রী নৰেন্দ্র মোদী আৰু কেন্দ্রীয় গৃহমন্ত্রী অমিত শ্বাহে পৰস্থিতিৰ বুজ লৈছে । ঘৰ, সেতু ভাঙি পৰিছে । এই পর্যন্ত ১৬ জনৰ মৃত্যুৰ খবৰ পোৱা গৈছে । ভাৰতীয় বায়ুসেনাৰ তিনিটা হেলিকপ্টাৰক উদ্ধাৰকাৰ্যত নামোৱা হৈছে ।’’
বিপর্যয়ৰ বহু ভিডিঅ’ প্রকাশ পাইছে সামাজিক মাধ্যমত । দেখা গৈছে নদীৰ পানী ভয়ংকৰ হৈ উঠিছে । ফলত নদীৰ নিকটৱৰ্তী অঞ্চলত বহু গৃহ ভাঙি গৈছে । চালথি নদীৰ ওপৰত এটা নির্মীয়মান সেতু উটি গৈছে । নাইনিতালৰ মল ৰোড পানীত বুৰ গৈছে । বহু ঠাইত ভূমিস্খলন হৈছে । হ্রদৰ কাষৰ এটা হাস্পাতালৰ দেৱালটো ফাট মেলিছে ।
উত্তৰাখণ্ডৰ জলাধাৰবোৰ পানীৰে উপচি পৰাত নানক সাগৰ আৰু উধম সিং নগৰ জলাধাৰৰ পৰা পানী এৰিবলৈ বাধ্য হৈছে প্রশাসন । ফলত বান পৰিস্থিতি আৰু বেয়া হৈছে । ইতিমধ্যে চাৰধাম যাত্রা বন্ধ কৰিছে প্রশাসনে । তাত আৱদ্ধ হৈ থকা পর্যটকসকলক নিজ ৰাজ্যত উভতাই অনাৰ ব্যৱস্থা কৰিছে চৰকাৰে ।