বিগত ডেৰ বছৰত অতিমাৰীৰ কবলত সকলোৱে প্রায় পাহৰিয়ে গৈছে কৰ’নাৰ বাহিৰে অন্যান্য অসুখৰ কথা । কিন্তু ভাৰতবর্ষৰ দৰে দেশত ডেংগী, মেলেৰিয়া, যক্ষ্মাৰ দৰে ৰোগত প্রতি বছৰেই বহু লোকে প্রাণ হেৰুৱাই । সম্প্রতি ৰাজধানীত বৃদ্ধি পাইছে ডেংগীৰ সংক্রমণ । ডেংগীৰ সময়ত শৰীৰ দুর্বল হৈ পৰে । খোৱা-বোৱাৰ ক্ষেত্রত কিছু সাৱধানতা অৱলম্বন কৰিলে দুর্বলতা কমে । এই সময়ত কি কি খাব আৰু কি কি খাব নালাগে ?
কি খাব লাগে :
১) অমিতা পাতৰ ৰস : গৱেষণা অনুসৰি অমিতা পাতৰ ৰসে অনুচক্রিকাৰ সংখ্যা বৃদ্ধি কৰে । ডেংগীৰ ফলত শৰীৰত অনুচক্রিকাৰ মাত্রা অস্বাভাৱিক হাৰত হ্রাস পায় । সেয়ে অমিতা পাতৰ ৰস এই সময়ত খুবেই উপকাৰী । ইয়াৰ উপৰি ইয়াত পাপাইন আৰু কাইমোপাপাইনৰ দৰে উপকাৰী এনজাইমো থাকে ।
২) ডালিম : আলিমত প্রচুৰ পৰিমাণে আয়ৰন থাকে । ফলত দেহৰ শক্তি বৃদ্ধি হয়, অনুচক্রিকাৰ সংখ্যা বৃদ্ধি কৰাটো সহায় কৰে ।
৩) দৈ : দৈনন্দিন খাদ্যৰ তালিকাত দৈৰ দৰে প্র’বায়’টিক ৰখা অতি প্ৰয়োজনীয় । ই দেহৰ ৰোগ প্রতিৰোধ ক্ষমতা বৃদ্ধি কৰে ।
৪) নাৰিকল পানী : জ্বৰৰ পার্শ্ব-প্রতিক্রিয়া হিচাপে শৰীৰত পানীৰ পৰিমাণ কমা খুবেই স্বাভাৱিক । ই দেহত পানীৰ অভাৱ পূৰণ কৰিব, তদুপৰি পুষ্টি আৰু বিভিন্ন ইলেক্ট্র’লাইট সমৃদ্ধ এই নাৰিকল পানীয়ে দৈহিক শক্তিও বৃদ্ধি কৰিব ।
৫) ব্রকলি : ব্রকলিত প্রচুৰ পৰিমাণে ভিটামিন কে থাকে যি অনুচক্রিকা পুনৰুৎপাদনত সহায় কৰে । অন্যান্য পুষ্টিৰেও পৰিপূৰ্ণ ব্রকলি ।
কি খাব নালাগে :
১) ভজা-পুৰা খাদ্য : ডেংগীৰ সময়ত পাতল আহাৰ গ্ৰহণ কৰিব লাগে । ভজা-পুৰা খাদ্যই ৰক্তচাপ বৃদ্ধি কৰিব পাৰে । ৰোগ প্রতিৰোধ ক্ষমতাও কমি যায় । সেয়ে এই সময়ছোৱাত এনে ধৰণৰ খাদ্য গ্ৰহণ নকৰাই ভাল ।
২) জলা-মছলালাযুক্ত খাদ্য : জলা খাদ্যই পাকস্থলিত এচিড উৎপাদন কৰে, যিয়ে আলছাৰৰ শংকা বৃদ্ধি কৰে । আৰোগ্য লাভৰ সময়ো দীর্ঘায়িত হয় । এই সময়ত যিকোনো জলা খাদ্য নোখোৱাই ভাল ।
৩) চাহ-কফি : জ্বৰৰ সময়ত গোটেই দিন ঘৰত থাকিলে বাৰে বাৰে চাহ-কফি জাতীয় পানীয় খাব মন যায় । কিন্তু সাৱধান, ইয়াৰ পৰা আঁতৰি চলিব । কাৰণ, চাহ-কফিয়ে দেহত পানীৰ অভাৱৰ সৃষ্টি কৰে ।