সাম্প্ৰতিক ভাৰতৰ সবাতোকৈ বিত্তশালী ৰাজনৈতিক দল বিজেপিয়ে নিৰ্বাচনত বিপুল পৰিমাণৰ অৰ্থ ব্যয় কৰাটো অনাকাংক্ষিত নহয় যদিও মাত্ৰ পাঁচখন ৰাজ্যৰ বিধানসভাৰ নিৰ্বাচনত বিজেপিৰ ব্যয় সম্প্ৰতি চৰ্চাৰ বিষয় হৈছে । কিয়নো চলিত বৰ্ষত অনুষ্ঠিত হোৱা পাঁচ ৰাজ্যৰ বিধানসভাৰ নিৰ্বাচনত ২৫২ কোটি টকা ব্যয় কৰে বিজেপিয়ে । অৱশ্যে এয়া দলে আনুষ্ঠানিকভাৱে নিৰ্বাচন আয়োগক দাখিল কৰা হিচাপ ।
ভাৰতীয় ৰাজনীতিত এই আনুষ্ঠানিক হিচাপৰ বাহিৰত প্ৰতিটো ৰাজনৈতিক দলেই অধিক অৰ্থ ব্যয় কৰাটো দীৰ্ঘদিনীয়া পৰম্পৰা । এই দিশটোলৈ লক্ষ্য কৰিলে পাঁচ ৰাজ্যত নিৰ্বাচনৰ বাবে বিজেপিৰ অৰ্থ ব্যয় বহুগুণে অধিক হ’ব বুলি বিশেষজ্ঞ মহলে ধাৰণা কৰে ।
উল্লেখ্য যে চলিত বৰ্ষত পশ্চিমবংগ, অসম, কেৰালা, তামিলনাডু, আৰু পুডুচেৰী এই পাঁচ ৰাজ্যৰ নিৰ্বাচন অনুষ্ঠিত হয় । ইয়াৰে ভিতৰত অসম আৰু পুডুচেৰীত ক্ষমতা হস্তগত কৰিবলৈ সক্ষম হয় বিজেপি । নিৰ্বাচন আয়োগক দেশৰ সৰ্ববৃহৎ তথা সৰ্বাধিক সম্পদশালী দল বিজেপিয়ে দাখিল কৰা হিচাপ অনুসৰি, ব্যয় কৰা ২৫২ কোটি দুই লাখ ৭১ হেজাৰ ৭৫৩ টকাৰ ৬০ শতাংশ ব্যৱহাৰ কৰা হয় পশ্চিমবংগত । মমতা বেনাৰ্জী নেতৃত্বাধীন তৃণমূল কংগ্ৰেছক ক্ষমতাৰ পৰা উৎখাতৰ বাবে এই ধন ব্যয় কৰে বিজেপিয়ে ।
পশ্চিমবংগক বাদ দি আন চাৰি ৰাজ্যৰ ভিতৰত বিজেপিয়ে অসমত ক্ষমতা ধৰি ৰখাৰ বাবে সৰ্বাধিক ব্যয় কৰে । অসমত বিজেপি চৰকাৰ থকাৰ পাছতো ইয়াৰ ধাৰাবাহিকতা অক্ষুণ্ণ ৰখাৰ বাবে দলটোৱে ব্যয় কৰে ৪৩ কোটি ৪১ লাখ টকা । আনহাতে, পশ্চিমবংগত ব্যয় কৰে ১৫১ কোটি টকা । বাকী অসমকে ধৰি চাৰিখন ৰাজ্যৰ মুঠ ব্যয় আছিল ১০১ কোটি ।
অসমত ৪৩ কোটি ৪১ লাখ টকা ব্যয় কৰি ৬০খন আসন দখল কৰে বিজেপিয়ে । উত্তৰ-পূব ভাৰতৰ এই ৰাজ্যখনত ক্ষমতা ধৰি ৰখাটো প্ৰধানমন্ত্ৰী নৰেন্দ্ৰ মোদী, অমিত শ্বাহৰ দলৰ বাবে গুৰুত্বপূৰ্ণ আছিল । দেশৰ আন অংশৰ লগতে উত্তৰ-পূৰ্বাঞ্চলত শক্তিশালী খোপনি ৰখাটো বিজেপিৰ বাবে এক অন্যতম লক্ষ্য । ইয়াৰ বাবে অসম বিজেপিৰ বাবে অন্যতম লক্ষ্যস্থলী বুলি বিবেচিত হৈছে ।
মন কৰিবলগীয়া যে প্ৰতিটো ৰাজনৈতিক দলে নিৰ্বাচন আয়োগক আয়-ব্যয়ৰ খাতিয়ান দাঙি ধৰিব লাগে । কেৰালাৰ পৰা বাওঁদলক উৎখাত কৰিবলৈ বিজেপিয়ে চেষ্টা চলাইছিল যদিও সফল নহ’ল । কেৰালাত বিজেপিয়ে ২৯ কোটি ২৪ লাখ টকা ব্যয় কৰে যদিও এখনো আসন দখল কৰিবলৈ সক্ষম নহ’ল । আনহাতে, বিগত নিৰ্বাচনত তামিলনাডুত বিজেপিয়ে মাত্ৰ ২.৯ শতাংশ ভোটহে লাভ কৰিছে । তামিলনাডুত দলে ব্যয় কৰে ২২ কোটি ৯৭ লাখ টকা । ইপিনে, পুডুচেৰীত চাৰি কোটি ৭৯ লাখ টকা ব্যয় কৰি ক্ষমতা দখলত সফল হৈছে বিজেপি ।
ইয়াৰ বিপৰীতে পশ্চিমবংগত ১৫১ কোটি টকা ব্যয় কৰিলেও তৃণমূলক ক্ষমতাচ্যুত কৰাত সফল নহ’ল । তৃতীয়বাৰৰ বাবে মমতা ক্ষমতাত অধিষ্ঠিত হয় । অৱশ্যে প্ৰথমবাৰৰ বাবে ৰাজ্যখনত মূল বিৰোধী দলৰ স্থান দখল কৰিবলৈ সক্ষম হ’ল বিজেপিয়ে । কংগ্ৰেছ-বাওঁদলসমূহ যুদ্ধক্ষেত্ৰৰ পৰা একপ্ৰকাৰ অন্তৰ্ধান হৈছে ।
