বিধানসভা নিৰ্বাচনৰ পূৰ্বে চাপত পৰি আৰু এটা বিল প্রত্যাহাৰ কৰিলে বিজেপি চৰকাৰে । এইবাৰ উত্তৰাখণ্ডৰ বিতর্কিত ‘চাৰ ধাম দেৱস্থান ব’র্ড আইন’ প্রত্যাহাৰ কৰিলে ৰাজ্যৰ বিজেপি চৰকাৰে । এই আইনটোক লৈ প্রায় দুবছৰ ধৰি অটল হৈ আছিল যদিও নিৰ্বাচনৰ আগতে ৰাজ্যৰ প্রভাৱশালী পুৰোহিত সমাজ আৰু বিৰোধী কংগ্রেছৰ চাপৰ বাবে বিলখন প্রত্যাহাৰ কৰিবলৈ বাধ্য হয় পুষ্কৰ সিং ধামী । মঙলবাৰে দেহৰাদূনত বিলখন প্রত্যাহাৰৰ কথা ঘোষণা কৰে মুখ্যমন্ত্রীগৰাকীয়ে ।
২০১৭ত ক্ষমতাত অহাৰ পাছৰ পৰাই চাৰ ধামৰ নিয়ন্ত্রণ হাতত ৰখাৰ বাবে সক্রিয় হয় ৰাজ্যৰ বিজেপি চৰকাৰ । ১৯৩৯ৰ এটা আইন অনুযায়ী পৰিচালিত হৈছিল কেদাৰনাথ, বদ্রীনাথ আৰু ৪৫টা মন্দিৰ । সমিতিৰ সভাপতিত্ব কৰে চৰকাৰৰ দ্বাৰা নিযুক্ত ব্যক্তিয়ে । চিইঅ’ৰ দায়িত্ব লয় চৰকাৰৰে কোনো শীর্ষ বিষয়াই । ২০১৯ৰ ডিচেম্বৰত, ত্রিবেন্দ্র সিং ৰাৱতৰ মুখ্যমন্ত্রিত্বত মন্দিৰসমূহৰ ওপৰত চৰকাৰৰ নিয়ন্ত্রণ বৃদ্ধি কৰিবলৈ পাছ হয় ‘চাৰ ধাম দেৱস্থান ব’র্ড বিল’ । জানুৱাৰীত গঠিত হয় ‘উত্তৰাখণ্ড চাৰ ধাম দেৱস্থান ব’র্ড’ ।
বিল পাছ হোৱাৰ পাছৰ পৰাই তীব্র ক্ষোভ প্ৰকাশ কৰে পুৰোহিত সমাজে । বিজেপিক ‘ধর্ম বিৰোধী’ বুলি কটাক্ষ কৰে কংগ্রেছে । অভিযোগ অনুসৰি, মন্দিৰৰ ওপৰত চৰকাৰী নিয়ন্ত্রণ জাপি দিয়াৰ চেষ্টা কৰিছে বিজেপিয়ে । বিল পাছ হোৱাৰ পাছৰ পৰা একাধিকবাৰ ৰাজ্যৰ মন্ত্রীসকলে পুৰোহিতসকলৰ বিক্ষোভৰ সন্মুখীন হ’বলগীয়া হৈছে । কেদাৰনাথত গ’লে পুৰোহিতসকলৰ বিক্ষোভৰ সন্মুখীন হ’বলগীয়া হয় প্রাক্তন মুখ্যমন্ত্রী ৰাৱপিছু হটেছেনতেও । তেনে সময়তে নিৰ্বাচনত নেতিবাচক প্রভাৱ পৰাৰ শংকাত বিলখন প্রত্যাহাৰ কৰে নতুন মুখ্যমন্ত্রীয়ে । বিৰোধীপক্ষই কয়, কৃষিপ্রধান উত্তৰপ্রদেশ আৰু পঞ্জাৱৰ নিৰ্বাচনৰ প্ৰতি লক্ষ্য ৰাখি কৃষি আইন বাতিল কৰিছে প্ৰধানমন্ত্ৰী নৰেন্দ্র মোদীয়ে । এইবাৰ পুৰোহিতসকলৰ ভয়ত সেও মানিলে ধামীয়ে । নিৰ্বাচনৰ ভয়েই প্ৰকৃত ভয় ।