বিগত কিছু বছৰ ধৰি এক দুষ্ট চক্ৰই বেঁকী নৈত অবৈধ খনন চলাই আহিছে । যাৰ বাবে বেঁকী নৈৰ কাষৰীয়া দোমনি, কাটাঝাৰ, বাৰাপেটা, আইৰমাৰি আদি অঞ্চলত গৰাখহনীয়াই কালৰূপ ধাৰণ কৰিছিল ৷ বৃহত্তৰ অঞ্চলৰ হেজাৰ হেজাৰ বিঘা কৃষিমাটি, আবাসভূমি খহাই নিছে বেঁকী নৈয়ে ৷ তাৰ পাছতেই আজি অঞ্চলটোৰ বৃহৎসংখ্যক ৰাইজে ওলাই আহি বাগসাৰ সীমান্তৱৰ্তী বৰপেটা জিলাৰ দোমনিঘাটত বেঁকী নৈত অবৈধ খননৰ বিৰুদ্ধে তীব্ৰ প্ৰতিবাদ সাব্যস্ত কৰে ৷
প্ৰথমে কুৱেৰীৰ গাড়ী অহা-যোৱা কৰা পথটো অৱৰোধ কৰে আৰু ইয়াৰ পাছতে মাইকযোগে সমদল কৰি কুৱেৰী বন্ধ কৰাৰ দাবী উত্থাপন কৰে প্ৰতিবাদী ৰাইজে ৷ এই খননৰ লগত জনৈক বন বিষয়া জড়িত থকাৰো গুৰুতৰ অভিযোগ উত্থাপন কৰে প্ৰতিবাদকাৰীসকলে ৷ শীঘ্ৰেই এই অবৈধ খনন বন্ধ কৰিবলৈ হুংকাৰ প্ৰদান কৰে প্ৰতিবাদী ৰাইজে ৷ অবৈধ খনন বন্ধ নকৰিলে তীব্ৰ জংঘী আন্দোলন গঢ়ি তোলাৰ হুংকাৰ প্ৰদান কৰে প্ৰতিবাদী ৰাইজে ৷
উল্লেখ্য যে প্ৰতিবাদকাৰীসকলে ‘বন বিভাগ হায় হায়’, ‘বন মন্ত্ৰী হায় হায়’, ‘বন বিষয়া মুৰ্দাবাদ’ আদি শ্ল’গানেৰে দোমনিৰ পৰিৱেশ উত্তাল কৰি তোলে ৷ উল্লেখ্য যে আজি প্ৰতিবাদী সমদল উলিওৱাৰ সময়ত প্ৰতিবাদী ৰাইজ আৰু অবৈধ শিলবালি মহলৰ লগত জড়িত একাংশৰ মাজত খণ্ডযুদ্ধৰো সৃষ্টি হয় ৷
