কোকৰাঝাৰ জিলাৰ গোসাঁইগাঁও সদৰ চহৰৰ বজাৰ এলেকাত তথা গোসাঁইগাঁও পৌৰ সভা কাৰ্য্যলয়ৰ গাতে লাগি থকা স্থানত জাৱৰৰ দম আৰু দূৰ্গন্ধময় পৰিৱেশত অতিষ্ঠ ব্যৱসায়ী তথা ৰাইজ । অভিযোগ মতে, গোসাঁইগাঁও চহৰৰ মাছ-মাংস বজাৰ আৰু নাটমন্দিৰ প্ৰাংগণৰ ঠাইবোৰৰ অপৰিচ্ছন্নতাই সমগ্ৰ অঞ্চলটোত দূৰ্গন্ধময় পৰিৱেশৰ সৃষ্টি কৰিছে ।
আনকি পৌৰ সভাৰ কাৰ্য্যালয়ৰ ঠিক সন্মুখত মুকলি প্ৰসাৱগাৰ আৰু লেতেৰা জাৱৰৰ দমে বজাৰজুৰি দূৰ্গন্ধ বিয়পাই দিয়ে । বিশেষকৈ মাছ-মাংস বজাৰৰ জাৱৰ-জোথৰ সময় মতে পৰিষ্কাৰ নকৰাত নাক বন্ধ কৰি বজাৰ কৰিব লগা হৈছে জনসাধাৰণে ।
দীৰ্ঘদিনীয়া এই সমস্যা সমাধানৰ বাবে ব্যৱসায়ীসকলে পৌৰ সভাৰ ওচৰত বহুবাৰ আবেদন-নিবেদন কৰিছে যদিও কোনো পদক্ষেপ গ্ৰহণ কৰা নাই । ৰাইজে আৰু অভিযোগ কৰে পৌৰ সভা নিয়োজিত এটা এন জি অ’ই স্বচ্ছতাৰ নামত দোকানৰ পৰা মাহত এশ টকাকৈ আদায় লয় । স্বচ্ছ ভাৰত অভিযান এই ক্ষেত্ৰত সম্পূৰ্ণ ব্যৰ্থ হোৱা বুলি ৰাইজে অভিযোগ কৰে ।